Job
27 Mastapis Job kayno nirqan:
2 “Arreglamayta mana munamaptinpis y fiyupa nakatsimashqa kaptinpis lapanpaq munayniyuq Tayta Diospa jutinchömi kayno nï:
3 Kawayta y kalpata Tayta Dios qomashqanyaqqa 4 lutankunata manami rimashaqtsu ni lulakushaqtsu.
5 Tsaymi kawashqäyaqqa jutsaynaq kashqäta imaypis rimaykäshaq.
Jutsa rurashqäta qamkuna nimaptikipis manami jutsata rurashqäpitatsu nakaykä.
6 Jutsata mana rurashqa karmi imapitapis mana penqakütsu.
Tsaymi jutsaynaq kashqäta imaypis parlaykäshaq.
7 “¡Chikimaqnïkunaqa lapanpis ushakätsun!
¡Paykunaqa jutsata ruraq runano wanutsun!
8 Fiyu runakunaqa Tayta Diospa makinpita manami imanöpapis qeshpinqatsu.
9 Ima nakaycho kar manakuptinpis manami yanapanqatsu.
10 Tsay runakunaqa Tayta Dios munashqanno kawananpaq imaypis manami yarpachakärintsu.
Lapanpaq munayniyuq Tayta Diostaqa manami imaypis manakärintsu.
11 “Kananmi musyatsishayki Tayta Dios munayniyuq kashqanta.
Lapanpaq munayniyuq kashqanpitaqa manami upälakushaqtsu.
12 Munayniyuq kashqantaqa kikikikunapis rikashqankimi.
Tsayta musyaykarqa ¿imanirtaq manakaqkunata rimarkaykanki?
13 “Lapanpaq munayniyuq Tayta Diosmi fiyu runakunata y mana kuyapäkuq runakunata imaypis castigan.
14 Fiyu runakunapa tsurinkuna atska karpis wakinqa guërrachömi ushakanqa y wakinnami yarqaypita wanunqa.
15 Kawaykar quëdaqkunapis fiyu qeshyawanmi wanunqa.
Fiyu kaptinmi viüdankunapis mana waqanqatsu.
16 “Fiyu runakuna shalatanöraq qellayta shuntaptinpis y tsaytsika röpata shuntaptinpis 17 ali runakunami tsay röpankunata jatikärinqa.
Qellayta shuntashqantapis jutsaynaq runakunami manijapäkunqa.
18 Fiyu runakunapa wayinqa* pishqupa qeshwanno ushakaqlami kaykan.
Tsaynöpis täpana tsuklanölami kaykan.
19 “Tsay fiyu runakunapa riquëzankunaqa elaqpitami ushakanqa.
20 Löcu tamya elaqpita tsarishqannömi paykunataqa ima castïgupis elaqpita tsarinqa.
Löcu wayra tsakaypa shamur imatapis elaqpita ushakashqannömi paykunapis elaqpita ushakanqa.
21 Inti jeqamunan kaq lädupita löcu wayra shamurmi wayincho kaykaqta elaqpita apakunqa.
22 Mayman pakakuptinpis mana kuyapaypami ushakätsinqa.
23 Wichyarraqmi tsay wayra kushishqa apakunqa”.