Apocalipsis

Anticristo shamunanpaq kashqan

13 Tsaypitanami rikarqä lamarpita *anticristo yarqaykämuqta.* Payqa qanchis umayuq y chunka waqrayuqmi karqan. Cada waqranchömi corönata jatirarqan. Cada umanchönami Tayta Diospa contran qelqararqan.* 2 Cuerpun karqan leopardupa niraqmi. Chakinkunami karqan ösupa chakin niraq. Y shiminnami karqan leonpa shimin niraq.* Paytami munayninta dragón qorqan lapanta mandananpaq.

3 Anticristupa juk uman pasaypa aqulushqa kaykaqtami rikarqä. Aqulushqa kaykarpis wanunanpa trukan aliyarqanmi. Aliyaptinmi runakuna mantsakushpan nishqankunata cäsukärirqan. 4 Anticristuta munayninta qoshqanpitami dragonta runakuna adorapäkurqan. Tsaynölami anticristutapis adorar kayno nipäkurqan: “¡Payno munayniyuqqa manami pipis kantsu! ¡Manami pipis payta vinciyta kamäpakuntsu!”

5 Anticristutami Tayta Dios kachaparirqan yachaq tukur paypa contran rimananpaq. Tsaynöpis munayninta qorqan chusku chunka ishkay (42) killa munashqanta imatapis rurananpaqmi. 6 Tsaymi anticristuqa Tayta Diospa contran, jana patsacho kaykaq templupa contran y jana patsacho kaykaqkunapa contran imaykatapis rimarqan.*

7 Tsaynöpis anticristuta Tayta Dios kachaparirqan payman yärakuqkunata atacar vincinanpaqmi.* Tsaymi munaynincho tsarararqan maytsay trïbu runakunata, maytsay marka runakunata, ima idiömata rimaq runakunata y maytsay nación runakunatapis. 8 Lapan runakunami anticristuta adorapäkurqan. Tsay adoraq runakunapa jutinkunaqa Libru de la Vïdacho manami qelqararqantsu. Tsay libruqa wanutsishqan Carnishpa librunmi kaykan. Tsay libruta Tayta Dios qelqarqan kay patsata kamashqan witsanmi.* 9 Rinriyuq kaqkunaqa nishqäkunata wiyakäritsun.

Tsayno kaptinpis Diosman yärakuqkunaqa pacienciakäritsun. Imano

nakarpis payman yärakäritsun.

Anticristupa profëtan shamunanpaq kashqan

11 Nirkurnami rikarqä *anticristupa profëtan patsa rurinpita yarqaykämuqta. Payqa carnishpa waqranno waqrashqami karqan. Itsanqa dragonnömi parlarqan. 12 Anticristunömi munayniyuq karqan. Paymi lapan runakunata nirqan anticristuta adorapäkunanpaq. Anticristuqa uman pakishqa kashqanpita aliyashqanami kaykarqan.

13 Tsaynöpis anticristupa profëtanqa milagrukunatami rurarqan. Runakuna rikaykaptinmi jana patsapita ninatapis ratatsimurqan. 14 Anticristupa nawpancho milagrukunata tsayno rurarmi runakunata engañarqan.* Nirkurnami runakunata mandarqan ïduluta rurananpaq. Tsay ïdulu karqan uman aqulushqa kashqanpita aliyashqa anticristo niraqmi. 15 Anticristupa profëtanqa munayniyuq karmi ïduluta kawayta qorqan. Tsaymi tsay ïdulu parlar payta mana adoraq kaqkunata wanutsinanpaq nirqan.

16 Tsaynöpis anticristuqa yachaq runata y mana yachaq runatapis, rïcu runata y waktsa runatapis, ashmaykunata y mana ashmaykunatapis lapantami alawqa kaq makinman karpis o urkunman karpis señalatsirqan. 17 Tsay señal karqan anticristupa jutinpa *nümerunmi. Señaläni kaq runakunaqa manami rantipakuyta ni rantikuyta kamäpakurqantsu. 18 Anticristupa ima nümerun kashqantapis shumaq tantiyakäriy. Tsay nümerunqa kaykan soqta pachak soqta chunka soqtami (666). Runapa jutinmi tsay nümeru kaykan. Pipis yachaq kaqqa tantiyakutsun pï runapa jutin tsay nümeru kashqantapis.