Levítico
Tinkuna Toldu patiulacho sacrificiuta rupatsinanpaq nishqan
17 Mastapis Moisésta TAYTA DIOS kayno nirqan: 2 “Aarónta, tsurinkunata y lapan Israel runakunata kay nishqäkunata tantiyatsir kayno niy: 3 ‘Pï Israel runapis töruta karpis, uyshata karpis, cabrata karpis campamentucho o juk läducho sacrificiupaq pishtarkur 4 Tinkuna *Sagrädu Toldu patiuman TAYTA DIOSPA nawpancho rupatsinanpaq apamunqa. Mana apamurqa yawarta mashtashqanpita pasaypa jutsayuqmi kanqa. Tsayno ruraq kaqqa Israel runakunapita qarqushqami kanqa. 5 Tsaymi lutala may jirkachöpis uywakunata pishtarkur sacrificiuta rupatsinanpa trukanqa Tinkuna Toldu patiuman aparkamur cürata entreganqa rupatsinanpaq. Cüranami TAYTA DIOSPA nawpancho uywakunata pishtanqa jawka kawakuy sacrificiupaq. 6 Tinkuna Toldu patiucho pishtarmi uywapa yawarninta *altarman cüra tsaqtsupanqa. Wiranta altarcho rupatsiptin ali asyayninta* mayarmi TAYTA DIOS kushikunqa.
7 “ ‘Jirkapa amana apapäkunkitsu chïvu niraq *supaykunapaq sacrificiuta rupatsinaykipaq. Tsaykunatami mana tantiyakuypa adorapäkushqanki. Kay nishqäkunaqa imayyaqpis leymi kanqa qamkunapaq y qamkunapita miraqkunapaqpis.
8 “ ‘Israel runakunata y qamkuna tashqaykicho jäpa runakunatapis tsay nishqäta wilapäkunki. Rupatsina sacrificiuta o ima sacrificiutapis rupatsiyta munarqa 9 Tinkuna Toldu patiuman TAYTA DIOSPAQ apanqa. Mana apaq kaqqa Israel runakunapita qarqushqami kanqa.
Yawarta mana mikunanpaq nishqan
10 “ ‘Yawarta mikuq kaqtaqa Israel runa kaptinpis jäpa runa kaptinpis castigashaqmi.* Ichiklatapis yawarta mikuq kaqtaqa ushakätsishaqmi. 11 Lapan kawaqkunapa yawarninchömi vïdan kaykan. Qamkunapis *altarman yawarta jicharraqmi jutsaykipita perdonashqa kanki.* 12 Tsaymi Israel mayikikunata ninki mayqanpis yawarta mana mikupäkunanpaq. Tsaynöla qamkunacho taq jäpa runakunapis yawarta ama mikunqatsu.
13 “ ‘Mayqanikipis mikuna uywata o mikuna pishquta tsarirqa yawarninta ama mikupäkuytsu. Tsaypa trukanqa pampaman jicharir alpawan pamparkunki. Tsaynöla ruranqa qamkunacho taq jäpa runakunapis. 14 Lapan kawaqkunapaqa yawarninchömi vïdan kaykan. Tsayno kaykaptinqa yawarta ama mikupäkunkitsu. Pipis yawarta mikuq kaqqa Israel runakunapita qarqushqami kanqa.
15 “ ‘Pipis wanushqa uywapa aytsanta o munti uywa katupakushqan aytsata mikurqa röpanta taqshakurir armakunqa. Tsaynöla qamkunacho taq jäpa runakunapis tsayta mikurqa armakunqa. Tsayno rurarpis patsa tsakashqanyaqmi *impüru kanqa. 16 Röpanta mana taqshakuptin y mana armakuptinqa castigashqami kanqa’ ”.