Hebreos
Melquisedec pï kashqanta tantiyatsishqan
7 Melquisedec karqan Salem markapa mandaqnin rey y lapanpaq poderniyuq Tayta Diosta sirviq cürami. Guërracho reykunata vincishqanpita Abraham kutiykämuptinmi Melquisedec taripaykur Abrahamta bendicionta qoshpan Tayta Diosta manakurqan. 2 Abrahamnami guërracho vincir lapan shuntamushqankunapita Melquisedecta *diezmuta qoykurqan.* Melquisedec ninanqa “alilata ruraq rey” ninanmi. Salem ninanqa “ali kaway” ninanmi. Tsaymi Melquisedecqa ali kawayta taritsiq rey karqan.
3 Manami musyakantsu Melquisedec mayqan aylu kashqan ni maman ni taytan pï kashqanpis. Tsaynöpis manami musyakantsu imay yurishqan ni imay wanushqanpis. Tsaymi Diospa Tsurinno imayyaqpis cüra kaykan.
Abrahampita Melquisedec mas munayniyuq kashqan
4 Melquisedecman *diezmuta taytantsi Abraham apashqa kaptinmi tantiyakuntsi Abrahampitapis Melquisedec mas munayniyuq kashqanta. 5 Leví trïbu cürakunaqa *Moisés qelqashqan leykunacho nishqannömi Israel mayinkunapita diezmuta chaskipäkun. Tsayno chaskipäkun Israel mayinkuna paykunanöla Abrahampita miraq kaptinmi.* 6 Melquisedecmi itsanqa Leví trïbu mana kaykarpis Abraham apashqan diezmuta chaskirqan. Diezmuta chaskirkurmi Abrahamta bendicionta qoshpan Tayta Diosta manakurqan. Tayta Dios promitishqanta Abraham chaskishqa kaptinpis payta Melquisedec bendicionta qoptinmi Abrahampita mas munayniyuq kashqanta musyantsi. 7 Musyashqantsinöpis bendicionta qoq kaqmi bendicionta chaskiqpitapis mas munayniyuq kaykan.
Leví trïbu cürakunapita Melquisedec mas munayniyuq kashqan
8 Tsaynöpis Tayta Diospa palabrancho manami imaypis nintsu Melquisedec wanushqanta. *Diezmuta chaskiq cürakunami itsanqa wanuqla karkaykan. Tsayno kaptinmi tantiyantsi Leví trïbu cürakunapitapis Melquisedec mas munayniyuq kashqanta.
9 Melquisedecta Abraham diezmuta qoptinmi Leví trïbu cürakunapis Melquisedecta diezmuta entregaqno karqan. 10 Leví trïbu cürakuna Abrahampita miraq kashpanmi manaraq yurirpis Melquisedecta entregaqno karqan. Tsaymi Melquisedecta Abraham diezmuta qoptin tantiyantsi Leví trïbu cürakunapitapis Melquisedec mas munayniyuq kashqanta.
Melquisedecno Jesucristo mandaq cüra kashqan
11 *Moisés qelqashqan leykunacho nishqannöla sacrificiuta cürakuna rupatsishqanpita salvación kaptinqa Jesucristuta cüra kananpaq Tayta Dios manami churanmantsu karqan. Cüra kananpaq churaptinmi Jesucristuqa Aarónnötsu cüra kaykan, sinöqa Melquisedecnömi.*
12 Cürata Tayta Dios tsayno trukatsirmi Moisés qelqashqan leykunatapis trukatsirqan. 13 Cüra kananpaqqa Jesucristo manami Leví trïbupitatsu karqan, sinöqa juk trïbupitami. Paypa trïbun kaqpitaqa manami pipis *altarcho sirvinanpaq cüra karqantsu. 14 Señor Jesucristuqa Judá trïbupitami yurishqa. Tsay trïbupita cüra kananpaq kaqtaqa Moisés qelqashqan leykunacho manami imatapis nintsu.
15 Moisés qelqashqan leykunata Tayta Dios trukatsishqanta musyantsi Melquisedec cüra kashqanno Jesucristupis cüra kananpaq shamushqa kaptinmi. 16 Leví trïbupita mana kaptinpis cüra kananpaq payta Tayta Dios churarqan imayyaqpis kawaq kaptinmi. 17 Paypitami Tayta Diospa palabrancho kayno qelqaraykan: “Qammi imayyaqpis Melquisedecno cüra kanki”.*
18 Mandaq cüra kananpaq Jesucristuta churarmi leycho cürakunapaq nishqankunata Tayta Dios trukatsirqan. Tsay leykuna nishqanno Leví trïbu cürakuna cumpliptinpis manami tsay leykunachötsu runakuna perdonta taripäkun. 19 Tsay leykunaqa manami pitapis salvantsu. Jesucristumi itsanqa salvamashpantsi Tayta Diospa nawpanman chayatsimantsi.
Jesucristo imayyaqpis cüra kananpaq Tayta Dios jurashqan
20 Jesucristuta imayyaqpis cüra kananpaq churarmi Tayta Dios juraypa promitirqan. Leví trïbu cürakunata churarqa manami juraypatsu promitirqan. 21 Jesucristutami itsanqa kayno nir promitirqan:
“Tayta Diosmi jurashpan kayno nir promitishurqayki:
‘Qammi imayyaqpis [Melquisedecno] cüra kanki’.
Tsayno promitishushqaykita cumplinanpaqmi jurarqan.
Promitishqantaqa manami qonqanqatsu”.*
22 Tsayno nir jurashqa kaptinmi Tayta Dios mushuq *pactuta cumplinanpaq Jesús garantiantsi kaykan. Mushuq pactuqa mas alimi kaykan Israel runakunawan punta kaq rurashqan pactupitapis.
23 Punta kaq pactuchöqa mandaq cüra wanuptin juknami trukan yaykuq. 24 Jesucristumi itsanqa mana ushakaq kar imayyaqpis mandaq cüra kaykan. 25 Tsaymi payman yärakuqkunata imaypis salvan Tayta Diospa nawpanman chayananpaq. Tsaynöpis salvashqa kaqkunapaqmi Tayta Diosta imaypis manakuykan.
26 Jesucristo mandaq cüra kaptin kushikuntsimi. Paymi jutsaynaq *santu kar Tayta Dios munashqanno kawarqan. Jutsata ruraq runakunawan purirpis manami imaypis jutsata rurarqantsu. Jana patsachöpis lapanpita mas respitashqami kaykan.
27 Kay patsacho mandaq cürakunaqa kikinkunapa y wakin runakunapa jutsankuna perdonashqa kananpaqmi* waran waran uywata pishtarkur *altarcho rupatsipäkun. Jesucristumi itsanqa jutsantsipita perdonashqa kanantsipaq juk kutila kikin wanurqan.
28 Nawpataqa *Moisés qelqashqan leykunacho nishqanno ushakaq y jutsayuq runakunalami mandaq cürakuna karqan. Tsaypitanami Tayta Diosqa jurashpan kikinpa Tsurinta churarqan mandaq cüra kananpaq. Payqa manami ushakaq ni jutsayuq runatsu kaykan, sinöqa imayyaqpis kawaq y jutsaynaq mandaq cürami.