Apocalipsis
22 Tsaypitanami ángel rikatsimarqan imayyaqpis kawatsikuq y kuyaylapaq cristal vidriuno chipchipyaykaq [chuya] mayuta.* Tsay mayu yarqaykämurqan Tayta Dios y Jesucristo jamaraykashqan trönun chakinpitami. 2 Jatun kaq cälli chawpinpami tsay mayu aywaykarqan. Mayu kuchunkunachömi imayyaqpis kawatsikuq yörakuna ichiraykarqan.* Tsay yörakunami cada killa wayun. Raprankunanami lapan nación runakunapaq jampi karqan.
3 Kay patsata Tayta Dios maldicionashqa karpis tsay markataqa mananami maldicionanqanatsu.* Tsaychöqa Tayta Diospa y Carnishpa trönunmi kaykanqa. Sirviqninkunanami Diosta adorapäkunqa. 4 Tsaychömi Tayta Diospa qaqlanta rikapäkunqa.* Urkunkunachömi Tayta Diospa jutinpis qelqaranqa. 5 Tsay markachöqa patsapis mananami tsakanqanatsu. Chipchipyayninwan Tayta Dios atsikyapaptinmi* intitapis ni ima atskitapis nistapäkunqanatsu. Tsay runakunami imayyaqpis mandanqa.*
Jesucristo kutimunanpaqna nishqan
6 Tsaymi *ángel kayno nimarqan: “Profëtakunata tantiyatsiq Tayta Diosmi kachamashqa imapis pasananpaq kaqkunata sirviqninkunata wilanäpaq. Kay wilakushqäkunaqa rasun kaqlami kaykan”.
7 Tsaynöpis Jesucristo kaynömi nin: “Shamunäpaqnami kaykä. Kushishqami kawanqa kay librucho qelqaraqkunata cäsukuqkunaqa”.
8 Noqa Juanmi tsaykunata mayashqä y rikashqä. Tsaymi lapanta rikatsimaq angilpa nawpanman adoranäpaq lätakuykurqä. 9 Tsawraqa kayno nimarqan: “¡Noqata ama adoramaytsu! Noqapis profëta mayikikunanöla y qelqashqaykikunata chaskikuqkunanölami Tayta Diospa sirviqnin kaykä. Tayta Dioslata adorayqa”.
10 Mastapis kayno nimarqan: “Lapanpis cumplinanpaqna kaykaptinqa revelacioncho rikashqaykikunata ama pakarätsiytsu, sinöqa libruman qelqarkur runakunaman apatsiy. 11 Mana alita ruraqkuna jina mana alita rurar kawapäkutsun. Jutsa ruraqkunaqa jina jutsata rurar kawapäkutsun. Ali runakunaqa alita rurar kawapäkutsun. Tayta Dios munashqanno *santu kawaqkunaqa pay munashqanno santu kawapäkutsun”.*
12 Jesucristumi kayno nin: “Noqaqa shamunäpaqnami kaykä. Shamurmi runakuna kawashqanman tupu juzgar premiuta qoshaq o castigashaq.* 13 Alfa y Omegami* noqa kaykä. Qalaykunan y ushananmi kaykä.*
14 “Kushishqami kanqa mushuq Jerusalénman yaykunanpaq y imayyaqpis kawatsikuq yörapa* wayuyninta mikunanpaq röpankunata taqshakuqkuna.* 15 Tsay markaman manami yaykunqatsu lutan ruraqkuna, brüjukuna, *fornicación jutsata ruraqkuna, runa mayinta wanutsiqkuna, ïdulukunata adoraqkuna y lapan lulakuqkunapis.
16 “Noqa Jesúsmi yärakamaqkunaman angilnïta kachamushqä imapis pasananpaq kaqkunata musyatsinäpaq. Noqaqa Davidpita miraqmi* y Waraq Lucërumi* kaykä”.
17 Espíritu Santupis y Jesucristuwan casarananpaq jipashpis* kaynömi nin: “¡Jukla shamuyna, Tayta!” Kay librucho qelqaraykaqkunata mayaqkunapis “shaykalämuyna, Tayta” nipäkutsun. Yakunaqkunaqa shapäkamutsun. Imayyaqpis kawatsikuq yakuta dembaldila upupäkutsun.*
18 Kay librucho qelqaraykaqta wiyaqkunatami kayno nï: Mayqanpis kay qelqaraykaqkunaman yarpayninkunata yapaq kaqtaqa Tayta Dios fiyupami castiganqa. Kay librucho qelqarashqannömi tsay runakuna nakapäkunqapaq. 19 Kay librucho qelqaraykaqpita juk yachatsikuylatapis jorquptinqa* Tayta Dios manami kachapanqatsu imayyaqpis kawatsikuq yörapa wayuyninta mikunanpaq.* Tsaynöpis mushuq *sagrädu Jerusalén markaman manami yaykunqatsu ni kay librucho qelqaraykaq bendicionkunatapis chaskinqatsu.
20 Kay libruta qelqanäpaq tantiyatsimaqmi kayno nin: “Shamunäpaqnami kaykä”.
“¡Amén! ¡Shakalämuy, Señor Jesús!”
21 Señor Jesucristo lapaykita imaypis yanapaykuläshunki. [Amén.]