Mateo
Jamay junaqpaq Jesús munayniyuq kashqan
12 Jamay junaqchömi discïpulunkunawan Jesús pasarkaykarqan trïgu poquraykaq chakrakunapa. Tsaypa pasarmi discïpulunkuna mikanashpan trïguta palarkur uchupäkurqan.* 2 Tsayta rikaykurmi *fariseukuna kayno nipäkurqan: “Rikay. Discïpuluykikunaqa leynintsita mana cäsukuypami jamay junaq kaykaptin trïguta palarkaykan”.
3 Tsaymi Jesús nirqan: “¿Manaku imaypis liyipäkushqanki David yanapaqninkunawan mikanar imata rurashqantapis? 4 Davidshi Tayta Diospa wayinman yaykuykur Diospaq churaraykaq tantata mikurqan.* Tsay tantaqa manami David ni paywan kaykaq runakuna mikunanpaqtsu karqan, sinöqa cürakunala mikupäkunanpaqmi.* 5 Tsaynöpis *Moisés qelqashqan leykunacho niykan cürakuna templucho jamay junaq arurpis jutsayuq mana kashqantami. Tsaytapis ¿manaku liyipäkushqanki?* 6 Tsaymi qamkunata kayno nï: Noqami templupitapis mas munayniyuq kaykä.*
7 “Tayta Diospa palabrancho kaynömi niykan: ‘Sacrificiuta rupatsishqaykipitapis mas munä kuyapäkuq kanaykitami’. Tsayta tantiyakurqa manami discïpulükunata jamurpankimantsu.* 8 *Runapa Tsurinqa jamay junaqpaqpis munayniyuqmi kaykan”.*
Makin wanushqa runata jamay junaqcho Jesús aliyätsishqan
9 Tsaypita aywarmi *sinagögaman Jesús yaykurqan. 10 Tsaychömi makin wanushqa runapis kaykarqan. Tsaymi Jesústa tapupäkurqan kayno nir: “Jamay junaqcho qeshyaykaqta ¿aliyätsishwanku o manaku?”
Tsayno tapurqan aliyätsiptinqa tsay achäquila Jesúspa contran sharkapäkunanpaqmi.
11 Tsaymi Jesús kayno nirqan: “Mayqaykipapis uyshayki pözuman jeqaptin jamay junaq kaykaptinpis ¿manaku jinan höra jorquq aywanki?* 12 Runataqa uyshapitapis masmi kuyantsi. Tsayno kaykaptinqa jamay junaqchöpis runa mayintsita aliyätsishwanmi”.
13 Nirkurmi makin wanushqa runata kayno nirqan: “¡Makikita joqariy!”
Joqarkuptinmi jukaq makinno alina rikakurqan. 14 Tsaypitanami *fariseukuna yarqurishpan wilanakurqan Jesústa wanutsipäkunanpaq.
Jesúspita profëta Isaías qelqashqan
15 Tsayno wilanakushqanta musyaykurmi tsay markapita Jesús aywakurqan. Aywakuptinmi atska runakuna qepanpa aywapäkurqan. Qeshyaq kaqtaqa lapantami Jesús aliyätsirqan. 16 Aliyarkatsirmi Jesús kayno nirqan: “Pitapis ama wilapankitsu aliyätsishqäta”.
17 Tsaynöpami profëta Isaías kayno qelqashqanta Jesús cumplirqan:
18 “Sirvimaqnï imano kashqantapis tantiyakäriy.
Paytami akrashqä.
Paytami kuyä.
Paypitami fiyupa kushikü.
Espïritütami payman kachamushaq.
Paymi maytsay nación runakuna munashqäno kawananpaq wilakunqa.
19 Payqa manami pitapis olqüpanqatsu ni qayapanqatsu.
Cällikunachöpis manami olquraykar purinqatsu.
20 Latkishqa shoqushtapis manami pakinqatsu.
Upinaykaq atskitapis manami upitsinqatsu.*
Payqa lapantapis alimi juzganqa.
21 Juk lädu nacioncho taqkunapis paymanmi yärakärinqa”.*
Jesúspa contran parlapäkushqan
Marcos 3.20-30; Lucas 11.14-23; 12.10
22 Tsaypitanami *supay qaprayätsishqan y upayätsishqan runata Jesús kaqman pushapäkurqan. Tsay runami Jesús aliyätsiptin rikarqanna y parlarqanna. 23 Tsayta rikarmi runakuna kushikushpan kayno nipäkurqan: “¿Kay runaqa *Davidpa Tsurintsuraq kaykan?”
24 Tsayno nishqanta mayarmi *fariseukuna kayno nipäkurqan: “Kay runaqa supaykunapa mandaqnin Beelzebúpa* munayninwanmi supaykunata qarquykan”.*
25 Paykunapa yarpayninkunata musyarmi Jesús kayno nirqan: “Juk nacioncho runakuna kikinpura chikinakurqa ¿manatsuraq wanutsinakur ushakanqa? Tsaynöpis juk markacho taqkunapis o juk wayicho taqkunapis chikinakurqa ¿manatsuraq wakpa kaypa aywakur ushakanqa? 26 Tsaynölami *Satanáspis kikinpa contran sharkurqa rakikashqa kanqa. Tsayno kaptinqa *mandaykashqanpis ushakanqami.
27 “Beelzebúpa munayninwan supaykunata qarquptïqa ¿pipa munayninwantaq discïpuluykikunaqa supaykunata qarqapäkun? Diospa munayninwan supaykunata qarqushqanta tantiyaykarqa ¿imanirtaq mana tantiyapäkunkitsu noqapis Tayta Diospa munayninwan qarqushqäta? 28 Diospa Espïritunwan supaykunata qarquptïmi Tayta Dios mandaykashqan qamkunaman chayamushqanta musyapäkunki”.
29 “Kalpayuq runata manaraq matwarqa manami pipis wayinman yaykur imankunatapis apakuntsu. Matwaykurmi itsanqa imankunatapis apakun.*
30 “Pipis favornï mana karqa chikiykämanmi. Noqata mana shuntäshimaq kaqqa qarquykanmi.* 31 Tsaymi qamkunata kayno nï: Runakuna jutsa rurashqanta y Diospa contran parlashqantapis Tayta Dios perdonanqami. Espíritu Santupa contran parlashqantami itsanqa mana perdonanqatsu. 32 *Runapa Tsurinpa contran parlaptinqa perdonanqami. Espíritu Santupa contran parlaptinmi itsanqa kay vïdachöpis ni juk vïdachöpis mana perdonanqatsu.* *
Parlakuyninpa runata reqishqantsita Jesús nishqan
33 “Ali yöraqa alitami wayun. Mana ali yörami itsanqa mana alita wayun. Wayuyninpami yörata reqintsi.* * 34 ¡Culebra casta runakuna!* Fiyu runa kaykarqa ¿imanöpataq alikunata parlankiman? Runaqa shonqun yarpashqantami alitapis o mana alitapis parlan.* 35 Ali runaqa shonqun alita yarpashqantami parlan y fiyu runaqa shonqun mana alita yarpashqantami parlan. 36 Tsaymi qamkunata kayno nï: Imatapis lutankunata parlashqanpitami Tayta Dios juiciu final junaq juzganqa. 37 Alita parlaqtaqa salvanqami. Lutankunata parlaqtami itsanqa infiernuman qaykunqa”.
Milagrutaraq Jesús rurananta munapäkushqan
Marcos 8.11-12; Lucas 11.29-32
38 Tsayno niptinmi wakin *fariseukuna y ley yachatsiqkuna Jesústa kayno nipäkurqan: “*Rabí, Tayta Dios rasunpa kachamushushqaykita musyapäkunäpaq ima milagrutapis ruray”.*
39 Tsaymi Jesús kayno nirqan: “¡Mana cäsukuq jutsasapa runakuna! Milagruta ruranäta munaptikipis* manami ima milagrutapis rurashaqtsu. Tsaypa trukanqa profëta Jonásta salvar milagruta rurashqannömi Tayta Dios juk milagruta ruranqa. 40 Kimsa junaq kimsa paqas jatunkaray pescädupa pachancho Jonás kashqannömi* *Runapa Tsurinpis kimsa junaq kimsa paqas pamparanqa.
41 “Jonás wilakushqanta chaskikurmi Nínive runakuna jutsa ruraykunata kacharirqan.* Kananqa Jonáspita mas munayniyuq kaqmi wilapaykäshunki.* Tsaymi juiciu final junaq Nínive runakuna sharkarkamur kanan witsan runakunata careapäkunqa”.
42 “Salomón yachatsishqanta mayananpaqmi mandaq reinapis sur kaq lädu karu nacionpita shamurqan.* Kananqa Salomónpita mas yachaq kaqmi wilapaykäshunki.* Tsaymi juiciu final junaq tsay reina sharkarkamur kanan witsan runakunata careanqa.
Runaman supay kutishqan
43 “Runapita *supay yarqurmi chunyaq jirkakunapa purin maychöpis tänanpaq ashir. Mana tariykurmi 44 kayno nin: ‘Yarqamushqä wayïman kutikushaq’. Kutishpanmi tariykun pitsapakushqa y churapakushqa jäkuraykaqta. 45 Tsawraqa supay mayinkunaman aywar paypita mas fiyu qanchis supaykunata pushakurkur tsay tashqanman kutin. Tsaymi nawpata kashqanpitapis mas peorraq tsay runa rikakun. Tsaynömi pasanqa kanan witsan fiyu runakunatapis”.
Jesúspa maman y wawqinkuna pï kashqanpis
46 Jesús tsayno yachaykätsiptinmi paywan parlayta munar maman y wawqinkuna punkucho shuyarpaykarqan. 47 Tsaymi juk runa Jesústa wilarqan kayno nir: “Mamayki y wawqikikunami punkucho shuyarpaykäshunki”.
48 Tsayno wilaptinmi Jesús kayno nirqan: “Kanan wilashayki mamä y wawqïkuna pï kashqantapis”.
49 Tsayno nirmi discïpulunkuna kaqpa toqriykur kayno nirqan: “Paykunami mamä y wawqïkuna kaykan. 50 Pipis jana patsacho kaykaq Taytä munashqanno kawaq kaqmi wawqï, panï y mamä kaykan”.