Filipenses
Wakin kaqkunata ali rikanantsipaq yätsishqan
2 Jesucristupa makincho karqa alimi kawapäkuntsi. Pay kuyamaptintsimi kushishqa kawaykantsi. Espíritu Santupis noqantsiwanmi imaypis kaykan. Tayta Diosmi tantiyaykätsimantsi wamayänakur y kuyapänakur kawanantsipaq. 2 Tsayno kaykaptinqa juk shonqunöla imaypis kuyanakur kawapäkuy. Tsayno kuyanakushqaykita musyarmi pasaypa kushikushaq.
3 Runa mayikiwan ama chikinakäriytsu ni yachaq tukäriytsu, sinöqa pïmaytapis aliman churar respitapäkuy. 4 Kikilaykikuna ali kawanaykipaq yarpachakärinaykipa trukanqa wakinkunapis ali kawananpaq yarpachakäriy. 5 Jesucristo kawashqanno qamkunapis kawapäkuy.
6 Payqa Dios kaykarpis* manami jana patsalachötsu täkurqan.
7 Munayniyuq kashqanta kachaykurmi ashmaynöla kananpaq noqantsino yurirqan.
8 Runa karnami Tayta Dios munashqanta rurashpan cruzcho wanurqan.*
9 Tsaymi Tayta Dios payta churashqa lapanpitapis mas munayniyuq kananpaq.
Paytami jutita churaparqan lapanpitapis mas munayniyuq kaqta.*
10 Tsaymi jana patsacho kaqkuna, kay patsacho kaqkuna y infiernucho kaqkunapis Jesucristupa nawpanman qonqurpakärinqa.
11 Tsaychömi pïmaypis nipäkunqa Jesucristo Señornintsi kashqanta.
Tsayno nirmi Tayta Diosta lapanpis alabapäkunqa.*
Tayta Dios munashqanno kawanantsipaq nishqan
12 Kuyay wawqi panikuna, tsayno kaykaptinqa qamkuna kaqcho kaykaptï cäsukamashqaykinöla karucho kaptïpis cäsukärimay. Salvashqana kashqayki musyakänanpaqqa Tayta Diosta *mantsakur lapan shonquykiwan pay munashqanno kawapäkuy. 13 Pay munashqanno kawapäkunaykipaq kikinmi shakyätsishunki y poderta qoshunki.
14 Mana jamurpänakuylapa y mana rimanakuylapa imaypis kawapäkuy. 15 Tsayno kawapäkuptikiqa Diospa wamran kashqaykita tantiyakur manami pipis wasaykita rimanqatsu. Tsaymi mana cäsukuqkunapa markancho tarpis* tsakaypa atski atsikyashqanno kankipaq.
16 Salvakunantsipaq kaq wilakuyta imaypis cäsukäriy. Tsaynöpami Jesucristo kutimuptin wilakuyninta alipaq wilapashqäpita pasaypa kushikushaq.
17 Tsayno kaptinmi wanutsimänan kaptinpis kushikü. Wanutsimaptinqa sacrificiu jananman vïnuta jichashqannömi kashaq. Tayta Diosta mana ajayaypa sirvipäkushqaykipis sacrificiuno kaptin qamkunapis kushikäriy. 18 Noqa kushikushqänöla qamkunapis kushikäriy.
Timoteuta Filipusman Pablo kachananpaq nishqan
19 Señor Jesucristo kamakätsiptinqa Timoteutami* kachamushaq. Kutiykamur imano kaykashqaykitapis wilapämaptinmi kushikushaq. 20 Timoteunöqa manami pipis kantsu. Paylami noqano qamkunapaq yarpachakun. 21 Wakinkunaqa Jesucristo munashqanta rurananpa trukan kikinkuna yarpashqalantami rurapäkun.
22 Qamkuna musyapäkunkimi Tayta Dios munashqanno Timoteo kawashqanta. Payqa tsurïnömi yanapaykäman Jesucristupa ali wilakuyninta wilakunäpaq. 23 Tsaymi prësu kashqäpita yarqamunäpaq o mana yarqamunäpaq kashqantapis musyaykur payta kachamushaqpaq. 24 Yarqamunäpaq Tayta Dios kamakätsiptinqa noqapis watukuq shamushaqmi.
Filipusman Epafrodituta kachananpaq kashqanta wilashqan
25 Wawqintsi Epafroditutapis qamkuna kaqman kachamushaqmi. Alipaqmi payta kachaykalämushqanki. Tayta Diospa soldädunno kashpanmi imano nakarpis yanapamashqa. 26 Qeshyaptin lakikärishqaykita musyarmi qamkuna kaqman kutimuyta munaykan. 27 Rasunpapis pasaypami qeshyashqa. Wanunanpaqna kaykaptinmi Tayta Dios kuyapashpan aliyätsishqa. Tsaynöpami aläpa mana lakikunäpaq noqatapis Tayta Dios kuyapämashqa.
28 Tsaymi paywan tinkur kushikärinaykipaq jukla kachamushaq. Payta rikar kushikäriptiki noqapis mananami lakikushaqnatsu. 29 Pay chayamuptinqa Señor Jesucristupa jutincho kushishqa chaskiykulay. Payno yanapakuqkunataqa lapantapis ali chaskiykulay. 30 Jesucristuta sirvir qamkunapa trukayki yanapaykämashqanchömi ichiklapa wanushqatsu.