1 Juan
Lutan yachatsikuqkuna imano kashqanpis
4 Kuyay wawqi panikuna, kay patsacho atskaqmi lula profëtakuna purirkaykan. Tsayno kaykaptinqa pipis “Espíritu Santumi tantiyatsimashqa wilakunäpaq” nir chayamuptin shumaqraq tantiyapäkuy Tayta Diospa wilakuqnin kashqanta o mana kashqantapis. 2 Tayta Diospa wilakuqnin karqa Jesucristo kay patsaman shamur rasunpa runa kashqantami yachatsin.* 3 Jesucristo rasunpa runa kashqanta mana yachatsirqa manami Tayta Diospa wilakuqnintsu kaykan, sinöqa *anticristumi. Anticristo shamunanpaq kashqanta musyashqaykinölami kananqa anticristukuna kay patsacho purirkaykan.*
4 Kuyay wamräkuna, Tayta Diospa wamrankunami karkaykanki. Qamkunacho kaykaq Espíritu Santuqa kay patsacho kaykaq espïritupitapis mas munayniyuqmi kaykan. Pay yanapashuptikimi tsay lutan yachatsikuqkunata mana chaskipankitsu. 5 Paykunaqa Diospa wamran mana karmi kikinpa yarpaynilanpita yachaykätsin. Tsaymi paykunataqa Diosta mana cäsukuq runakunala chaskipan.*
6 Noqakunaqa Diospa wilakuqninmi karkaykä. Tsaymi wilakärishqäta chaskikuqkuna Tayta Diosta *reqipäkun. Wilakärishqäta mana chaskikuqkunaqa manami Tayta Diospa wilakuqninkunatsu karkaykan. Tsaynöpami musyantsi mayqan runa rasun kaqta yachatsishqanta y mayqan runa lutanta yachatsishqantapis.
Tayta Dios kuyamashqantsino kuyanakunantsipaq nishqan
7 Kuyay wawqi panikuna, Tayta Dios kuyakuq kaykaptinqa juknintsi juknintsipis kuyanakushun. Kuyanakurqa Diospa wamran karmi payta *reqintsi. 8 Mana kuyanakurmi itsanqa Diosta mana reqintsitsu. Tayta Diosqa kuyakuqmi kaykan.
9 *Mana ushakaq kawayta tarinantsipaqmi Tayta Dios japalan Tsurinta kay patsaman kachamurqan. Tsaynöpami pasaypa kuyamashqantsita musyatsimashqantsi.* 10 Rasunpa kaq kuyakuyqa manami noqantsi Tayta Diosta kuyashqantsitsu kaykan, sinöqa noqantsita pay kuyamashqantsimi. Jutsata rurashqantsipita sacrificiu kananpaqmi Tsurin Jesucristuta kachamurqan. Tsaymi rasunpa kaq kuyakuyqa kaykan.
11 Kuyay wawqi panikuna, Tayta Dios tsayno kuyaykämaptintsiqa noqantsipis kuyanakur kawashun. 12 Tayta Diosta manami pipis rikashqatsu.* Tsayno kaptinpis kuyanakuptintsiqa noqantsiwanmi kaykan. Tsaymi yanapaykämantsi pay kuyakuq kashqanno noqantsipis kuyakuq kanantsipaq.
13 Espíritu Santuta chaskikushqa karmi Tayta Dios noqantsiwan kaykashqanta y noqantsipis paywan kaykashqantsita musyantsi.* 14 Tsaynöpis kikïkunami rikashqä Diospa Tsurin Jesucristo kay patsacho kaykaqta. Tsaymi wilakärï runakunata salvananpaq Tayta Dios payta kachamushqanta.* 15 Jesucristo Tayta Diospa Tsurin kashqanta criyir chaskiq kaqqa Tayta Dioswanmi kaykan y Tayta Diospis paywanmi kaykan.
16 Kananqa Tayta Dios kuyamashqantsita musyarmi payman yärakuykantsi. Tayta Diosqa kuyakuqmi kaykan. Noqantsipis kuyanakurqa paywanmi kaykantsi y paypis noqantsiwanmi kaykan. 17 Tsaynöpami Tayta Dios munashqanno kuyanakuntsi. Tsayno kuyanakur kawar y Jesucristo kay patsacho kawashqanno kawarqa juiciu finalchöpis manami mantsakushuntsu. 18 Tayta Dios kuyamashqantsita mana tantiyarmi castigamänantsipaq kashqanta yarpantsi. Tayta Dios kuyamashqantsita tantiyarmi itsanqa mana castigamänantsipaq kashqanta musyar payta mana mantsantsitsu.
19 Puntata pay kuyamashqa kaptintsimi noqantsi [payta] kuyantsi. 20 Pipis “Tayta Diosta *kuyämi” niykar runa mayinta chikirqa lulakuykanmi. Runa mayintsita rikaykar mana kuyaykarqa ¿imanöparaq mana rikashqantsi Tayta Diosta kuyashwan? 21 Tayta Diospa mandamientunchömi nimantsi: “Tayta Diosta kuyarqa runa mayikitapis kuyay”.*