1 Crónicas
16 Tayta Diospa babulninta aparmi David ruratsishqan tolduman chayatsipäkurqan. Nirkurnami uywakunata David pishtarkatsir rupatsina sacrificiuta y jawka kawakuy sacrificiutapis Tayta Diospa nawpancho rupatsipäkurqan.* 2 Rupatsiyta usharkurmi Israel mayinkunapaq TAYTA DIOSTA manakur Davidqa Diospa jutincho bendicionta qorqan. 3 Nirkurmi olqutapis warmitapis lapan Israel runakunata aypurqan juk tantata, pedäzu aytsata y päsaslan atipay juk biscöchuta.
4 Levitakunatami David churarqan TAYTA DIOSPA babulnin kaqcho Israel runakunata kuyaq TAYTA DIOSTA manakunanpaq, agradëcikunanpaq y alabananpaq. 5 Paykunapa mandaqnin Asafmi platïlluta tukaq karqan. Asafpa yanapaqninmi karqan Zacarías. Tsaypitanami karqan Jeiel, Semiramot, Jehiel, Matatías, Eliab, Benaía, Obed-edom y Jeiel. Paykunaqa salteriukunata y arpakunatami tukapäkuq. 6 Cürakuna Benaía y Jahazielnami Tayta Diospa Pactu Babulnin nawpancho cornëtakunata imaypis tukapäkuq.
Tayta Diosta agradëcikur David alabashqan
Salmo 96.1-13; 105.1-15; 106.47-48
7 Babulta chayatsishqan junaqmi Asafta y yanapaqninkunata David churarqan kay alabanzata cantatsinanpaq:
8 “¡TAYTA DIOSTA agradëcikäriy!
¡Paypa jutinta joqaripäkuy!
Lapan rurashqanta maytsay nacionchöpis wilakäriy.
9 Salmukunata cantar alabapäkuy.
Mantsariypaq rurashqankunata wilakäriy.
10 “TAYTA DIOSTA *ashiqkuna, lapan shonquykiwan payta alabapäkuy.
Japalan *santu Dios kashqanpita kushikäriy.
11 Munayniyuq TAYTA DIOSTA imaypis ashipäkuy.
Yanapashunaykipaq payta imaypis manakäriy.
12 Mantsariypaq rurashqan milagrukunata yarpapäkuy.
Paypa mandamientunkunata ama qonqapäkuytsu.
13 Tayta Diosta sirviq Israelpita miraqkuna, tsaykunata yarpapäkuy.
Akrashqan Jacobpita miraqkuna, lapan rurashqankunata ama qonqapäkuytsu.
14 “Paymi noqantsipa TAYTA DIOSNINTSI kaykan.
Intëru kay patsachömi munashqanta ruran.
15 Payqa *pactu rurashqanta manami imaypis qonqantsu.
Waranqa (1,000) *generación pasaptinpis yarparaykanmi.
16 Tsay pactuta Abrahamwanmi rurarqan.*
Jurashpanmi Isaactapis promitirqan.*
17 Imaypis cumplinanpaqmi Jacobta y paypita miraq Israel runakunatapis promitirqan.
18 Promitishpanmi kayno nirqan:
19 “Tsay witsanqa Israel runakuna walkaqlaraqmi karqan.
Jäpa nacioncho yupashqalami tarqan.
20 Paykunaqa nacionnin nacionnin y markan markanmi purikärirqan.
21 Tsayno kaptinpis Tayta Dios manami kachaparqantsu pipis nakatsinanta.
Paykunata kuyashpanmi reykunatapis castigarqan.
22 Paykunatami kayno nirqan:
‘Akrashqä runakunata ¡ojaläraq pilapis yataykunman!
Profëtäkunamanpis ¡ojaläraq pilapis makinta churaykunman!’*
23 “Kay patsacho taqkuna, lapayki TAYTA DIOSTA alabapäkuy.
Salvakuq kashqanta waran waran wilakäriy.
24 Munayniyuq kashqanta maytsay nacionkunachöpis wilakäriy.
Mantsariypaq rurashqantapis maytsay markakunachöpis wilakäriy.
25 Tsayno wilakäriy TAYTA DIOS alilata ruraq kashqanpita.
Lapan runakuna payta alabananpaq wilakäriy.
Payqa ima diospitapis mas mantsaypaqmi kaykan.
26 Wakin markakunapa diosninkunaqa ïdulukunalami kaykan.
TAYTA DIOSQA munayniyuq karmi jana patsatapis kamashqa.
27 Espantaypaq kaqkunata ruraptinmi nawpancho pïmaypis alabapäkun.
Munayniyuq kaptinmi templuncho kushishqa adorapäkun.
28 “Maytsay markacho taqkuna, TAYTA DIOSTA alabapäkuy.
Munayniyuq kashqanpita payta adorapäkuy.
29 TAYTA DIOSPA jutinta joqarir adorapäkuy.
Ofrendata apakurkur nawpanman yaykapäkuy.
Munayniyuq *santu TAYTA DIOSTA adorapäkuy.*
30 Intëru patsacho taq runakuna nawpancho siksikyätsun.
TAYTA DIOSMI kay patsata kamashqa mana kuyukuq kananpaq.
31 Jana patsapis kay patsapis kushikäritsun.
Maytsay nacionpita karpis lapayki kayno nipäkuy:
‘¡TAYTA DIOSMI mandamaqnintsi rey!’
32 Lamarpis y tsaycho kaykaqkunapis bunyaypa bunyar kushikäritsun.
Chakrakunapis y tsaycho kaykaqkunapis kushishqa cantapäkutsun.
33 Munticho kaq yörakunapis TAYTA DIOSPA nawpancho kushikäritsun.
Paymi aywaykämun kay patsacho juzgananpaq.
34 “Alilata ruraq kashqanpita TAYTA DIOSTA agradëcikäriy.
Kuyapäkuyninqa manami imaypis ushakantsu.*
35 Payta manakur kayno nipäkuy:
‘Tayta Dios, salvaykalämay.
Qam japalaykimi noqakunapa salvamaqnï kaykanki.
Karu nacionkunacho mashtakashqa kaykashqäpita shuntaykalämay.
Tsaynöpami santu jutikita joqarir kushishqa alabapäkushaykipaq.
Pasaypa kushikurmi qamta alabapäkushayki’.
36 “¡Israel runakunata kuyaq TAYTA DIOS imayyaqpis alabashqa kaykulätsun!”
Tsayno nir alabaptinmi lapan runakunapis “¡amén!” nir TAYTA DIOSTA alabarqan.
Tayta Diosta sirvinanpaq runakunata David churashqan
37 Tsaynömi Asafta y yanapaqninkunata David churarqan TAYTA DIOSPA *Pactu Babulnin kashqan kaqcho rurananpaq kaqkunata waran waran rurapäkunanpaq. 38 Babul churarashqan toldu punkuta täpapäkunanpaqmi David churarqan Jedutúnpa tsurin Obed-edomta, Hosata y soqta chunka pusaq (68) *levitakunata.
39 Gabaóncho kaykaq *Sagrädu Tolducho TAYTA DIOSTA sirvipäkunanpaqnami cüra Sadocta y wakin cürakunatapis David churarqan. 40 Paykunami TAYTA DIOS nishqanno tutapapis tardipapis tsaycho kaykaq *altarcho rupatsina sacrificiukunata rupatsipäkurqan. TAYTA DIOS yachatsishqan leykunacho qelqaraykashqannölami lapantapis rurapäkurqan.
41 TAYTA DIOSTA tsay tolducho alabapäkunanpaqmi rey David churarqan Hemánta y Jedutúnta. Tsaynöpis paykunata yanapananpaq churarqan akrashqan kaq wakin levitakunata. Paykuna alabarmi kayno nipäkurqan: “Imayyaqpis kuyamashqantsipita TAYTA DIOSTA agradëcikushun”.
42 Tayta Diosta alabarmi tukapäkurqan *cornëtata, platïlluta y wakin instrumentutapis.
Jedutúnpa tsurinkunatami David churarqan punkuta täpapäkunanpaq.
43 Tsaypitami lapan runakuna wayinkunapa kutikärirqan. Aylunkunata bendicionta qonanpaqmi Davidpis wayinpa kutikurqan.*