Bibliapita INTERNETCHO PUBLICACIUNNINCHICUNA

INTERNETCHO PUBLICACIUNNINCHICUNA

Quechua de Huánuco (Huallaga)

Salmos 103
Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Salmos 103:1

*
santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).

Runakuna santu kashqanta nirqa Tayta Dios akrashqan runakuna kashqanta (Deut. 7.6) y pay munashqanno jutsaynaq kawashqantami niykan (Lev. 20.7-8).

Sitiukuna y manëjukuna Tayta Diospaq kaptinqa sagrädu kashqantami niykan. Tsaymi Israel nacionpis (Zac. 2.12), Jerusalén markapis (Isa. 48.2) y templupis (Sal. 68.5) sagrädu kaykan. Tsaynölami jamay junaqpis (Éxo. 31.14) y fiestakunapis (Lev. 23.2) sagrädu kaykan.

Salmos 103:6

*
103.6 Sal. 146.7.

Salmos 103:8

*
103.8 Sal. 145.8; Stg. 5.11.

Salmos 103:11

*
mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).

Tayta Diosta mantsakunantsipaq yachakuntsi (Deut. 4.10; 14.23; 17.19; Sal. 34.11). Tayta Diosta mantsakuq runaqa yachaq y tantiyakuqmi kaykan (Job 28.28; Sal. 111.10; Prov. 1.7).

Mushuq Testamentuchöpis Tayta Diosta mantsakunantsipaq kashqanpitami parlan. Tsaychömi niykan payta mantsakuqkunata Tayta Dios kuyapashqanta (Luc. 1.50; Hech. 10.35) y Tayta Diosta mantsakur pay munashqanno kawashqantsita (2Cor. 7.1; 1Ped. 1.17; 2.17). Tsaynöpis niykan Tayta Diosta mantsakuqkuna premiuta chaskinanpaq kashqanta (Apoc. 11.18).

Itsanqa Jesucristuta chaskikur jutsata rurashqantsipita perdonashqana kaykantsi (Rom. 3.23-25; 1Juan 1.9). Tsaymi musyantsi Tayta Dios manana castigamänantsipaq kashqanta (1Juan 4.18) y payta mana mantsakuypa manakunantsipaq kashqanta (Rom. 8.15; Efe. 3.12).

Salmos 103:16

*
103.16 Israel nacionchöqa akaq wayra chunyaq tsaki jirkapita aywarmi imaykatapis tsakiratsin.

Salmos 103:17

*
103.15-17 Isa. 40.6-8.

Salmos 103:18

*
pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).

Salmos 103:20

*
ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).

Angilkunaqa (1) Tayta Dios nishqankunata wilakärin (Gén. 18.16–19.29; Dan. 8.15-17; 9.21-23; Mat. 1.20-24; Luc. 1.11-20, 26-38), (2) Tayta Diospa favornin pelyapäkun (2Rey. 6.15-17; Dan. 10.13-14; Apoc. 12.7-9) y (3) Diosman yärakuqkunata tsapan y yanapan (Sal. 91.11-12; Heb. 1.14).

Satanáspa angilninkunaqa supaykunami karkaykan (Mat. 25.41; Apoc. 9.11).

Salmos 103:22

*
103.21-22 Sal. 148.

Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Salmos 103:1-22

Salmos

Tayta Diosta alabashqan

(1a) David qelqashqan salmu.

103 (1b) TAYTA DIOSTAMI lapan shonqüwan alabashaq.

Lapan voluntänïwanmi *santu jutinta joqarir agradëcikushaq.

2 TAYTA DIOSTAMI lapan shonqüwan alabashaq.

Kuyapämar yanapamashqanta manami imaypis qonqashaqtsu.

3 Paymi lapan jutsäta perdonaman.

Tukuy niraq qeshyapitapis aliyätsiman.

4 Wanuypitapis paymi salvaman.

Kuyapämashpanmi yanapaman.

5 Alinnin kaqkunatami kamaripäman.

Ankano mana utikaq kanäpaqmi mözuyätsiman.

6 Waktsakunata makitsakuptin TAYTA DIOSMI favornin sharkun.*

7 Imano kawanantsipaqpis Moiséstami musyatsirqan.

Rurashqankunatami Israel runakunata tantiyatsirqan.

8 TAYTA DIOSQA ali shonqumi y kuyapäkuqmi kaykan.

Kuyakuq karmi juklaqa mana rabyakuntsu.*

9 Manami yaparir yaparirtsu castigamantsi.

Manami imayyaqpis nanaparämäshuntsu.

10 Manami jutsata rurashqantsiman tuputsu castigamantsi.

11 Kay patsapita jana patsayaq altu kashqannömi payta *mantsakuqkunapaqqa kuyakuynin jatun kaykan.

12 Patsapa juk kuchunpita jukaq kuchunyaq jitariqnömi jutsa rurashqantsitapis karuman jitarishqa.

13 Tsurinta taytan kuyashqannömi payta mantsakuqkunataqa kuyan.

14 Payqa musyanmi imano kashqantsitapis.

Alpalapita kashqantsita musyanmi.

15 Runakunaqa qewano ushakaqlami karkaykan.

Waytano shushuqlami karkaykan.

16 Akaq wayra shamur jachata ushakätsinmi.*

Ushakätsiptinmi maycho kashqanpis mana musyakannatsu.

17 TAYTA DIOSPA kuyakuyninmi itsanqa mana ushakaq kaykan.

Payta mantsakuqkunataqa imaypis kuyanmi.

Paykunapa tsurinkunapaq y wilkankunapaqpis alikunalatami ruran.*

18 Tsaynölami yanapan rurashqan *pactuta cumpliqkunata y mandamientunkunata cäsukuqkunata. 19 Jana patsachömi TAYTA DIOSPA trönun kaykan.

Tsaypitami lapan kay patsacho kaqkunata mandaykämun.

20 Munayniyuq *angilkuna, TAYTA DIOSTA alabapäkuy.

Nishqanta cäsukuq kar payta alabapäkuy.

21 TAYTA DIOSTA sirviq y munashqanta ruraq angilkuna, payta alabapäkuy.

22 Lapan kamashqankuna, maytsaychöpis payta alabapäkuy.

Paytami lapan shonqüwan noqapis alabashaq.*