Esdras
Altarta sharkarkatsir Tayta Diosta adorayta qalaykärishqan
3 Unay aylunkunapa markankunacho tashpannami Israel runakunaqa tsay yarpayla Jerusalénman juntakarqan. Tsay karqan chayashqan wata qanchis kaq killachömi.* * 2 Tsaymi Josadacpa tsurin Jesúa y Salatielpa tsurin Zorobabel Tayta Diospaq *altarta rurayta qalaykatsirqan. Paykunatami yanaparqan Jesúapa aylun cürakuna y Zorobabelpa aylunkuna. Tayta Diosta sirviq *Moisés qelqashqan leykunacho nishqannömi sacrificiukunata rupatsipäkunanpaq altarta rurapäkurqan.* 3 Vecïnun marka runakuna atacananta mantsakurpis nawpata kashqalanchömi altarta ruratsirqan. Tsaychömi tutapapis y tardipapis TAYTA DIOSPAQ sacrificiukunata rupatsipäkurqan.*
4 *Ramäda fiestatapis* leykunacho nishqannömi rurapäkurqan. Tsay fiestachömi aykata rupatsinanpaqpis leykunacho nishqanno cada junaq sacrificiukunata rupatsipäkurqan. 5 Fiesta rurayta usharkurnami TAYTA DIOS mandashqannöla sacrificiukunata waran waran rupatsipäkurqan. Lulu killachöpis y fiestakunachöpis sacrificiukunata rupatsipäkurqanmi.* Runakuna voluntäninpita apamushqantapis TAYTA DIOSPAQMI altarcho rupatsipäkurqan. 6 Qanchis kaq killa qalaykunan junaqpita patsami TAYTA DIOSPAQ sacrificiukunata rupatsiyta qalaykärirqan. Tsayno rupatsipäkurqan templuta sharkatsinanpaq cimientuta manaraq churarmi.
Templuta sharkatsiyta qalaykushqan
7 Tsaypitanami templuta sharkatsinanpaq albañilkunata y carpintërukunata pägapäkurqan. Tiro y Sidón runakunatapis mikuyta, aceitita y vïnuta pägapäkuptinmi lamarlapa Líbano nacionpita Jope markayaq cedru qeruta apapämurqan. Israel runakuna lapanta rurapäkurqan Persia nacionpa mandaqnin rey Ciro mandashqannölami. 8 Tsaynöpami Salatielpa tsurin Zorobabel y Josadacpa tsurin Jesúa Diospa templunta sharkatsiyta qalaykärirqan. Paykunatami yanaparqan cüra mayinkuna, *levitakuna y Babiloniapita Jerusalénman lapan chayamuq runakuna. Tsayno sharkatsiyta qalaykärirqan Jerusalénman chayamushqanpita juk watata cumplirkur ishkay killachömi.
Levitakunatanami ishkay chunka (20) watayuqpita janaman kaqkunata churarqan TAYTA DIOSPA templunta aruptin capataz kananpaq. 9 Tsay capatazkunami karqan Jesúa, Cadmiel, tsurinkuna y aylunkuna. Paykunaqa Hodavíaspita miraqkunami karqan. Tsaynölami paykunata yanaparqan Henadadpita miraqkuna.
10 TAYTA DIOSPA templunta aruqkuna cimientuta perqayta qalaykuptin cürakuna chayarqan *sagrädu sotänan jatishqa y *cornëtan aptashqami. Tsaynölami levitakuna churanakurqan platïllunkunata tukar TAYTA DIOSTA alabananpaq. Tsay levitakunaqa karqan Asafpita miraq runakunami. Paykuna churanakurqan Israel runakunapa mandaqnin rey David ordenashqannömi.* 11 TAYTA DIOSTA agradëcikurmi alabapäkurqan kayno nir:
“¡TAYTA DIOSQA alilata ruraqmi!
¡Kuyapäkuyninqa Israel runakunapaq manami imaypis ushakantsu!”*
Tsayno nirmi cimientuta churar kushikushpan lapan runakuna TAYTA DIOSTA alabapäkurqan.
12 Tsaycho kaykaq atska cürakuna, levitakuna y mayor runakunami awkinna kar yarparaykarqan unay kaq templu imano kashqantapis. Paykunaqa mushuq templuta sharkatsinanpaq cimientu churashqanta rikashpanmi punta kaq templupaq yarparkur fiyupa waqapäkurqan. Wakinnami cimientuta churapäkuptin pasaypa kushikärirqan. 13 Tsayno taluypa talur qaparpaptinmi runakunaqa mana tantiyarqantsu mayqan runakuna kushikuypita qaparpaykashqanta ni mayqan runakuna lakikur waqarkaykashqantapis. Tsayno büllata rurashqanqa karuyaqmi mayakarqan.