Hageo
1 Kaychömi qelqaraykan TAYTA DIOSPA wilakuyninta profëta Hageo wilakushqan. Paymi rey Darío Persia nacioncho mandar ishkay watamanna aywaykaptin soqta kaq killa punta kaq junaqcho wilakurqan.* Tsay wilakushqan karqan Judápa gobernadornin Zorobabelpaq y mandaq cüra Josuépaqmi. Zorobabel karqan Salatielpa tsurin y Josuénami karqan Josadacpa tsurin.*
2 Lapanta mandaq TAYTA DIOSMI Israel runakunata kayno nin: “Qamkunaqa kaynömi nirkaykanki: ‘TAYTA DIOSPA templunta yapay sharkatsinantsipaq manaraqmi tiempu chayamunraqtsu’ ”.
3 Tsaymi TAYTA DIOSPA wilakuyninta profëtan Hageo wilakur kayno nirqan: 4 “¿Templü juchutsishqa kaykaqta rikaykarku qamkuna kuyaylapaq entablashqa wayikikunacho kushishqa tarkaykanki?”
5 Lapanta mandaq TAYTA DIOS kaynömi nin:
“Imano kawarkaykashqaykitapis shumaq yarpachakäriy.
6 Atskata mururpis walkalatami shuntapäkunki.
Tsayjina mikurpis manami saksapäkunkitsu.
Yakuta upurpis manami yamapäkunkitsu*.
Raktata jatikurpis manami qoñütsikärinkitsu.
Arupakur gänashqaykipis manami aypäpakuntsu”.
7 Lapanta mandaq TAYTA DIOS kaynömi nin:
“Imano kawarkaykashqaykitapis shumaq tantiyakäriy.
8 Templuta yapay sharkatsinaykipaq muntikunapita qeruta apapäkamuy.
Templuta sharkatsiptiki kushikushaqmi.
Tsaychömi kushishqa alabapäkamankipaq.
9 “Murushqayki shumaq wayunanpaq kashqanta yarparpis walkalatami shuntapäkunki.
Wayikikunaman pirwakushqaykitapis juk pükaylami elqätsï.
Tantiyakäriy imanir tsayno rurashqätapis.
Tsayno rurä templü juchutsishqa kaykaqta rikaykarpis kikikikunapa wayilaykipaq yarpachakäriptikimi.
10 Tsayno kapäkuptikimi mana tamyatsimütsu.
Tsaymi chakraykikunacho mikuynikikunapis mana wayunnatsu.*
11 Fiyupa usya kananpaq noqami kamakätsishqä.
Tsaymi trïgupis, üvapis, olïvupis, ni imayka mikuypis mana wayunnatsu.
Uywakunapaqpis qewa manami kannatsu.
Runakunapis manakaqlapaqmi arupäkun”.
Templuta sharkatsiyta qalaykärishqan
12 Profëta Hageo wilakushqanta mayarmi Salatielpa tsurin Zorobabel, Josadacpa tsurin mandaq cüra Josué y lapan runakuna *mantsakashpan TAYTA DIOS nishqanta cäsukärirqan. 13 Tsawraqa profëta Hageuwan wilakatsir Judá runakunata TAYTA DIOS kayno nirqan: “Noqaqa yanapanäpaq qamkunawanmi kaykä”.
14 Tsayno nirmi paykunata TAYTA DIOS shakyätsirqan arupäkunanpaq. Tsaymi Judápa gobernadornin Zorobabel, mandaq cüra Josué y wakin runakunapis lapanta mandaq TAYTA DIOSPA templunta sharkatsiyta qalaykärirqan.* 15 Aruyta qalaykärirqan soqta kaq killa ishkay chunka chusku (24) junaqchömi.* Tsay karqan rey Darío ishkay wata mandaq kaykaptinmi.*