Job
33 “Job, kananqa nishqätapis shumaq mayamay.
Lapan anyapashqätapis shumaq chaskikuy.
2 Shumaq tantiyakuykurmi rimashaq.
3 Lapan shonqüwanmi rasun kaqlata tantiyatsishayki.
Lapan yarpashqäkunatami nishayki.
4 Lapanpaq munayniyuq Tayta Dios kamamar jämayta qomashqa kaykaptinqa tantiyatsishqäta shumaq mayamay.
5 Noqaqa listumi kaykä qamwan parlanäpaq.
Tantiyarqa nishqäta contestamanki.
6 “Qampis y noqapis Tayta Diospaqqa iwalmi kaykantsi.
Ishkantsipis alpapita kamashqami kaykantsi.
7 Tsayno kaykaptinqa ama mantsakamaytsu.
Nishqäkunaqa manami jaqayänaykipaqtsu kaykan.
8 “Noqa mayashqämi kayno nir rimashqaykita:
9 ‘Noqaqa jutsaynaq runami kä.
Imatapis lutantaqa manami rurashqätsu’.
10 “Tsaynöpis kaynömi nishqanki:
‘Lutanta mana ruraykaptïpis Tayta Diosmi castigaykäman.
Noqataqa rikaykäman contran runatanömi.
11 Chakïtapis cadinawan watashqatanömi tsararaykäman.
Imano kawashqätapis rikaykämanmi’.
12 “Manami yarpashqaykinötsu Tayta Dios kaykan.
Lapan runakunapitapis Tayta Dios mas yachaq kaykaptinqa 13 imanir castigashushqaykita mana tantiyatsishuptikipis ama jaqayaytsu.
14 Tayta Diosqa mana tantiyakuptintsipis tukuynöpami yarpashqanta tantiyatsimantsi.
15 Cämantsicho punushqantsi hörapis tantiyatsimantsi, 16 parlapämantsi y anyapämantsimi.
17 Tsayno anyapämantsi jutsa ruraykunata kacharinantsipaq,
mana yachaq tukunantsipaq
18 y wanuypita salvakunantsipaqmi.
19 “Aybësisqa qeshyakunawan castigamashpantsimi tulu choqchuywanpis jitarätsimantsi.
20 Tsayno qeshyarmi mikuypa gustuntapis mana tarintsitsu.
Mayjina ali mikuypis gustuynaqmi kaykan.
21 Qeshyar jitararqa pasaypami tsakintsi.
Tsaymi custillantsipis yupariylapaq rikakun.
22 Tsayno kaptintsimi wayralana apaykämantsi.
Wanuy wanuylatanami rikaykantsipis.
23 “Tsayno qeshyaptintsi waranqa (1,000) *angilkunapita juk angil-lapis kuyapämashpantsi favornintsi sharkuptin alimi kanman.
24 Wanuypita salvamänantsipaq Tayta Diosta tsay ángel päguta apar ruwakuptinqa 25 Tayta Dios aliyätsimäshunmi.
Aliyätsimaptintsiqa mözu kashqantsimannömi kutirkushun.
Cuerpuntsipis wamra kashqantsimannömi kutirkunqa.
26 Tsaynölami manakushqantsikunatapis Tayta Dios awnimäshun.
Nawpata yanapamashqantsinömi yapay yanapamäshun.
Tsaymi Tayta Diospa qaqlanta rikaqno pasaypa kushikushun.
27 “Tsayno aliyätsimaptintsiqa runakunapa nawpanchömi kayno nishun:
‘Lutankunata rurarmi jutsata rurashqä.
Tsayno kaptïpis manami jutsäman tuputsu Tayta Dios castigamashqa.
28 Wanuypita salvamaptinmi atsikyaq patsata rikar kushikü’.
29 “Tsaynömi Tayta Diosqa yaparir yaparir qeshyashqantsipita aliyätsimantsi.
30 Wanuypita tsayno salvamaptintsimi kawayta tarintsi.
31 “Nishqäta shumaq mayamay, Job.
32 Imalatapis nimänaykipaq kaptinqa kanan nimay.
Nimashqayki ali kaptinqa chaskikushaqmi.
33 Nimänaykipaq mana kaptinqa upälala mayamay.
Tantiyakuq kanaykipaq noqami yachatsishayki”.