Isaías
Contrankunata Tayta Dios ushakätsishqan
63 Edomcho kaykaq Bosra markapita ¿pitaq aywaykämun?
¿Pitaq puka röpan jatishqa munayniyuq aywaykämun?
“Noqa Tayta Diosmi aywaykämü.
Noqami qamkunata salvanäpaq wilakuykä.
Salvanäpaq munayniyuqmi kaykä”.
2 ¿Imanirtaq üva jaruq runapa röpanno röpayki pukayashqa kaykan?
3 “Üvata jaruqnömi conträkunata kikilä ushakätsishqä.*
Manami pipis yanapamashqatsu.
Fiyupa rabyashqa jaruqnömi chipyaq ushakätsishqä.
Tsaymi yawarnin pilchimaptin röpäpis yawarlana kaykan.*
4 Unaypitanami yarparqä tsayno ushakätsinäpaq kashqanta.
Höra chayamushqanami kuyashqä runakunata salvanäpaq.
5 Wakpa kaypa rikachakurpis yanapamänanpaq manami pitapis rikashqätsu.
Pipis mana kaptinmi espantashqa rikakushqä.
Pasaypa rabyakurmi conträkunata kikilä ushakätsishqä.*
6 Rabyakurmi markakunata ushakätsishqä.
Pasaypa rabyarmi chipyaq castigashqä.
Yawarnintapis yakutanömi mashtashqä”.*
Israel runakunata Tayta Dios kuyapashqan
7 TAYTA DIOS kuyakuq kashqanta imaypis wilakushaqmi.
Noqantsi rayku imaykatapis rurashqanpitami TAYTA DIOSTA agradëcikü.
Kuyapäkuq kashpanmi Israel runakuna kaptintsi imaypis yanapamantsi.
8 Unay ayluntsikunapaqmi Tayta Dios kayno nirqan:
“Paykunaqa kaykan kuyashqä runakunami.
Wamräkuna kashpanmi imaypis cäsukamanqa”.
Tsayno nishpanmi imaykapitapis salvarqan.
9 Paykuna nakaptinmi Tayta Diospa shonqunpis fiyupa nanarqan.
Nakashqankunapita kikinmi salvarqan.*
Pasaypa kuyashpanmi marqakurkur apaqno imaypis yanaparqan.
10 Tsayno yanapaykaptinpis Tayta Diosta mana cäsurmi Espíritu Santunta pasaypa lakikatsirqan.
Tsaymi Tayta Dios rabyakushpan paykunapa contran rikakur fiyupa castigarqan.*
11 Tsayno castigaptinmi yarpapäkurqan Moisés kawashqan witsan Tayta Dios imano salvashqantapis.
Tsaymi kayno nipäkurqan:
“¿Maytaq Tayta Dios?
Paymi uysha mitsikuqtano Moisésta churarqan ayluntsikunata rikananpaq.
Kuyashqan runakuna kaptinmi lamarpa pasatsimurqan.
Tayta Diospa Santu Espïritunmi Moisésta yanaparqan.
Kananqa ¿maychötaq Tayta Dios kaykan?
12 Paymi munayninwan Moisésta pushamurqan.
Lamartapis munayninwanmi ishkayman rakirqan.
Tsayno rurashqanta manami imaypis qonqashuntsu.*
13 Fiyu nänipa cawalluta pasatsiqnömi kuyashqan runakunata lamar chawpinpa pasatsimurqan.
14 Ali qewaman wäkakunata qatiqnömi TAYTA DIOSPA Espïritunpis ali kawapäkunanpaq kaqman pushamurqan.
Kuyashqan runakunata tsayno pushamuptinmi Tayta Dios pasaypa munayniyuq kashqanta pïmaypis musyapäkurqan”.*
Yanapananpaq Tayta Diosta manakushqan
15 Tayta Dios, chipchipyaykaq *sagrädu jana patsacho taykashqaykipita rikaykalämuy.
Pasaypa kuyakuq y munayniyuq kaykarqa ¿imanirtaq noqakunata mana yanapaykamankitsu?
¿Imanirtaq shonquykipis chukruyäkurishqa?
Kuyakuq kashqayki ¿ushakashqanaku?
¿Pasaypanaku qonqaykamashqanki?
16 Abrahampis y Jacobpis aylun kashqäta ñëgapäkamaptinpis noqakunapa papänïqa qammi kaykanki.
Unaypita patsami salvamaqnï kaykanki.
17 TAYTA DIOS, ¿imanirtaq lutanta rurapäkunäpaq kachariykamashqanki?
¿Imanirtaq qamta mana *mantsakunäpaq shonqütapis chukruyätsishqanki?
Sirvishuqniki wamraykikuna kaykaptïqa kuyapaykalämay.
18 Kuyashqayki *santu runakuna kaykarpis walka watalami qomashqayki nacioncho täpäkushqä.
Mana respitaypami templuykimanpis conträkuna lutala yaykapäkushqa.
19 Tsaymi imaypis mana kaykaqno ni jutikita imaypis mana joqariqno karkaykä.