Job

30 “Kananqa kayno kaykaqta rikamar mözukunapis asipämanmi.

Paykunapa taytankunataqa manami churämantsu uysha täpaq alquta qaranalanpaqpis.

 2 Paykunaqa aruypaqpis pasaypa qelami.

Paykunaman yärakurqa waktsami käman karqan.

3 “Tsay asipäkuqkunaqa mikunanpaq imapis mana kaptinmi chunyaq jirkakunapa mikuy ashiq aywapäkun.

 4 Muntikunapa aywaykurmi asqaq jachakunata shuntan mikupäkunanpaq.

Hasta retämapa sapinkunalatami mikupäkunpis.

5 “Paykunataqa marka mayinkunapis qarqurqanmi.

Qarqushpanmi suwa runakunatano qayaparqan.

 6 Tsaymi paykunaqa machaykunalacho, raqrakunalacho y qaqa uchkunkunalacho tarkaykan.

 7 Shiraka rurinkunaman pakakuykurmi waqapäkun.

Munti rurinkunalamanmi juntakan.

 8 Paykunaqa fiyu runakunami karkaykan.

Imapaqpis manami välintsu.

Tsaymi markanpitapis qarqapäkushqa.

9 “Tsayno karkaykarmi kananqa noqata asipäman.

Asikunalanpaqmi jutïtapis joqarkärin.

10 Pasaypa melanämashpanmi noqapita witikärin.

Tsaynöpis qaqlämanmi toqapäman.

11 “Tayta Dios castigamaptinmi washäkunäpaq kalpäpis mana kannatsu.

Runakunapis manami respitamannatsu.

12 Atska shuntakaykurmi wanutsimänanpaq atacarkaykäman.

Tsarimayta munarmi trampatapis churapäman.

13 Imata rurayta munaptïpis tsapatami churapäman.

Manami pïnïpis kantsu favornï sharkunanpaq.

14 “Corralta juchuratsir yaykuqnömi noqaman qaparparraq shapäkamun.

15 Tsaymi fiyupa mantsakashqa kaykä.

Tsayno rurapäkaman pipis mana respitamaptinmi.

Lapan imaykäkunapis pukutaynömi elqakäkushqa.

16 “Wanuypis janächönami kaykan.

Fiyupa lakikuylanami imay hörapis tsariman.

17 Tulüyaqraqmi nanaypis chayaykun.

Mana chawaypami tsakaykunapapis nanäman.

18 Kikin Tayta Diosmi kunkäpita aptakaraykäman.

Jämayta kachanätapis manami kachapämantsu.

19 Mituman jitarishqanömi kaykä.

Uchpano y alpanömi kaykä.

20 “Tayta Dios, tsayno karpis qamtami manakaykämü yanapamänaykipaq.

Qamta manakuptïpis manami yanapamankitsu.

Qamta ruwakuptïpis manami kuyapämankitsu.

21 Yanapamänaykipa trukanqa fiyupami chikipaykämanki.

Fiyupa rabyashqami qatikachaykämanki.

22 Tsaymi nakaykunata kachamushqanki löcu wayrano ushamänanpaq.

23 Musyämi wanuyman apaykämashqaykita.

Lapan runa wanushqannölami noqapis wanushaq.

24 “Noqaqa waktsakunatapis yanapashqämi.

Fiyupa lakikuptinpis shakyätsishqämi.

25 Nakaqkunata rikaykurmi kuyapar waqaq kä.

Muchuqkunatapis kuyapaqmi kä.

26 Tsayno karmi yarparqä imaypis mana nakanäpaq kashqanta.

Tsayno yarparpis pasaypami nakaykä.

Atskita shuyararpis tsakaychönömi kaykä.

27 “Shonqüpis pasaypami ushakaykan.

Fiyupa nakaylachömi kaykäpis.

28 Lantuycho kaykaqnömi fiyupa lakishqa qoyarkü.

Tsaymi runakuna juntakashqancho manakü pilapis yanapamänanpaq.

29 Ämun oqrashqa alqunömi kaykä.

Tsaynöpis munticho tukunömi japalä kaykä.

30 Qaräkunapis yanayarmi ismur shikwaykan.

Shanariywanmi intëru cuerpüpis rupapaykan.

31 Arpäpis pinkullüpis lakiy lakiylatami waqan”.