Deuteronomio
Cäsukuqkunata Tayta Dios yanapananpaq nishqan
30 “Kanan musyapäkunkinami cäsukäriptiki TAYTA DIOS bendicionta qoshunaykipaq kashqanta y mana cäsukäriptiki maldicionashunaykipaq kashqanta. TAYTA DIOS maytsay nacionman qarqushuptiki jutsaykikunata kacharir 2 kanan nishqäkunata lapan shonquykiwan y lapan voluntänikiwan qamkunapis y tsurikikunapis TAYTA DIOSTA cäsukäriptikiqa 3 maytsay nacionpitapis kuyapäshushpaykimi shuntapäkamushunkipaq. 4 Mayjina karu nacioncho kaptikipis kutitsipäkamushunkipaqmi. 5 TAYTA DIOS unay ayluntsikunata entregashqan nacionman kutitsimushuptikimi tsaycho yapay tankipaq. Tsaycho tashpaykimi unay ayluntsikunapitapis mas ali kawapäkushpayki paykunapita mas atskaman mirapäkunkipaq.
6 “Tsaychömi shonquykita y tsurikikunapa shonqunta TAYTA DIOS señalanqa* lapan shonquykiwan y lapan voluntänikiwan paylatana *kuyashpayki ali kawapäkunaykipaq.* 7 Qamkuna ali kawaptikipis chikishuqnikita y contraykitaqa TAYTA DIOS kay nishqä lapan maldicionkunawanmi castiganqapaq. 8 Tsaypitanami TAYTA DIOSTA yapay cäsukur kanan junaq tantiyatsishqä mandamientukunata lapanta cumplipäkunkipaq.
9 “Tsawraqa tsurikikunaman, uywaykikunaman, chakraykikunaman y lapan arushqaykikunamanpis TAYTA DIOSMI bendicionninta churamunqa. Unay ayluntsikunata yanapar kushikushqannölami qamkunata yanapashushpaykipis kushikunqapaq. 10 TAYTA DIOS tsayno yanapashunkipaq payta cäsukur kay röllucho qelqaraykaq mandamientunkunata y estatütunkunata lapan shonquykiwan y lapan voluntänikiwan cumplipäkuptikimi.
Ali kawayta o mana ali kawayta akrapäkunanpaq nishqan
11 “Kanan junaq tantiyatsishqä mandamientukunaqa manami aläpa sasatsu kaykan tantiyapäkunaykipaq ni cumplipäkunaykipaqpis. 12 Tsayno kaykaptinqa ama kayno nipäkunkitsu: ‘¿Piraq jana patsaman witsarkur apamunqa wilapämaptintsi cumplinantsipaq?’ 13 Tsaynöpis ama kayno nipäkuytsu: ‘¿Piraq lamarpa jukaq kuchunman aywarkur apamunqa wilapämaptintsi cumplinantsipaq?’ 14 Tsaypa trukanqa Tayta Diospa wilakuyninta cumplipäkunaykipaq shimikicho y shonquykichömi kaykan.*
15 “Qamkunata tantiyatsishqänami ali kawapäkunaykipaq kaqta y mana ali kawapäkunaykipaq kaqtapis. Kanan shumaq yarpachakäriy mayqantapis akrapäkunaykipaq. 16 Kanan junaqmi qamkunata niykä TAYTA DIOSTA *kuyar y munashqanno kawar lapan mandamientunkunata, estatütunkunata y yachatsikuyninkunata cäsukur kawapäkunaykipaq. Tsayno kawarqa TAYTA DIOS qoykushunaykipaq kaykaq nacionman yaykuptiki bendicionnintami churamunqa atskaman mirapäkunaykipaq y ali kawapäkunaykipaq.
17 “Kanan tantiyatsishqäkunata mana cumplir wakin dioskunata adorar qonqurpakuptikiqa 18 kuyapaypaqmi ushakankipaq. Jordán mayuta tsimparkur posisionta chaskirpis manami atska wata tsaycho tankipaqtsu.
19 “Bendicionta chaskir ali kawapäkunaykipaq kaqta o maldicionashqa kar mana ali kawapäkunaykipaq kaqta kanan junaq akrapäkuy. Kanan akrapäkushqaykitaqa jana patsapis y kay patsapis testïgumi kaykan. Tsayno kaykaptinqa qamkuna y qamkunapita miraqkunapis ali kawapäkunaykipaq kaqta akrapäkuy. 20 TAYTA DIOSTA kuyar pay nishqankunata cäsukäriy. Payta cäsukurqa alimi kawapäkunkipaq. Tsaynöpami Abrahamta,* Isaacta* y Jacobta* promitishqan nacioncho tashpayki atska wata kawapäkunkipaq”.