Isaías
Tayta Diosla salvakuq kashqan
43 Jacobpita miraq Israel runakuna, kamashuqniki TAYTA DIOS kaynömi nin:
“Ama mantsakäriytsu.
Kikïpa kaptikimi jutikikunapa qayar qamkunata salvashqä.
2 Hondu mayukunata tsimpaptikipis qamkunawanmi kaykäshaq.
Mayjina cargashqa karpis manami apashunkipaqtsu.
Nina chawpinpa pasaptikipis manami rupashunkipaqtsu.
Manami qashpaylapis qashpashunkipaqtsu.
3 “Noqami kä salvashuqniki TAYTA DIOS.
Israel runakunapa *santu Diosninmi kä.
Qamkunata salvamurmi Egipto runakunata castigarqä.
Tsaynöpis Etiopía y Seba nación runakunatami qamkunapa trukayki nakananpaq churarqä.
4 Qamkunata pasaypami kuyä.
Imaykapitapis masmi välipäkunki.
Tsaymi qamkunapa trukayki wanunanpaq juk nación runakunata churarqä.
5 “Qamkunawan kaykaptïqa ama mantsakäriytsu.
Inti jeqamunan kaq lädupitami kutitsimushayki.
Inti jeqanan kaq lädupitapis shuntamushaykimi.
6 Nortitapis y surtapis kaynömi nishaq:
‘¡Wamräkunata ama tsararäkuytsu!
¡Mayjina karucho tsarararpis olqutapis warmitapis kutitsimuy!
7 ¡Noqata adoramaqkunata lapanta kutitsimuy!
Munashqäno kawar alabamänanpaqmi paykunata kamashqä.
Kikïmi paykunata kamashqä’.
8 “Kuyashqä runakuna, qaprano karpis, upano karpis shapäkamuy.
9 Maytsay nacionkunacho y markakunacho taq runakuna, lapayki shapäkamuy.
Mä nipäkamay: Adorashqayki mayqan ïdulupis ima pasananpaq kashqanta ¿wilakushqatsuraq?
Wilakushqa kaptinqa testïgukuna mä nipäkutsun.
Tsay ïdulukuna wilakushqanta mä pilapis rimakutsun”.
10 Kuyashqan runakunata TAYTA DIOS kaynömi nin:
“Qamkunaqa testïgükunami karkaykanki.
Akrashqä sirvimaqnïkunami karkaykanki.
Qamkunata akrashqä *reqimänaykipaq, yärakamänaykipaq y japalä Dios kashqäta musyapäkunaykipaqmi.
Imaypitapis noqalami Dios kä.
Noqapita mas juk Diosqa manami kantsu.
11 “Noqami TAYTA DIOS kä.
Noqapita mas manami pipis salvakuq kantsu.*
12 Salvanäpaq kashqanta wilakatsir salvashqämi.
Juk nacionkunapa diosnin manami imaypis salvashushqankitsu.
Japalä Dios kashqätami testïgu karkaykanki.
13 “Imaypitapis noqalami Dios kaykä.
Makïpita manami pipis qeshpintsu.
Imata ruraptïpis manami pipis tsapata churapämantsu”.
14 Salvashuqniki kar Israel runakunapa santu TAYTA DIOSNINMI kayno nishunki:
“Qamkunata salvashunaykipaqmi soldädukunata Babiloniaman kachashaq.
Tsay soldädukuna atacaptinmi Babilonia* runakunaqa yärakushqan *büquinkunaman witsarkur aywakärinqa.
15 Noqaqa santu TAYTA DIOSNIKIMI kaykä.
Israel nacionta kamashqa karmi mandaqniki rey kaykä.
16 “Noqaqa TAYTA DIOSMI kaykä.
Lamar chawpinpami nänita rurarqä.
Pulchaqyaykaq yaku chawpinpami cällitano rurarqä.*
17 Nirkurmi atska carrëtankunawan y cawallunkunawan Israel runakunata qatipämuq soldädukunata ushakätsirqä.
Ushakätsiptï manami imaypis kawarimushqatsu.
Atski upiqnömi lapanpis elqashqa.
18 “Kananqa unay pasashqan kaqkunata amana yarparaynatsu.
19 Noqaqa mushuqtanami rurashaq.
Manaraqpis aykälatami salvashaq.
¡Tantiyakäriy! ¡Qalaykushqänami!
Salvarmi nacionninman chunyaq tsaki jirka nänipa kutitsimushaq.
Imapis mana kashqan tsaki jirkachömi mayukunata yuritsishaq.
20 “Tsaymi jirka uywakunapis agradëcikamanqa.
*Chacalkunapis y *avestruzkunapis kushishqami alabapäkamanqa.
Akrashqä runakuna upunanpaqmi tsaki jirkacho mayukunata yuritsishaq.*
21 Tsay runakunata kikïpaqmi rurarqä.
Alabamänanpaqmi paykunata kamarqä.
22 “Jacobpita miraq Israel runakuna, yanapanäpaq manami manakamashqankitsu.
Mana cäsumashpaykimi kachariykamashqanki.
23 Manami tsaki mikuy ofrendata apamunaykipaq obligashqätsu.
Inciensuwan qoshtatsinaykipaq manakurpis manami ajayätsishqätsu.
Sacrificiupaq uywakunata apamurpis manami shonqüpaqnötsu apapäkamushqanki.
24 Manami ali asyaq* yöratapis rantipämashqankitsu ni uywakunapa wirantapis rupatsipämashqankitsu.
Tsaypa trukanqa jutsata rurashpaykimi pasaypa ajayätsimashqanki.
Mana alikunata rurashpaykimi fiyupa rabyanätsimashqanki.
25 “Tsayno kaptikipis qamkunata kuyashpämi lapan jutsa rurashqaykita perdonashayki.
Perdonarkurqa manami imaypis yarpäshaqnatsu.
26 Imalapitapis noqapita jaqayashqa karqa mä nimay.
Jutsaynaq kashqaykita yarparqa mä nimay.
27 Unay ayluyki Jacobpis jutsata rurashqami.
Yachatsishuqnikikunapis manami cäsukamashqatsu.
28 Tsaymi cüraykikunatapis templüpita qarqushqä.
Qamkunata castigaptïmi pïmaypis manakaqman churaykäshunki”.