Mateo
Jesústa Satanás tentayta munashqan
4 Tsaypitanami Jesústa Espíritu Santu chunyaq jirkaman pusharqan diablu tentananpaq.* 2 Tsaycho chusku chunka (40) junaq y chusku chunka paqas ayunashqa kaptinmi Jesústa wanunayparaq mikanay tsarikuykurqan. 3 Tsaymi diablu chayaykur kayno nirqan: “Diospa Tsurin kaykarqa mä kay rumikunata tantaman tikratsiy”.
4 Tsayno niptinmi Jesús kayno nirqan: “Tayta Diospa palabrancho kaynömi qelqaraykan: ‘Manami tantata mikulartsu runa kawan, sinöqa Tayta Dios lapan nishqankunata cäsukurmi kawan’ ”.*
5 Tsaypitanami *sagrädu Jerusalén markaman Jesústa diablu pusharqan. Tsaychönami templupa altunnin kaq puntanman ichiykatsir 6 kayno nirqan: “Diospa Tsurin karqa mä kaypita jeqay. Diospa palabrancho kaynömi qelqaraykan: ‘*Angilninkunatami Tayta Dios kachamunqa imapitapis tsapäshunaykipaq. Paykunami tsarishunki chakilaykitapis rumikunaman mana takakunaykipaq’ ”.*
7 Niptinmi Jesús kayno nirqan: “Tsaynöpis Tayta Diospa palabrancho kaynömi qelqaraykan: ‘Tayta Diosta ama tentankitsu’ ”.*
8 Tsaypitanami altunnin puntaman diablu pushaykur maytsay nacionkunata y riquëzankunata rikatsir 9 nirqan: “Qonqurpaykur adoramaptikiqa lapan rikashqaykikunatami qoykushayki”.
10 Tsaymi Jesús kayno nirqan: “¡Witikuy, *Satanás! Tayta Diospa palabrancho kaynömi qelqaraykan: ‘Tayta Dioslata adorapäkunki. Pay japalanta sirvipäkunki’ ”.*
11 Tsayno niptinmi diablu aywakurqan. Tsaypitami angilkuna chayaykur Jesústa yanaparqan.
Galileacho wilakuyta Jesús qalaykushqan
12 Carcilcho Juan wichqaraykashqanta mayaykurmi* Galileaman Jesús kutirqan. 13 Nazaret markacho tänanpa trukanqa Capernaúm markamannami aywarqan tsaycho tänanpaq. Tsay marka karqan Galilea qocha kuchuncho, Zabulón y Neftalí trïbu runakuna tashqan kaqchömi. 14 Capernaúmcho Jesús taykarmi profëta Isaías kayno wilakushqanta cumplirqan:
15 “Zabulón trïbu y Neftalí trïbu runakuna,
qamkuna tashqaykipami lamar kuchunpa y Jordán mayu wak tsimpanpa näni pasaykan.
Mana Israel runakunapis qamkuna tashqaykicho atskaqmi tarkaykan.
16 Tsakäpakushqano kawarpis atsikyaqta rikaqnömi salvashuqnikita rikapäkunkipaq.
Yanawyaykaqchöno kawapäkuptikipis salvashuqnikiqa atskinömi kanqa”.*
17 Capernaúmcho tashpanmi wilakuyta qalaykur Jesús kayno nirqan: “¡Tayta Dios *mandaykashqan chayamushqanami! ¡Jutsa ruraykunata kacharir Tayta Dios munashqannöna kawapäkuy!”*
Discïpulun kananpaq pescädu tsariqkunata Jesús qayashqan
18 Galilea qocha kuchunpa aywaykashqanchömi Jesús rikarqan ishkay runakunata. Pescädu tsariq karmi redninta yakuman mashtarkaykarqan. Paykunaqa karqan Simón y wawqin Andrésmi. Simónpa jukaq jutinmi karqan Pedro. 19 Paykunatami Jesús kayno nirqan: “Qatirämay. Noqami yachatsishayki runakunata pescanaykipaq”.
20 Tsayno niptinmi redninkunata kachariykushpan Jesúswan aywakärirqan.
21 Tsaypita mas wak lädupa aywarkaykashqanchönami rikarqan Santiaguta y wawqin Juanta. Paykunaqa taytan Zebedeuwanmi *büquincho redninkunata altsarkaykarqan. Paykunapis Jesús qayaptinmi 22 taytanta y büquita kachariykur jukla aywapäkurqan.
Qeshyaqkunata Jesús aliyätsishqan
23 Intëru Galileapa Jesús purirmi Tayta Dios *mandaykashqanpa ali wilakuyninta *sinagögakunacho yachatsirqan y tukuy niraq qeshyawan qeshyaqkunata aliyätsirqan.* 24 Tsaytami Siria nación markakunachöpis musyapäkurqan. Tsaymi paykunapis Jesús kaqman apapäkurqan tukuy niraq qeshyawan qeshyaykaqkunata, *supay nakatsishqan runakunata, wanuy qeshyawan nakaqkunata y pulan cuerpun wanushqa runakunatapis. Tsay qeshyaqkunata lapantami Jesús aliyätsirqan.
25 Tsaytsika runakunami Jesústa qatirparqan. Tsay runakuna karqan Galileapita, Decápolispita, Jerusalénpita, Judeapita y Jordán mayu wak tsimpanpitami.