Salmos

5 (2) TAYTA DIOS, manakamushqäta wiyaykalämay.

Shonqulächo ruwakamuptïpis mayaykalämay.

 2 (3) Lakikur manakamushqäta cäsuykalämay.

Qammi mandamaqnï rey y Diosnï kaykanki.

Qamlatami imaypis manakushayki.

 3 (4) Tsaka tsakalami qamta manakamü.

Patsa waras waraslami* qamta ruwakamü.

Manakamushqäta contestamänaykitami shuyaraykä.

 4 (5) Runakuna mana alita ruraptin manami kushikunkitsu, Tayta.

Jutsa ruraq runakunataqa manami nawpaykimanpis chaskinkitsu.

 5 (6) Orgullösu kaqkunataqa rikaytapis manami munankitsu.

Lutan ruraq runakunataqa chikinkimi.

 6 (7) Lulakuqkunataqa ushakätsinkimi.

Sakyapakuq runakunata y wanutsikuq runakunataqa manami chaskinkitsu.

 7 (8) Noqatami itsanqa kuyapäkuq kar wayikiman yaykamunäpaq chaskimanki.

*Sagrädu templuyki nawpanpa rikäramur lapan shonqüwanmi adorashayki.

 8 (9) Alilata ruraq kar conträ runakunapita tsapaykalämay, TAYTA DIOS.

Munashqaykino kawanäpaq ali nänipa pushaykalämay.*

 9 (10) Chikimaqnïkunaqa manami rasun kaqta imaypis parlantsu.

Shonqunchöpis jutsa ruraylapaqmi rapipa rapiykan.

Shiminpis kicharaykaq sepultüranömi kaykan.

Lulakunanpaqqa mamalan wachashqami karkaykan.*

10 (11) Paykunata castigaykulay, Tayta Dios.

Yarpachakushqankunatapis manakaqman churaykulay.

Paykunaqa contraykimi rikakushqa.

Mana wanakuypa* jutsata rurashqanpita manakushuptikipis ama cäsupaytsu.

11 (12) Qamman yärakamuqkunaqa kushikäritsun.

Ali rikashqaykipita imaypis alabaykuläshunki.

*Kuyashuqnikikunaqa imaypis kushishqa kawapäkutsun.

12 (13) TAYTA DIOS, qam munashqaykino kawaq runakunamanmi bendicionnikita churamunki.

Paykunata kuyashpaykimi escüduno kaykanki.