1 Corintios
Ofrendata shuntananpaq nishqan
16 Jerusaléncho kaq wawqi panikunapaq ofrendata shuntarqa* Galacia provinciacho wawqi panikunata yätsishqänöla qamkunapis shuntapäkuy. 2 Semäna arur gänashqaykipita cada domingu cada ünuyki aykalatapis churapäkunki. Ama noqa chayamuptïraqqa shuntarkaykankitsu. 3 Shuntashqayki ofrendata Jerusalénman apananpaq wawqikunata akrapäkuy. Chaykamurnami paykunapaq cartata rurashaq Jerusalénman apaptin wawqi panikuna chaskikärinanpaq. 4 Kamakaptinqa noqapis paykunawanmi aywashaq.
May maypa aywananpaq Pablo wilashqan
5 Qamkuna kaqman kutimur Macedonia provinciaparaqmi tumamushaq.* 6 Chaykamurqa capazmi tamya killa pasananyaq qamkunawan qoyäshaq. Tsaypitanami wakin markakunamanpis aywanäpaq yanapamanki. 7 Manami pasädalaqa qamkunata watukuyta munätsu, sinöqa Tayta Dios munaptin qamkuna kaqcho täshaqraqmi.
8 Éfesuchömi itsanqa *Pentecostés fiesta chayamunanyaq täshaq. 9 Atska runakuna conträ sharkuptinpis Tayta Dios yanapaykämanmi kay markakunacho ali wilakuyninta wilakunäpaq. Tsayno wilakuptïmi Jesucristuta chaskikurkaykan.*
10 Wawqintsi Timoteo qamkuna kaqman chayamuptin kushishqa chaskikäriy. Paypis noqanömi Jesucristupa wilakuyninta wilakuykan.* 11 Paytaqa manakaqman ama churapäkuytsu. Ali kutimunanpaq yanapaykulay. Noqakunapis kaycho kaq wawqi panikunawan payta shuyarpaykämi.
12 Qamkuna kaqman wakin wawqikuna shamuptinmi Apolustapis ruwakurqä qamkunaman shamunanpaq. Tsayno ruwakuykaptïpis manami shamuyta kamäpakuntsu. Nirkurraqmi capaz shamunqapaq.
Carta ushanan
13 Imapitapis alcäbula kapäkuy. Imano nakarpis Tayta Diosman yärakäriy. Imatapis mana mantsakuypa Tayta Dios munashqanno kawapäkuy. 14 Pïmaywanpis kuyanakur shumaq kawapäkuy.
15 Wawqi panikuna, musyapäkunkimi Acaya provinciacho wawqintsi Estéfanas aylunkunawan* Jesucristuta puntata chaskikärishqanta. Paykunami wawqi panikunata imachöpis yanaparkaykan. 16 Tsaymi qamkunata ruwakü paykunata cäsukärinaykipaq. Tsaynöla lapantapis paykunano yanapashuqnikikunata y yachatsishuqnikikunata cäsukäriy.
17 Estéfanas, Fortunato y Acaico qamkuna kaqpita watukamaq chayamuptin lapaykita rikaqnöraqmi kushikushqä. 18 Qamkunata shakyätsishushqaykinölami noqakunatapis shakyätsimashqa. Paykunata y paykunano kaqkunata shumaq respitapäkunki.
19 Asia provinciacho kaykaq wawqi panikunapis qamkunapaq salüdunta apatsikamunmi. Tsaynöpis Aquila y Priscila* y wayincho juntakaq wawqi panikunapis qamkunapaq salüdunta apatsikamunmi. 20 Lapan wawqi panikunami salüduta apatsikamun. Jukniki juknikipis qaqlaykicho mutsanakushpayki winchinakäriy.
21 Noqa Pablo kikïmi kay salüdütaqa qelqaykämü.
22 Pipis Jesucristuta mana kuyaq kaqtaqa Tayta Dios castiganqami. ¡Señor Jesucristo, juklana kutikalämuy!
23 Señor Jesucristo yanapaykuläshunki imaypis ali kawapäkunaykipaq. 24 Jesucristuman yärakuq mayï kaptikimi lapaykita kuyä. [Amén.]