1 Pedro
Mayor wawqikunapaq tantiyatsishqan
5 *Mayor wawqikuna, noqapis qamkunano mayor wawqimi kaykä. Tsaynöpis Jesucristo nakashqankunata kikïmi rikashqä. Jesucristo kutimur lapantsitami shuntamäshunpaq. Tsaymi qamkunata kayno tantiyatsï: 2 Tayta Diosman yärakuqkunata rikanaykipaq churaykäshuptikiqa uysha mitsiq uyshankunata rikashqanno shumaq rikapäkuy.* Qelanaykälar rikanaykipa trukanqa lapan voluntänikiwan rikapäkuy. Ama qellay raykula rikapäkunkitsu, sinöqa Tayta Dios munashqanno kushi kushila rikapäkunki.
3 Fiyu patronnöqa wawqi panikunata ama makitsakärinkitsu. Tsaypa trukanqa paykuna rikakushunaykipaq ali kawapäkuy. 4 Tsayno kawapäkurmi pastorkunapa pastornin Jesucristo* kutimuptin imayyaqpis mana ushakaq corönata chaskipäkunkipaq.
Tayta Diospa makincho imano kawanantsipaq yätsishqan
5 Mözukuna y jipashkuna, *mayor wawqikunata cäsukäriy. Lapaykipis mana yachaq tukuylapa respitanakäriy. Yachaq tukuqkunataqa Tayta Dios manami yanapantsu. Humildi kaqkunatami itsanqa kuyapar yanapan.* 6 Tsayno kaykaptinqa munayniyuq Tayta Diosta cäsukur mana yachaq tukuypa kawapäkuy. Paymi tiempun chayamuptin respitashqa kanaykipaq churapäkushunkipaq.* 7 Tayta Dios yanapaykäshuptikiqa lapan lakikuynikikunata paypa makinman kachaykäriy.*
8 Shumaq tantiyakushpayki alcäbula kawapäkuy. Chikimaqnintsi diabluqa mikanashqa leonnömi qaparar puriykan pitapis jutsata ruratsinanpaq. 9 Yärakuq mayintsikuna maytsaychöpis qamkunano nakaykashqanta musyaykarqa Tayta Diosman yärakur diabluta ichipay.
10 Noqantsi rayku Jesucristo wanushqa kaptinmi kuyapäkuq Tayta Dios qayamashqantsi gloriacho imayyaqpis kawanantsipaq. Tsaymi kay patsacho nakaptintsipis Tayta Dios yanapamäshun jutsata mana ruranantsipaq, pay munashqanno kawanantsipaq y payman shumaq yärakunantsipaq. 11 ¡Tayta Dios lapanpaq munayniyuq kashqanpita imaypis alabashqa kaykulätsun! Amén.
Carta ushanan
12 Wawqintsi Silvanuwanmi* kay cartata qelqaykätsimü. Payqa Tayta Dios munashqannömi imaypis kawaykan. Kay cartata qamkunapaq apaykätsimü Tayta Dios kuyapaykäshushqaykita tantiyapäkunaykipaqmi. Mana ajayaypa imaypis payman yärakäriy.
13 Babiloniacho* kaykaq wawqi panikunami salüdunkunata apatsikamun. Paykunatapis qamkunatapis Tayta Diosmi akrashushqanki. Tsaynömi kuyashqä wawqi Marcuspis* salüdunta apatsikamun.
14 Jukniki juknikipis wamayänakur qaqlaykikunacho mutsanakushpayki winchinakärinki. Jesucristucho kaqkunapaqqa lapaykipaq ali kaway kaykulätsun. [Amén.]