1 Corintios
Mana tantiyashqan idiömapita yätsishqan
14 Tsayno kaykaptinqa shumaq kuyanakur kawapäkuy. Espíritu Santu habilidäta qoshunaykipaq* Tayta Diosta manakäriy. Tsaypita mas manakäriy wilakuyninta wilakärinaykipaq.
2 Espíritu Santu parlatsishushqayki idiömapa parlarqa manami runakunatatsu parlaparkaykanki, sinöqa Tayta Dioslatami. Espíritu Santu parlatsishuptikipis manami pipis tantiyashunkipaqtsu. 3 Runakuna tantiyashqan idiömapa wilakuptikimi itsanqa lapan nishqaykitapis tantiyar Tayta Dios munashqanno kawapäkunqa, shakyätsinakunqa y yanapanakunqa. 4 Runakuna mana tantiyashqan idiömapa wilakuq kaqqa kikilanmi kushikun. Runakuna tantiyashqan idiömapa wilakuq kaqmi itsanqa Tayta Diosman yärakuqkunata shumaq yachatsipäkun.
5 Noqapitaqa alimi kanman Espíritu Santu parlatsishqan idiömacho lapayki parlapäkuptiki. Tsayno kaptinpis mas alimi kanman runakuna tantiyashqan idiömacho Tayta Diospa wilakuyninta wilakäriptiki. Mana tantiyashqan idiömacho wilakäriptikiqa pilapis kanman tantiyatsinanpaq. Tsayno tantiyatsiq kaptinqa alimi kanman juk idiömacho wilakäriptikipis.
6 Wawqi panikuna, shumaq tantiyakäriy. Watukuq shamur mana tantiyashqayki idiömacho yachatsiptï ¿yachakärinkimantsuraq? Tantiyashqayki idiömacho yachatsiptïmi itsanqa revelación kaptinpis o yachatsikuy kaptinpis lapanta tantiyar shumaq yachakärinki.
7 Pinkullutapis arpatapis lutala tukaptinqa manami tantiyapäkuntsitsu imata tukaykashqantapis. 8 Tsaynöpis *cornëtata lutala tukaptinqa soldädukunapis pelyaman aywananpaq manami kamarikärintsu. 9 Tsaynölami kanqa mana tantiyashqan idiömacho wilakäriptiki. Imata nishqaykitapis mana tantiyar manami imatapis yachakärinqatsu. Tsayno wilakurqa manakaqlapaqmi wilakurkaykanki.
10 Musyashqantsinöpis kay patsachöqa atskami idiömakuna kaykan. Runakuna tantiyashqan idiömacho parlapaptintsiqa pipis tantiyanmi. 11 Tsayno kaptinpis mana tantiyashqä idiömacho parlapämaq runaqa juk lädu nación runanömi noqapaq kanqa y noqapis juk lädu nación runanömi paypaq kashaq. 12 Tsaynölami qamkunapaqpis wilakuptiki kaykan. Tsaymi Espíritu Santu habilidäta qoshunaykita munarqa wawqi panikunata tantiyashqan idiömacho shumaq yachatsinaykipaq payta manakäriy. 13 Tsaynöla mana tantiyashqan idiömacho wilakurqa Tayta Diosta manakäriy wilakushqaykita tantiyatsinanpaq.
14 Espíritu Santu parlatsimaptin mana tantiyashqä idiömacho Tayta Diosta manakur kushikurpis manami tantiyätsu imata niykashqätapis. 15 Tsayno kaptinqa manami Espíritu Santu rimatsimashqan idiömalachötsu manakushaq, sinöqa tantiyashqä idiömachöpis manakushaqmi. Tsaynöpis manami Espíritu Santu parlatsimashqan idiömalachötsu Tayta Diosta alabashaq, sinöqa tantiyashqä idiömachöpis alabashaqmi. 16 Qamkunapis runa mana tantiyashqan idiömalacho Tayta Diosta alabaptikiqa wakin runakuna mana tantiyar qamkunawan manami alabayta kamäpakunqatsu. 17 Lapan shonquykiwan kushishqa alabaptikipis upälalami rikaräshunki.
18 Runa mana tantiyashqan idiömacho parlanäpaq qamkunapita masraq Espíritu Santu yanapamaptinmi Tayta Diosta agradëcikü. 19 Tsayno kaptinpis wawqi panikuna juntakashqancho chunka waranqa (10,000) mana tantiyashqan palabrakunata rimashqäpitapis mas alimi kanqa pitsqa palabralatapis tantiyashqan idiömacho rimaptï.
20 Wawqi panikuna, wamrakuna mana tantiyakuypa yarpashqanno ama yarpapäkuytsu. Tsaypa trukanqa awkis runakunano shumaq tantiyaykur yarpachakäriy. 21 Tayta Diospa leyninchöpis kaynömi qelqaraykan:
“Kay runakunata castigarmi mana tantiyashqan idiömapa parlapäshaq.
Tsayno castigaptïpis manami cäsukamanqatsu.
Noqa Tayta Diosmi tsayno nï”.*
22 Tsay nishqannölami runakuna mana tantiyashqan idiömacho wilakuptintsi Jesucristuman mana yärakuqkuna Tayta Diospa wilakuyninta mana chaskikärinqatsu. Tantiyashqan idiömacho wilakuptintsimi itsanqa Jesucristuta chaskikärinqa. 23 Juntakashqaykicho mana tantiyashqan idiömacho lapayki rimaptiki imanir tsayno parlashqaykita mana musyaq runa o mana criyiq runa yaykur löcuyashqa karkaykashqaykitami yarpanqa. 24 Tantiyashqan idiömacho Diospa wilakuyninta wilakäriptikimi itsanqa yarpachakur jutsayuq kashqanta tantiyakunqa. 25 Tsaymi wilakushqayki shonqunman chayaptin Tayta Dios qamkunawan kaykashqanta tantiyashpan qonqurpakuykur Tayta Diosta adoranqa.
Juntakashqancho imanöpis kananpaq nishqan
26 Tsayno kaptinqa wawqi panikuna, juntakashqaykicho salmukunata cantarpis, Jesucristupa wilakuyninta yachatsirpis, Tayta Dios tantiyatsishushqaykikunata wilakurpis, runakuna mana tantiyashqan idiömacho rimarpis y tsay rimashqanta tantiyatsirpis lapanta rurapäkuy yärakuq mayikikuna Tayta Dios munashqanno kawapäkunanpaq. 27 Mana tantiyashqan idiömakunacho rimarqa juk ishkayla trukanakuypa rimatsun. Tsay rimashqanta juk wawqina tantiyatsitsun. 28 Pilapis tantiyatsinanpaq mana kaptinqa upälakutsun. Rimananpa trukanqa shonqulanchöna Tayta Diosta manakutsun.
29 Tsaynöla juntakashqaykicho Diospa wilakuyninta juk ishkayla wilakäritsun. Mayaqkuna tantiyakutsun lutanta wilakushqanta o rasun kaqta wilakushqantapis. 30 Imatapis wilakunanpaq juk wawqita Tayta Dios tantiyatsiptinqa parlaykaq wawqi upälakutsun jukaq wawqina parlamunanpaq. 31 Tsaynöpami lapaykipis shuyänakuypa wilakärinki lapanpis yachakärinanpaq. 32 Wilakuqkuna imay rimananpaqpis y imay upälakunanpaqpis tantiyanmi. 33 Salvashqan runakuna juntakashqanchöqa Tayta Dios manami desordin kananta munantsu, sinöqa lapanpis shumaq ordenädu kanantami munan.
34 Juntakashqaykicho warmikunaqa upälala kakutsun. Ama parlakutsuntsu.* *Moisés qelqashqan leykunacho nishqannöpis runanpa munaynincho kakutsun. 35 Imatapis musyayta munarqa wayinman kutiykur runanta tapukutsun. Manami alitsu kaykan juntakashqaykicho warmikuna parlaptinqa.
36 ¿Imanirtaq yarparkaykanki qamkuna kaqcho Tayta Diospa palabran qalaykushqanta y qamkunalata wilashushqaykita? 37 Tayta Diospa wilakuqninkuna y Espíritu Santu tantiyatsishqan runakuna kapäkushqaykita yarparqa tantiyakärinkimanmi kay cartacho nishqäkuna Jesucristupa mandamientunkuna kaykashqanta. 38 Kay cartacho nishqäkunata mana chaskikuq kaqtaqa Tayta Dios manami chaskinqatsu.
39 Tsayno kaykaptinqa Tayta Diospa wilakuyninta runakuna tantiyashqan idiömacho wilakäriy. Mana tantiyashqan idiömacho parlaptinpis ama michaytsu. 40 Itsanqa juntakashqaykicho Tayta Dios munashqannöla lapantapis ordenädu rurapäkuy.