Proverbios
29 Anyapashqanta mana chaskikuq runaqa elaqpitami ushakanqa.
2 Ali runa autoridä kaptinqa runakuna kushikärinmi.
Fiyu runa autoridä kaptinmi itsanqa runakuna lakikärin.
3 Tsurin tantiyakuq kaptinqa papänin kushikunmi.
*Wayrapakuq warmiman aywarqa qellaynintami ushan.
4 Rey ali mandaptinqa lapanpis jawkalami kawapäkun.
Imalapitapis impuestuta cobraptinqa runakuna pasaypami pobriyan.
5 Amïgun lutanta ruraptin corriginanpa trukan alabarqa jutsamanmi tuniykätsin.
6 Fiyu runaqa jutsata rurashqanpitami nakan.
Ali runami itsanqa imaypis kushishqa cantar kawan.
7 Ali runaqa waktsakunapa favornin sharkurmi respitatsin.
Fiyu runami itsanqa makitsakushqanta rikarpis mana kuyapantsu.
8 Achaquëru runaqa pïmaytapis achäquita ashiparmi purin.
Tantiyakuq runami itsanqa rabyanaykaqtapis kushitsin.
9 Tantiyakuq runaqa mana tantiyakuq runawan rimanakur manami arreglayta kamäpakunqatsu.
Olqüpaptinpis y ali shimilanpa parlapaptinpis manami chaskikunqatsu.
10 Wanutsikuq runaqa jutsaynaq runakunata pasaypami chikin.
Ali runami itsanqa runa mayinta kuyapan.
11 Mana tantiyakuq runaqa imapitapis lutalami rabyakun.
Tantiyakuq runami itsanqa pacienciakun.
12 Lulakuqkunata chaskipaq autoridäqa lapan yanapaqninkunatapis fiyu kaytami yachatsin.
13 Nakaqpis y nakatsiqpis Tayta Diospitami kawayta chaskin.*
14 Waktsakunata kuyapaq reytaqa manami pipis mandaq kashqanpita jorqunqatsu.
15 Wamraqa astaptinraqmi tantiyakuq kayta yachakun.
Awilan ashmashqa wamraqa mamanta penqaymanmi churan.
16 Diosta mana cäsukuq runakuna atska kaptinqa jutsa ruraykuna maytsaychöpis kaykanmi.
Tsay runakunata desgracia pasashqantami ali runakuna rikapäkunqa.
17 Tsurikita corrigirqa jawkalami kawankipaq.
Ali kawaptinqa kushikunkipaqmi.
18 Diospa wilakuyninta mana cäsukurqa runakuna mana alimi kawapäkun.
Tayta Diospa leyninkunata cäsukurmi itsanqa ali kawapäkun.
19 Ashmay lutanta ruraptinqa regorpa corriginki.
Ali shimilaykipa tantiyatsiptikiqa manami cäsushunkipaqtsu.
20 Lutala imatapis rimaq runapitaqa mana tantiyakuq runalapis mas yärakuypaqmi kaykan.*
21 Ashmaynikita wamra kashqanpita shumaq mana ashmarqa wara warantinkuna waqarmi purinkipaq.
22 Imalapitapis rabyaq runaqa piwanpis tinkuypami tinkun.
Achäquita ashiq runaqa imaypis jutsa ruraymanmi tunin.
23 Orgullösu runataqa pïmaypis penqapanqami.
Humildi runatami itsanqa pïmaypis respitanqa.*
24 Suwapa cumpinchin runaqa wilakunanpaq mayjina juratsiptinpis manami wilakuntsu.
Musyaykar mana wilakushqanpitami castiganqapaq.
25 Mantsa mantsala puriq runaqa mana alimanmi chayan.
TAYTA DIOSMAN yärakuqkunami itsanqa jawka kawapäkun.
26 Pïmaypis munapäkun mandaqnin yanapanantami.
Tsayno kaptinpis TAYTA DIOSRAQMI ali arreglan.
27 Diosta cäsukuq runaqa jutsata ruraqkunawan manami juntakantsu.
Jutsa ruraq runaqa ali runakunata pasaypami rabyapan.