1 Samuel
Saúlpita David qeshpikushqan
21 (2) Tsaypitana Nob markapa aywar David chayarqan Ahimelec cüra kaqman.* Chayaykuptinmi Davidta rikaykur Ahimelec mantsakashpan kayno nirqan: “¿Imataq kashqa? ¿Imanirtaq japalayki shamushqanki?”
2 (3) Tsaymi David kayno nirqan: “Rey Saúlmi kachamashqa pitapis mana wilapaylapa yarpashqankunata ruranäpaq. Yanapamaq runakunawan juk läducho tinkunäpaqmi jitapänakushqä. 3 (4) ¿Imalaqa kaykanku mikurkunäpaq? Pitsqa tantalatapis o imalatapis qaraykalämay, tayta”.
4 (5) Tsayno niptinmi cüra Ahimelecqa kayno nirqan: “Común tantaqa manami kantsu. Tayta Diospaq churashqä tantalami kaykan.* Shuyäshunaykipaq jitapashqayki runakuna warminwan mana punushqa kaptinqa tsay tantata qarashayki”.*
5 (6) Niptin David kayno nirqan: “Imaypis guërraman aywapäkunäpaq kaptinqa manami warmiwan punupäkütsu. Kananpis manami warmiwan punupäkushqätsu. Tsaymi yanaqämaq runakunapis *püru karkaykan”.
6 (7) Tsayno niptinmi común tanta mana kaptin TAYTA DIOSPAQ churashqan tantakunata cüraqa aptaparqan.* Tsay aptapashqan tantakunaqa tsay junaqraqmi trukatsishqa karqan tsayraq masarashqa tantakunawan.
7 (8) Tsaychömi Edom nacionpita kaq Doeg jutiyuq runa Diosta manakur kaykarqan. Payqa Saúlpa uysha mitsiqninkunapa capatazninmi karqan.
8 (9) Nirkurmi Ahimelecta David kayno nirqan: “¿Kaykanku lanzayki o espädayki manamänaykipaq? Rey Saúl elaqpita kachamaptinmi tiempü mana kashqatsu espädata ni armäta apamunäpaqpis”.
9 (10) Tsayno niptin cüra kayno nirqan: “Ela pampacho filisteo runata wanutsishqayki Goliatpa espädalanmi kaycho kaykan.* Tsaytaqa *efod qepancho capötïwan pitushqatami churaraykätsï. Munashpaykiqa tsayta apay. Tsaypita mastaqa ima armatapis manami tsararätsu”.
Tsayno niptin David kayno nirqan: “Tsayta qoykalämay, tayta. Tsaymanqa manami ima espädapis tinkuntsu”.
10 (11) Tsay junaqmi Saúlpita qeshpir David aywakurqan Gat markapa mandaqnin rey Aquisman.* 11 (12) Tsayman David chayaykuptinmi Aquispa capitanninkuna kayno nirqan: “¡Payqa kaykan Israel runakunapa mandaqnin rey Davidmi! ¿Manaku paypaq kushikushpan kayno nir cantapäkurqan: ‘Waranqa (1,000) runakunatami Saúl wanutsishqa. Davidmi itsanqa chunka waranqa (10,000) runakunata wanutsishqa’?”*
12 (13) Tsayno rimashqankunata musyaykurmi David mantsakurqan Gat markapa mandaqnin rey Aquista.* 13 (14) Tsaymi pasaypa löcu tukushpan* wayi punkukunacho imaykatapis lutala aspikachar qelqarqan. Tsaynöpis shapran jananpami lawsan aywarqan.
14 (15) Tsawraqa capitanninkunata rey Aquis kayno nirqan: “¿Imapaqtaq löcu runata kayman pushamushqanki? 15 (16) Löcukunaqa kay markantsichöpis kaykanchaq. ¿Imapaqtaq kay löcu runata wayïman pushamushqanki?”