Génesis
30 Raquelqa wawata mana tarirmi nanan Leata chikirqan. Tsaymi Jacobta kayno nirqan: “Wawata mana taritsimaptikiqa ¿imapaqtaq kawashaqpis?”
2 Tsayno niptinmi Jacob fiyupa rabyakur Raquelta kayno nirqan: “Tsayno nimänaykipaqqa ¿acäsu Diosku imami kaykä? Paychari destinashushqanki qoluq kanaykipaqqa”.
3 Tsawraqa Raquel kayno nirqan: “Ashmaynï Bilhawan punuy. Paycho tsuriki yurirqa kikï wachakushqänömi kanqa. Tsaynöpami wawayuq kashaqpaq”.
4 Tsayno nishpanmi ashmaynin Bilhawan punutsirqan. 5 Tsaymi Bilha wacharqan Jacobpa tsurinta. 6 Tsawraqa Raquel kayno nirqan: “Wawayuq kanäpaq manakushqäta Tayta Dios mayamashqami. Tsaymi favorëcimaptin wawayuqna kaykä”.
Tsayno nirmi wamrapa jutinta churaparqan Dan* jutin kananpaq.
7 Tsaypita yapaymi Jacobpa tsurinta Bilha wacharqan. 8 Tsawraqa Raquel kayno nirqan: “Wawä mana kashqanpita nanäwan pasaypami chikinakushqä. Kananqa kikïpapis wawä kannami”.
Tsayno nirmi wamrapa jutinta churaparqan Neftalí* jutin kananpaq.
9 Leapis wawata mana tarirnami ashmaynin Zilpata Jacobwan punutsirqan. 10 Tsaypita Zilpapis wacharqan Jacobpa tsurinta. 11 Tsawraqa Lea kayno nirqan: “Suertiyuqmi kaykä”.
Tsayno nirmi wamrapa jutinta churaparqan Gad* jutin kananpaq.
12 Tsaypita yapaymi Zilpa wacharqan Jacobpa tsurinta. 13 Tsaymi Lea kayno nirqan: “Noqa pasaypami kushikü. Kananpitaqa lapan warmikunapis pasaypa kushishqa kaykashqätami ninqa”.
Tsayno nirmi wamrapa jutinta churaparqan Aser* jutin kananpaq.
14 Tsaypita trïgu cosëcha witsanmi Rubén aywarqan chakrapa. Tsaychömi tarimurqan mandrágora nishqan jachapa wayuynin frütakunata.* Tsay jachapa wayuyninkunatami maman Leapaq aparqan. Tsayta rikaykurmi Raquelqa Leata kayno nirqan: “Wawayki apamushqan juk ishkay mandrägoraykita manakuläshayki”.
15 Tsayno niptinmi Lea kayno nirqan: “¡Yawarnikipis kanraqku shamunaykipaq! ¿Runäta qechurkamarpis wawä apamushqan mandrägorataraqku munaykanki?”
Tsawraqa Raquel nirqan: “Wawayki apamushqan mandrägorata qaramaptikiqa* kanan tsakay qamwanchari Jacob pununqa”.
16 Tsawraqa tsay tardi chakrapita Jacob kutiykämuptinmi tariparkur Lea kayno nirqan: “Kanan tsakay noqawan pununaykipaqmi wawäpa mandrägoranta pägakushqä”.
Tsayno niptinmi tsay tsakay Leawan Jacob punurqan. 17 Lea manakushqanta Tayta Dios mayaptinmi yapay wacharqan Jacobpa tsurinta. Tsay wamrawanqa Leapa wawankuna pitsqanami karqan. 18 Tsawraqa Lea kayno nirqan: “Ashmaynïwan runäta punutsishqäpitami* Tayta Dios kay premiuta qomashqa”.
Tsayno nirmi wamrapa jutinta churaparqan Isacar* jutin kananpaq.
19 Tsaypitana Lea yapay wacharqan Jacobpa tsurinta. Tsaywanqa soqtanami wawan karqan. 20 Tsawraqa Lea kayno nirqan: “Tayta Diosmi kay wamrata qaraykamashqa. Soqtatana tsurinta wachaykaptïqa noqatanami runä mas kuyamanqa”.
Tsayno nirmi wamrapa jutinta churaparqan Zabulón* jutin kananpaq. 21 Tsaypitanami Leapa wawan mas jukpis karqan. Tsay wawan warmi kaptinmi jutinta churaparqan Dina jutin kananpaq.
22 Tsaynölami Raqueltapis Tayta Dios kuyaparqan. Tsaymi manakushqanta mayar wawayuq kananpaq destinarqan. 23 Qechpa kaq wawan yuriykuptinmi Raquel kayno nirqan: “Qoluq kashqäpita runakuna mana jamurpämänanpaqmi Tayta Dios wawata taritsimashqa. 24 TAYTA DIOS munaykulätsun yapaypis wawata tarinäpaq”.
Tsayno nirmi tsay wamrapa jutinta churaparqan José* jutin kananpaq.
Jacob rïcuyashqan
25 Joséta Raquel wachaykuptinnami Labánta Jacob kayno nirqan: “Kananqa markäman kutikuläshaqna, papä. 26 Rikashqaykinöpis lapan voluntänïwanmi tsurikikunapaq arupashqä. Kananqa kutikunäpaq warmïkunata y tsurïkunata kachapaykalämayna”.
27 Tsayno niptinmi Labán kayno nirqan: “¡Ama kutikuytsu! Kaylacho täkushun, hïju. Tantiyakushqämi qam arupämaptiki TAYTA DIOS bendicionninta qomashqanta. 28 Aykata gänayta munashqaykitapis wilamay. Tsawraqa manamashqaykitami pägashayki”.
29 Tsaymi Jacob kayno nirqan: “Musyankimi uywaykikunata imano rikashqätapis. 30 Chayamushqäpita patsami TAYTA DIOS bendicionninta churamushqa walkalapita uywaykikuna atskaman mirananpaq. Qamlapaq arurqa ¿imaynataq kikïkunapaq arukushaq?”
31 Tsayno niptinpis Labán yapay kayno nirqan: “Aykata gänayta munashqaykitapis wilamay”.
Tsawraqa Jacob kayno nirqan: “Ama imatapis pägamaytsu. Itsanqa uyshaykita y cabraykita mitsipänäta munarqa nishqäta awnimay. 32 Uysha kunchaman yaykuykur kanan akramushaq yana muru uyshakunata, muru muru uyshakunata y yana uysha malwakunatapis. Tsaynöpis akramushaq muru muru cabrakunata y alqa cabrakunata. Tsaykunalami pägü kanqapaq. 33 Tsaynöpami akrashqä uywakunata imaypis rikaq shamur musyankipaq mana suwapashqäta. Noqapa uywäkuna kaykashqanchöqa alqa y muru murulami cabrakuna kanqa. Uyshäkunapis yanalami kanqa. Suwapashqa kaptïqa juk colorkuna kaykaqtami tarinkipaq”.
34 Tsayno niptinmi Labán kayno nirqan: “Nishqaykino katsun”.
35 Tsayno awniykarpis tsay junaqlami Labán rakikurirqan yana uyshakunata y yoraqniyuq chïvukunata y cabrakunata. Tsaymi alqa chïvukunata, muru muru chïvukunata, alqa cabrakunata y muru muru cabrakunata rakikurirqan. Nirkurmi tsay uywakunata tsurinkuna kaqman paytakurqan. 36 Tsay rakishqan uywakunata qatikurkur Jacob taykashqan kaqpita kimsa junaq aywaytami aywakärirqan. Jacobnami Labánpa wakin kaq uyshankunata y cabrankunata mitsirqan.
37 Tsaypitanami Jacob palarqan álamupa, avellänupa y castäñupa lulu rämankunata. Nirkurna tsay rämakunapa qarankunata seprarqan räya räya rikakänanpaq. 38 Tsayno seprashqan rämakunatanami churaparqan uywakuna yakuta upunan kaqman. Tsaychömi yaku upuq yaykur seprashqan rämakunapa nawpancho tsarikuq.* 39 Tsay seprashqan rämakunapa nawpancho tsarikuptinmi malwakuna yuriq alqa, yana muru y tawlish. 40 Tsay yuriqkunatami Jacobqa rakirqan kikinpaq. Nirkurmi Labánpa uyshankuna yawananpaq tsay rakishqan uyshakunapa nawpanman qatipaq. Tsaynölami cabrakunatapis qatipaptin yoraqniyuqta wachaq. Uyshakunanami wacharqan yanata. Tsaynöpami Jacobpa uyshankuna y cabrankuna mas mirarqan.
41 Tsaynöpis wera kaq uywakuna tsarikushqan höra yaku upukunaman Jacobqa seprashqan rämakunata churapaq tsarikuptin yawananpaq. 42 Uyu kaq uywakuna tsarikuptinmi itsanqa seprashqan rämakunata mana churapaqtsu. Tsaynöpami uyu kaq uywakunapa wawan yanala yoraqla yurir Labánpaq karqan. Wera kaq uywakunapa wawannami alqa, yana muru y tawlish yurir Jacobpaq karqan. 43 Tsaynöpami uyshankuna y cabrankuna atskaman miraptin Jacob pasaypa rïcuyarqan. *Camëllunkunapis bürrunkunapis tsaytsikami karqan. Tsaynölami ashmayninkuna warmipis olqupis atska karqan.