Hebreos
Moiséspitapis Jesucristo mas munayniyuq kashqan
3 Wawqi panikuna, gloriaman chayapäkunaykipaq Tayta Dios qayaykäshuptikiqa chaskikushqantsi Jesucristo pï kashqantapis shumaq tantiyakäriy. Paymi *apostolnintsi y mandaq cürantsi kaykan. 2 Wayinta* ali rikananpaq Tayta Dios nishqanta Moisés cumplishqannömi* Jesucristupis lapanta cumplirqan. 3 Musyashqantsinöpis wayi kuyaylapaq kaptin manami wayitatsu alabantsi, sinöqa wayi ruraqtami. Tsaynöpis manami Moisésta alabanantsipaqtsu kaykantsi, sinöqa Jesucristuta alabanantsipaqmi. 4 Wayipis albañil sharkatsiptinraqmi kan. Tsaynölami Tayta Dios kamaptinraq lapanpis kaykan.
5 Tayta Diospa wayinta Moisés ali rikarpis ashmaynölami karqan. Tsayno karmi shamuq watakunacho Tayta Dios tantiyatsimänantsipaq kaqkunata qelqarqan. 6 Jesucristumi itsanqa Tayta Diospa Tsurin kar wayipa duëñun kaykan. Payman yärakur nishqankunata imaypis cumplirqa noqantsimi paypa wayin kaykantsi.
Tayta Diosta cäsukur kawanantsipaq yätsishqan
7 Tsaymi Espíritu Santu kayno nishqanta shumaq tantiyakushun:
“Tayta Dios nishqanta kanan junaq mayaykarqa 8 chunyaq jirkacho pruëba kaptin unay ayluykikuna chukru shonqu kashqanno ama kapäkuytsu.
9 Tsaychömi chusku chunka (40) wata yanapashqäta rikaykarpis paykunaqa munashqanta ruratsimayta munarqan.
10 Tsaymi pasaypa rabyar kayno nirqä:
‘Kay runakunaqa oqrakashqanömi karkaykan.
Yätsishqätapis manami chaskikärintsu’.
11 Tsayno rabyarmi kayno nir jurarqä:
‘Paykunaqa promitishqä jamayman manami yaykupäkunqatsu’ ”.*
12 Wawqi panikuna, cuidädu qamkunapis chukru shonqu y mana yärakuq kar imayyaqpis kawaq Tayta Diospita witikärinkiman. 13 Tsaypa trukanqa waran waran jukniki juknikipis shakyätsinakäriy Tayta Dios munashqanno kawapäkunaykipaq. Tsaynöpami jutsa ruray mana engañashuptiki shonquyki mana chukruyanqatsu.
14 Wanunantsiyaq Tayta Diosman yärakur pay munashqanno kawashpantsimi Jesucristo herenciata chaskishqanno noqantsipis herenciata chaskishunpaq. 15 Tayta Diospa palabrancho kaynömi nin: “Tayta Dios nishqanta kanan junaq mayaykarqa unay ayluykikuna chukru shonqu kashqanno ama kapäkuytsu”.*
16 Tantiyakäriy. ¿Pïkunataq Tayta Dios nishqanta mayaykarpis contran sharkapäkurqan? ¿Manaku Egiptupita Moisés jorqamushqan Israel runakuna karqan? 17 ¿Pïkunataq chusku chunka (40) wata Tayta Diosta rabyanätsirqan? ¿Manaku chunyaq jirkacho Tayta Dios ushakätsishqan jutsa ruraq runakuna karqan? 18 ¿Pïkunatataq Tayta Dios jurashpan nirqan promitishqan jamayman mana yaykunanpaq?* ¿Manaku payta mana cäsukuq runakuna karqan? 19 Paykunaqa mana criyishqanpitami yaykupäkurqantsu.