Isaías
Jerusalénta salvananpaq nishqan
62 Jerusalén*, qamta kuyaykarqa manami upälakümantsu.
Tayta Dios munashqanno kawanaykiyaq y contraykikunapita salvashunaykiyaqmi wilapaykäshayki.
Salvashqa karnami patsa waraptin inti atsikyämushqanno kankipaq.
2 Alina kawapäkushqaykita maytsay nación runakunami musyanqa.
Lapan reykunami munayniyuq kashqaykita rikapäkunqa.
Kikin TAYTA DIOSMI mushuq jutita churapäshunkipaq.
3 Rey jatiräkunan corönanömi TAYTA DIOSPA makincho kankipaq.
4 Kacharishqa kashqaykita nishunaykipa trukanqa TAYTA DIOS pasaypa kuyashushqaykitami nishunkipaq.
Tsaynöpis ushakashqa marka kashqaykita nishunaykipa trukanqa Tayta Dioswan casarashqaykitami nishunkipaq.*
5 Jipashwan mözu casarashqannömi Tayta Diospis qamwan casaranqa.
Warminwan runa kushishqa kawashqannömi Tayta Diospis qamwan kushishqa kanqa.
6 Jerusalén, perqaykikuna jananmanmi rikachakuqkunata churashqä.*
Paykunaqa tsakaypa junaqpapis mana chawaypami Tayta Diosta manakärinqa.
TAYTA DIOSTA ruwakuqkuna, ama upälakäriytsu.
7 Jerusalénta altsatsiyta ushananyaq Tayta Diosta ruwakäriy.
Maytsaychöpis runakuna Jerusalénta respitananyaq Tayta Diosta manakäriy.
8 TAYTA DIOS munayniyuq kashpanmi jurar Jerusalén markata kayno nirqan:
“Chikishuqniki runakuna trïguykita apakunanta manami kachapäshaqnatsu.
Nakar rurashqayki vïnuykita juk lädu runakuna upunanpaqpis manami kachapäshaqnatsu.
9 Tsaypa trukanqa shuntashqayki mikuyta kikiki mikurmi alabamankipaq.
Üvapita rurashqayki vïnutapis kikikimi *sagrädu templüpa patiuncho upunkipaq”.
10 ¡Marka punkukunapa yarqapäkuy!
¡Runakuna shamunanpaq nänita altsapäkuy!
¡Nänipita rumikunatapis jitapäkuy!
¡Lapan nación runakuna yaykamunanpaq señalta churapäkuy!
11 Maytsaymanpis wilakatsirmi TAYTA DIOS kayno nirqan:
“Salvadornin chayamunanpaqna kashqanta *Sión runakunata wilapäkuy.
Chayaykamurmi ali kawayman churanqa”.*
12 Kuyashqan runakuna *santu kashqantami nipäkunqa.
TAYTA DIOS salvashqan runakuna kashqantami nipäkunqa.
Jerusaléntanami maypis täkuypaq marka kashqanta nipäkunqa.
Tayta Dios imaypis manana kacharishqan marka kashqantami nipäkunqa.