Bibliapita INTERNETCHO PUBLICACIUNNINCHICUNA

INTERNETCHO PUBLICACIUNNINCHICUNA

Quechua de Huánuco (Huallaga)

Oseas 3
Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Oseas 3:2

*
3.2 Éxo. 21.32; Lev. 27.4.

Oseas 3:5

*
ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
*
mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).

Tayta Diosta mantsakunantsipaq yachakuntsi (Deut. 4.10; 14.23; 17.19; Sal. 34.11). Tayta Diosta mantsakuq runaqa yachaq y tantiyakuqmi kaykan (Job 28.28; Sal. 111.10; Prov. 1.7).

Mushuq Testamentuchöpis Tayta Diosta mantsakunantsipaq kashqanpitami parlan. Tsaychömi niykan payta mantsakuqkunata Tayta Dios kuyapashqanta (Luc. 1.50; Hech. 10.35) y Tayta Diosta mantsakur pay munashqanno kawashqantsita (2Cor. 7.1; 1Ped. 1.17; 2.17). Tsaynöpis niykan Tayta Diosta mantsakuqkuna premiuta chaskinanpaq kashqanta (Apoc. 11.18).

Itsanqa Jesucristuta chaskikur jutsata rurashqantsipita perdonashqana kaykantsi (Rom. 3.23-25; 1Juan 1.9). Tsaymi musyantsi Tayta Dios manana castigamänantsipaq kashqanta (1Juan 4.18) y payta mana mantsakuypa manakunantsipaq kashqanta (Rom. 8.15; Efe. 3.12).

Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Oseas 3:1-5

Oseas

Warminwan Oseas amistashqan

3 TAYTA DIOSMI yapay kayno nimarqan: “Warmiki juk runawan jarukuykäshuptikipis paywan amistakuy. Tsaynöpami Israel runakuna tantiyakärinqa runanta jarukuykaq warmino kaykaptinpis paykunata imaypis kuyashqäta. Paykunataqa juk dioskunapa jutincho päsaslan atipay biscöchuta kushishqa mikapäkuptinpis kuyämi”.

2 Tsayno nimaptinmi warmïwan amistanäpaq pägarqä chunka pitsqa siclo qellayta* y kimsa pachak kimsa chunka (330) kïlu cebädata. 3 Amistarkurnami kayno nirqä: “Kananpitaqa noqalapanami warmï kanki. Juk runawanqa amana puriynatsu. Amistarkurpis manami punushunraqtsu, sinöqa atska junaq pasarkuptinraqmi punushunpaq”.

4 Tsaynömi Israel runakunapapis atska watayaq mana kanqatsu mandaqnin reypis ni autoridäninkunapis. Manami Tayta Diospaq sacrificiutapis rupatsinqatsu ni juk diosta adorar wankatapis ichitsinqatsu. Manami ni cürakunapis ni wayinkunacho ïdulunkunapis kanqatsu. 5 Tsaypitaraqmi Israel runakuna perdonta manakur TAYTA DIOSTA *ashipäkunqapaq. Tsaynölami David aylu mandaqnin reytapis cäsukärinqapaq. Shamuq watakunachömi TAYTA DIOSTA *mantsakur bendicionninta kushishqa chaskipäkunqapaq.