Jeremías
Jukwan jukwan kakuq warmino Jerusalén runakuna kashqan
3 TAYTA DIOSMI kayno nin: “Pï runapis warminwan rakikaptin tsay warmi juk runawan taptinqa ¿punta kaq runanwan yapay kutipänakunmantsuraq?* ¡Manami! ¡Tsayno ruraptinqa lapan nacionmi penqaycho kanqa! Jerusalén runakuna, qamkunapis jukwan jukwan kakuq warmino karmi juk dioskunata adorarkaykanki. ¿Tsayno kaykarku mana penqakuypa noqaman kutimuyta yarparkaykanki?
2 “Jirkakunata maski rikapäkuy. Mayqan lädupa rikaptikipis tsay jirkakunacho juk dioskunatami adorarkaykanki.* Qamkunaqa chunyaq jirkacho kaykaq *wayrapakuq warminömi karkaykanki. Nänipa puriq mözuwan kakunanpaq tsay warmi listu kashqannömi qamkunapis mayqan diosta adoranaykipaqpis listu karkaykanki. Juk dioskunata adorar y jutsata rurarmi nacionnikitapis qanratashqanki. 3 Tsayno kapäkushqaykipitami tamya killa witsanpis ni jachakuna tuktunan witsanpis manana tamyamushqanatsu.
“Pïmaywanpis kakuq warmi penqayniynaq kashqannömi qamkunapis penqayniynaq karkaykanki. 4 Kananqa cäraykicho yawarniynaq karmi kayno nirkaykämanki: ‘Qamqa papänïmi kanki. Wamra kashqäpita patsami yanaqï kashqanki. 5 Amana noqakunapita rabyakuynatsu. Tsaypa trukanqa perdonaykamayna’. Tsayno nir manakaykämarpis jinalami qamkuna jutsata rurarkaykanki”.
Israel nación kashqanno Judá nacionpis kashqan
6 Josías mandaq rey kaykashqan witsanmi* TAYTA DIOS kayno nimarqan: “¿Rikashqankiku mana wiyakuq Israel nación imata rurashqantapis?* Lapan jirkankunacho y copösu yörakunapa sikinkunachöpis noqata qonqaykamar juk dioskunatami adorashqa. Tsayno rurarqa juk warmi runanta kacharir adulteriu jutsata ruraqnömi kaykan.
7 “Tsayno ruraptinpis noqa yarparqä jutsata rurashqa karpis noqaman kutimunanpaq kashqantami. Tsayno yarpaptïpis manami kutimushqatsu. Tsaytaqa rikashqami mana wiyakuq nanan Judá nacionpis.
8 “Noqawan kaykashpan jukwan jukwan imaypis kakushqanpitami Israelta qarqushqä.* Tsaytapis Israelpa mana wiyakuq nanan Judá rikashqami. Rikaykarpis Judáqa mantsakunanpa trukan paypis *wayrapakuq warminömi jukwan jukwan kakushqa. 9 Tsaymi rumipita y qerupita rurashqa ïdulukunata mana penqakuypa adorashqa. Tsayno rurashqanpitami Judá nacionpis pasaypa qanratakashqa kaykan. 10 Noqaman kutimurpis janan shonqulami adoraman. Noqa TAYTA DIOSMI tsayno nï”.
Israel nación runakuna Tayta Diosman kutinanpaq wilakushqan
11 TAYTA DIOSMI kayno nimarqan: “Mana wiyakuq Israel runakunapitapis mas peormi Judá runakuna karkaykan. 12 Norti kaq lädupa rikärir Israel nación runakunata kayno ninki:
“TAYTA DIOSMI kayno nin:
‘¡Mana wiyakuq Israel runakuna, noqaman kutikamuy!
Kutikamuptikiqa kushishqami chaskishayki.
Kuyapäkuq karmi mayjina rabyashqa karpis perdonashayki.
13 Itsanqa conträ sharkur jutsayuq kashqaykita tantiyakäriy.
Qamkunaqa adulteriu jutsata warmi rurashqannömi copösu yörakunapa sikincho juk dioskunata adorarkaykanki.
Noqa TAYTA DIOSMI tsayno nï’ ”.*
14 TAYTA DIOSMI kayno nin: “Mana wiyakuq wamräkuna, noqaman kutipäkamuy. Qamkunaqa noqapami karkaykanki. Kutipäkamuptikiqa cada markapita jukta y cada aylupita ishkaytami *Sióncho tänaykipaq churapäkushayki. 15 Tsaychömi rey kananpaq munashqäno kawaqkunata churapäshayki. Paykunami tantiyakuq y yachaq kashpan shumaq mandashunkipaq”.
16 TAYTA DIOSMI kayno nin: “Tsaycho taptiki tsurikikunapis atskamanmi miranqapaq. Tsaycho *Pactu Babul mana kaptinpis tsay babulpaq manami pipis parlanqanatsu ni watukunqanatsu. Ni juk babulta rurananpaqpis manami yarpanqanatsu.* 17 Tsay witsanmi Jerusalénta nipäkunqa TAYTA DIOSPA trönun kashqanta.*
“Jerusalénmanmi maytsay nacionpitapis runakuna shapäkamunqa adoramänanpaq. Mananami shonqun munashqanno jutsata rurar purinqanatsu.
18 “Tsay witsanmi Israel runakunawan Judá runakuna norti kaq lädu nacioncho tarkaykashqanpita kutipäkamunqa. Ishkan juntakarkurmi unay aylunkunata qoykushqä nacioncho tanqapaq.*
19 “Israel runakuna, qamkunataqa tsurïtano imaypis rikaytami munarqä.
Nacionniki maytsay nacionpita mas ali kanantami munarqä.
Noqaqa yarparqä ‘¡papä!’ nimänaykipaq kashqantami.
Yarparqä imaypis mana qonqamänaykipaq kashqantami.
20 Tsayno kuyaykaptïpis kacharimashqankimi.
Runanta kacharir juk runawan aywakuq warminömi juk dioskunatana adorapäkushqanki.
Noqa TAYTA DIOSMI tsayno nï.
21 “¡Chunyaq jirkakunacho qaparämushqanmi mayakaykämun!
Tsaychömi Israel runakuna waqashpan pilapis kuyapänanpaq manakurkaykan.
Paykunaqa tsayno karkaykan TAYTA DIOSNIN kaykaptï mana cäsukamaypa jutsata rurapäkushqanpitami.
22 “Mana wiyakuq tsurïkuna, ¡noqaman kutipäkamuy!
Kutipäkamuptikiqa mana wiyakuq kashqaykipita perdonashaykimi.
“Tsay witsanmi Israel runakuna kayno nimanqa:
‘Noqakunaqa qammanmi kutikamü, Tayta.
Noqakunapaqa qammi Tayta Diosnï kaykanki.
23 Manakaqlapaqmi jirkankunacho kaykaq *altarkunaman juk dioskunata manakuq aywapäkushqä.
Manakaqlapaqmi puntakunachöpis tsay dioskunapaq fiestata rurapäkushqä.
TAYTA DIOSNILÄ, qamlami noqakunata salvapäkamanki.
24 Mana väliq ïdulukunata penqaypaq adorashqäpitami imaykäkunapis ushakashqa.
Tsaymi wamralaraq karkaykaptï mamä y taytä fabricakushqan uyshankuna, wäkankuna y warmi olqu tsurinkunapis ushakashqa.
25 Unay aylükunapis y kikïkunapis mözu kashqäpita patsami jutsata rurar qamta rabyanätsishqä.
Tsayno kashqäpitami pasaypa penqakushqa uysurpaykä’