2 Corintios
9 Jerusaléncho kaq wawqi panikunapaq ofrendata shuntanaykipaqqa masta tantiyatsinäta manami nistapäkunkinatsu. 2 Musyämi ofrendata shuntayta munapäkushqaykita. Tsaymi Macedonia provincia wawqi panikunata wilarqä qanyan watapita ofrenda shuntayta qalaykärishqaykita. Tsayno wilaptïmi paykunapis shuntarkaykan.
3 Tsaynöpis kaycho kaq wawqi panikunata wilarqä qamkuna kaqman shamuptï ofrendata listulatana shuyätsimänaykipaq kashqanta. Qamkunapaq tsayno parlashqä manakaqlapaq kananta mana munarmi tsay kimsa wawqikunata kachaykämü. 4 Macedoniapita wawqikunawan shamur cuidädu tsayraq shuntaykaqta taripäküman. Shuntashqaykita wilaykaptïpis manaraq shuntaptikiqa noqapaq y qamkunapaqpis penqaypaqmi kanqa. 5 Tsaymi kimsan nawpamunqa shuntäshishunaykipaq. Tsaynöpami shuntanaykipaq nipäkushqaykinöla ofrenda listuna kanqa noqa chayamur apanäpaq. Chayamuptïraq shuntaptikiqa runakuna yarpapäkunqa mana munaykar shuntarkaykashqaykitami.
Yanapakuqkunata Tayta Dios yanapashqan
6 Musyashqantsinöpis walkalata muruq kaqqa walkalatami shuntan. Atskata muruq kaqqa atskatami shuntan. 7 Tsaynöla qamkunapis aykata ofrendanaykipaqpis shumaq yarpachakurir kushishqa ofrendapäkuy. Shonquyki nanaykaptinqa ama ofrendaytsu. Kushishqa ofrendaq kaqtami Tayta Dios kuyan. 8 Kuyashushpaykimi ali kaqkunata imaypis rurapäkunaykipaq munayninwan lapanchöpis yanapashunki. 9 Tayta Diospa palabranchöpis kaynömi qelqaraykan:
“Waktsakunata imaypis yanapanmi.
Alilatami imaypis ruran.
Pïmaypis paytaqa respitanmi”.*
10 Murutapis mikuytapis kamaripämaqnintsi Tayta Dios bendicionninta churaykalämutsun wakintapis kushishqala yanapanaykipaq. 11 Tsaynöpami imapis mana pishïshunkitsu wakinta yanapanaykipaq. Qaraynikikunata chayatsipäkuptïmi Tayta Diosta kushishqala agradëcikärinqa.
12 Tsaynölami ofrendata shuntashqaykita chayatsiptï Jerusaléncho kaq wawqi panikunapis mana pishïpakurna Tayta Diosta kushishqa agradëcikärinqa. 13 Tsaynöpis Jesucristupa ali wilakuyninta cäsukärishqaykita tantiyar Tayta Diosta alabapäkunqa paykunata y wakinkunatapis yanapashqaykipita. 14 Tsaynöpis kuyapäkuq kayninta qamkunaman churamushqanpitami Tayta Dios imaypis yanapashunaykipaq lapan shonqunwan manakärinqa.
15 ¡Tayta Diosta agradëcikushun kuyapäkuq kashqanpita! Tsaypita imanöpapis agradëcikuyta manami kamäpakuntsitsu.