2 Samuel
Panin Tamarta Amnón tsaripakushqan
13 Davidpa tsurin Absalónpami karqan kuyaylapaq panin. Paypa jutinmi karqan Tamar. Davidpa jukaq tsurin Amnónnami payta kuyakurkurqan.* 2 Virginlaraq kaptinmi Tamartaqa imaypis mana kachapäkuqtsu. Tsaymi Amnónqa imanöpapis paninwan punuyta mana kamäpakushpan mikuytapis ni punuytapis mana tarir qeshyarqan.
3 Amnónpa amïgun Jonadabmi astütu mözu karqan. Payqa karqan Davidpa wawqin Simeapa tsurinmi. 4 Tsaypita juk kutichömi Jonadab tapurqan Amnónta kayno nir: “Reypa tsurin kaykarqa ¿imanirtaq waran waran pasaypa almatakashqa puriykanki? Ima pasaykäshushqaykitapis wilamay”.
Tsayno niptinmi Amnón kayno nirqan: “Wawqï Absalónpa panin Tamartami pasaypa kuyakurkushqä”.
5 Tsaymi Jonadab kayno nirqan: “Qeshyaq tukushpayki cämaykicho jitaray. Papäniki watukushuqniki shamuptin kayno ninki: ‘Panï Tamarta kachaykalämuy kay nawpalächo yanukurir qaramänanpaq’ ”.
6 Tsayno yätsiptinmi Amnónqa qeshyaq tukushpan cämancho jitaraykarqan. Tsayman papänin watukuq chayaptinmi Amnón kayno nirqan: “Kayman kachaykalämuy panï Tamarta juk ishkay tortillakunata ankarkur qaramänanpaq”.
7 Tsawraqa Tamarta David kacharqan kayno nir: “Ayway turiki Amnónpa wayinman yanupänaykipaq, hïja”.
8 Tsayno niptin aywarmi turin Amnónta tarirqan cämacho jitaraykaqta. Tsaychömi harinapita tortillata ankaparqan. 9 Nirkurmi mikunanpaq apapaptin turin mikuyta mana munarqantsu. Tsaypa trukanqa tsaycho kaq runakunata kayno nirqan: “Lapayki waqtapa yarqukäriy”.
Yarqukäriptinnami 10 paninta kayno nirqan: “Pununaläman mikuyta apamuy mikatsimänaykipaq”.
Tsayno niptinmi tortilla ankashqanta apaparqan. 11 Apapaptinmi makipita tsarirkur kayno nirqan: “Pani, qamwan punuytami munaykä”.
12 Tsayno niptin Tamar kayno nirqan: “¡Ama penqayman churamaytsu, turi! Israel nacionchöqa tsayno penqakuypaq jutsata manami rurapäkuntsu. Tsayno rurarqa pasaypa jutsayuqchari rikakunkipaq. 13 Desonraykamaptikiqa penqapaypaqmi kashaq. Qamtapis kay Israel nacioncho mana ali runatanömi rikapäkushunkipaq. Noqawan tayta munarqa papänintsita ruwakuy tänantsipaq. Ruwakuptikiqa awnishunkipaqmi”.
14 Tsayno ruwakuptinpis turin Amnónqa mana mayaq tukuypami mas kalpayuq kashpan jukla tsaripakurqan. 15 Tsaripakurkurnami Amnónqa Tamarta pasaypa chikishpan kuyashqantapis qonqakuykurqan. Tsaymi kayno nirqan: “¡Kaypita jukla aywakuy!”
16 Tsayno niptinmi Tamar kayno nirqan: “Perdicionta rurarkamar wayikipita ama qarqaykalämaytsu. Qarqamarqa tsaripakamashqaykipitapis mas peormi jutsayuq kankipaq”.
Tsayno niptinpis Amnónqa manami cäsuparqantsu. 17 Tsaypa trukanqa ashmayninta qayaykur kayno nirqan: “Kay jipashta qarqurir punkuta trancarkuy”.
18 Tsayno niptinmi Amnónpa ashmayninqa jipashta qarqurir punkuta trancarqan.
Tsay witsanqa costumbrin kashqannömi reykunapa tsurin virgen jipashkuna kuyaylapaq tünicata jatikäriq. Tsaymi Tamarpis kuyaylapaq tünican jatishqa kaykarqan. 19 Pasaypa lakikushpanmi jatirashqan tünicanta rachir ushashpan umanman uchpata winakurqan. Nirkurmi umanta tsarirkur waqaraykar aywakurqan.
20 Tsaymi turin Absalón kayno nirqan: “¿Rasunpaku turiki Amnón tsaripakushushqanki? Tsayno rurashushqaykipita ama lakikuytsu. Turiki kaykaptinqa tsaylachöna usharätsun”.
Tsaypita patsami pasaypa penqaytukushqa turin Absalónpa wayilancho Tamar tarqan.
21 Tamarta Amnón tsaripakushqanta musyaykurmi rey David pasaypa rabyakurqan. Tsayno rabyakurpis qechpa tsurin kaptinmi kuyashpan Amnónta mana olqüparqantsu. 22 Absalónpis wawqin Amnónta manami imatapis nirqantsu, panin Tamarta tsaripakushqanpita pasaypa nanapararpis.
Amnónta Absalón wanutsishqan
23 Tsaypita ishkay wata pasarkuptinna Absalónqa Baal-hazorcho uyshankunata rututsir mikuyta ruratsirqan. Tsayqa Efraín trïbu runakuna tashqan nawpanchömi karqan. Tsaymanmi wawqinkunata qayatsirqan lapan juntakaykur mikupäkunanpaq. 24 Tsaymi Absalónqa papänin rey Davidman aywaykur kayno nirqan: “Kanan milwa rutuycho kashqäyaq yanapashuqniki runakunawan shaykalämuy imalatapis mikapakunantsipaq, papä”.
25 Tsawraqa rey David kayno nirqan: “Lapantsi aywaptintsiqa aläpami gastuta ruranki, hïju”.
Yaparir yaparir Absalón ruwakuptinpis manami awnirqantsu. Tsaypa trukanqa lapanpis ali kananpaqmi bendicionninta qorqan.
26 Tsawraqa Absalón kayno nirqan: “Aywayta mana munarqa wawqï Amnónlatapis kachaykalämuy”.
Tsayno niptin rey David kayno nirqan: “¿Imanirtaq pay aywananta munaykanki?”
27 Tsayno niptinpis Absalón yaparir yaparir ruwakuptin rey David awnirqan tsurin Amnón y wakin tsurinkunapis aywananpaq.
Tsaypita kutiykur Absalónqa tsaytsika ali ali mikuyta yanukatsirqan reypaqnöraq. 28 Puntatanami ashmayninkunata Absalón kayno nirqan: “Vïnuta upur Amnón shinkashqa kaykashqan hörami wanutsinaykipaq nishayki. Wanutsinaykipaq niptï mana mantsakuypa jukla wanutsinki”.
29 Tsaymi Absalónpa ashmayninkunaqa patronnin nishqannöla Amnónta wanutsipäkurqan. Wanuykatsiptinmi rey Davidpa wakin kaq tsurinkuna mulanta muntakurkur qeshpir aywakärirqan.
30 Manaraq chayaptinmi Davidta juk runa kayno nir wilarqan: “Lapan tsurikikunatashi Absalón wanutsishqa. Manashi ni juklaylapis qeshpishqatsu”.
31 Tsayno wilaptinmi pasaypa lakikushpan Davidqa röpanta rachirir pampaman jitakakuykurqan. Tsaynölami yanapaqninkunapis lakikushpan röpanta rachipäkurqan.
32 Tsayta rikaykur Davidpa wawqin Simeapa tsurin Jonadab kayno nirqan: “Ama yarpaytsu lapan tsurikikunata wanutsishqanta. Amnónlatami Absalón wanuratsishqa. Panin Tamarta tsaripakushqanpita patsami payta wanutsinanpaq Absalón juraykarqan. 33 Ama criyiytsu lapan tsurikikunata wanutsishqanta nishuptiki, tayta. Tsuriki Amnónlatami wanutsishqa”.
34 Absalónnami qeshpir aywakurqan.
Tsaypitanami Jerusalén marka täpaq runa rikachakuykashqancho rikarqan atska runakuna tsimpapa uraykämuqta. Tsawraqa rey Davidman aywaykur kayno nirqan: “Tsaytsika runakunami Bet-horón markaman aywaq nänipa aywaykämun”.
35 Tsaymi rey Davidta Jonadab kayno nirqan: “¿Manaku nirqä tsurikikuna mana wanushqanta?”
36 Tsayno rimaykaptinmi Davidpa tsurinkuna chayaykur lapan waqapäkurqan wawqin Amnónta wanutsishqanpita. Rey Davidpis y yanapaqninkunapis ataypa atarmi lapan waqapäkurqan. 37 Davidqa tsurin Amnónpaq lakikushpanmi waran waran waqaq.
Absalónnami qeshpir aywakurqan Gesur nacionpa mandaqnin rey Talmaiman. Talmaiqa Amiudpa tsurinmi karqan.* 38 Tsaychömi kimsa wata Absalón tarqan.
39 Tsurin Amnónpaq lakikuynin pasashqana kaptinmi Davidqa tsurin Absalónpaq pasaypa lakikur paywan tinkuyta munarqan.