Filipenses
Filipos markacho taq yärakuq mayinkunaman apóstol Pablo cartata apatsishqan
Carta qalaykunan
1 Filipos* markacho kaykaq *mayor wawqikuna, *diäcunukuna y wakin wawqi panikuna:
Noqa Pablo, Jesucristupa sirviqnin karmi kay cartata Timoteo ishkanï apaykätsimü. 2 Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki.
Tayta Diosta Pablo manakushqan
3 Qamkunapaq yarpararmi imaypis Tayta Diosta agradëcikü. 4 Tsaynölami Tayta Diosta manakur imaypis qamkunapaq kushishqa manakü. 5 Jesucristupa ali wilakuyninta chaskikärishqaykipita patsa yanapamashqaykita manami imaypis qonqashaqtsu. 6 Musyämi qamkunacho Tayta Dios ali rurayta qalaykushqanta y Jesucristo kutimunanyaq tsay ruraykashqanta ushananpaq kashqanta.*
7 Qamkunapaq yarpararmi tsayno nï. Jesucristupa wilakuyninta wilakur puriptïpis o prësu kaptïpis qamkunaqa imaypis yanapamashqankimi. 8 Tayta Dios musyanmi qamkunapaq imaypis yarparaykashqäta. Jesucristo kuyamashqantsinölami noqapis lapan shonqüwan qamkunata kuyä.
9 Tsaymi Tayta Diosta manakuykä shumaq tantiyakärishpayki payta kuyashpayki jukniki juknikipis kuyanakunaykipaq. 10 Tsayno kuyanakurmi ali kaqkunata ruranaykipaq tantiyakärinki y Jesucristo kutimunanta shuyäkur pay munashqanno jutsaynaqla kawapäkunki. 11 Jesucristo yanapaykuläshunki imaypis alilata rurapäkunaykipaq. Lapanpis kaykutsun Tayta Dios alabashqa kananpaq.
Jesucristupa ali wilakuyninta wilakuptin Pablo kushikushqan
12 Wawqi panikuna, prësu wichqarätsimaptinpis Jesucristupa ali wilakuyninta maytsaychöpis chaskikurkaykashqanta musyanaykitami munä. 13 Tsaymi kaycho lapan wardiakuna y wakin runakunapis musyarkaykan Jesucristupa wilakuyninta wilakushqäpita prësu kaykashqäta.* 14 Tsayta musyashpanmi wakin wawqi panikunapis Jesucristuman yärakushpan mana mantsakuypa ali wilakuyta wilakurkaykan.
15 Wakinqa noqapita mas reqishqa kayta munalarmi chikikuypita wilakurkaykan. Wakinmi itsanqa runakuna salvakärinanpaq wilakurkaykan. 16 Paykunaqa musyanmi Jesucristupa ali wilakuyninta wilakushqäpita wataraykashqäta. Wataraptïpis Jesucristuta kuyarmi wilakurkaykan. 17 Reqishqa kayta munaqkunaqa manami Diosta sirviyta munartsu wilakurkaykan, sinöqa rabyakunäta munarmi. 18 Tsayno kaptinpis manami lakikütsu. Rabyatsimänanpaq wilakurpis o runakuna salvakärinanpaq wilakurpis Jesucristupa ali wilakuyninta wilakuptin kushikümi.
Kawaypis wanuypis Pablupaq ali kashqan
Tsaynöpis kushikü 19 Tayta Diosta noqapaq manakäriptiki y Jesucristupa Espïritun yanapamaptin prësu kaykashqäpita yarqamunäpaq kashqanta musyarmi. 20 Mana mantsakuypa parlanäpaq imaypis yanapamashqannömi autoridäkunapa nawpanchöpis yanapamanqa. Tsaymi Jesucristo yanapamashqan musyakanqa kawaykaqta kacharimaptinpis o wanutsimaptinpis.
21 Kawarpis Jesucristulapaqmi kawashaq. Wanuptïpis mas alimi kanqa.* 22 Tsayno kaptinpis mana wanutsimaptinqa Jesucristupa wilakuyninta imaypis wilakushaq. Tsaymi wanuypis kawaypis noqapaqqa ali kaykan.
23 Tsayno kaptinmi mayqanta akraytapis mana kamäpakütsu. Noqapaqqa mas alimi kanman kay patsapita Jesucristupa nawpanmanna aywakuptï. 24 Tsayno kaptinpis qamkunata yanapanä rayku kawaptïpis alimi kanman. 25 Tsaymi qamkuna rayku Tayta Dios tsapämaptin autoridäkuna mana wanutsimanqatsu. Tsaynöpami qamkunata yanapashayki Tayta Diosman yärakur kushishqa kawapäkunaykipaq. 26 Carcilpita yarqur qamkuna kaqman chayamuptïnami pasaypa kushikur Jesucristuta alabashunpaq.
Chikiptinpis mana mantsakunanpaq nishqan
27 Jesucristupa ali wilakuynin nishqannöla imaypis kawapäkuy. Tsaynöpami shamurpis mana shamurpis musyashaq nakarpis lakikurpis Jesucristo munashqanno kawarkaykashqaykita y imaypis kuyanakurkaykashqaykita. Tsaynöpis musyashaq runakuna chikishuptikipis Jesucristupa ali wilakuyninta wilakurkaykashqaykita.
28 Jesucristuman yärakärishqaykipita runakuna chikishuptikipis ama mantsakäriytsu. Tsaynöpami tantiyakärinqa kikinkuna ushakänanpaq kashqanta y qamkunata Tayta Dios salvashushqaykita. Tsaytaqa Tayta Diosmi ruranqa.
29 Manami Jesucristuman yärakunalantsipaqtsu Tayta Dios akramashqantsi, sinöqa payta chaskikushqantsipita nakanantsipaqmi. 30 Nawpata imano nakashqätapis y kanan imano nakaykashqätapis musyapäkunkimi.* Noqapis y qamkunapis Jesucristupa wilakuyninta wilakushqantsipita nakashunmi.