3 Juan
Apóstol Juanpa kimsa kaq cartan
Carta qalaykunan
1 Kuyay wawqi Gayo:*
Noqa *mayor wawqi karmi qamta rasunpa kuyar kay cartata apaykätsimü.
2 Kuyay wawqi, Tayta Diostami manakuykä ali kawashqaykiman tupu lapanchöpis alila kanaykipaq y mana qeshyaypa kawanaykipaq. 3 Jesucristo yachatsishqannöla kawaykashqaykita wawqikuna chayamur wilamaptinmi pasaypa kushikushqä.* 4 Tayta Dios munashqanno wamräkuna* kawarkaykashqanta musyarmi pasaypa kushikü.
Gayo yanapakuq kashqanpita Juan kushikushqan
5 Kuyay wawqi Gayo, juk lädupita shamuq wawqikunata yanapar alitami ruraykanki. 6 Paykuna chayamurmi kuyapäkuq kashqaykita juntakashqächo wilamashqa. Yapay kutimuptinpis juk markaman aywananpaq yanapaykulanki. Tsayno ruraptikimi Tayta Diospis kushikunqa. 7 Jesucristupa ali wilakuyninta wilakur purirmi Tayta Diosta mana cäsukuq runakunataqa imatapis manakärintsu. 8 Tsaymi Tayta Diospa wilakuqninkunataqa noqantsi yanapanantsi. Tsayno rurarmi paykunawan iwal wilakuqno kashun.
Diótrefes mana cäsukuq kashqan
9 Wilakuqkunata yanapanantsipaq tantiyatsirmi juk cartata qamkunaman apatsimurqä. Tsayno kaptinpis Diótrefes manashi yätsishqäkunata cäsukamantsu. Payqa mandaq kashqanman atiënikurshi munashqanta ruraykan. 10 Tsaynöpis noqakunapa wasäta rimarshi puriykan. Karupita shamuq wawqikunatapis manashi chaskintsu. Patsatsiqkunatapis michanshi mana patsatsinanpaq. Michaykaptinpis patsatsiptinqa juntakashqaykipita qarqunshi. Tsayno rurashqanpita chayamurnami olqüpäshaq.
Demetrio cäsukuq kashqan
11 Kuyay wawqi Gayo, ama Diótrefesno kaytsu, sinöqa alilata ruray. Alita ruraq kaqqa Diospa wamranmi kaykan. Mana alita ruraq kaqmi itsanqa Diosta mana *reqintsu.* 12 Demetriupaqmi itsanqa lapan runakunapis parlapäkun Tayta Diospa wilakuynin nishqanno kawaykashqanta. Noqakunapis rikashqämi tsayno ali kawaykashqanta. Qamkuna musyankimi wilashqä rasun kaq kashqanta.
Carta ushanan
13 Yätsinäpaq maspis kaykanraqmi. Itsanqa cartalacho manami qelqamushaqtsu. 14 Kikï shamurnami mastaqa tantiyatsishayki.*
(15)Tayta Dios yanapaykuläshunki makincho ali kawanaykipaq. Kaycho reqinakushqaykikunapis lapanmi salüdunta apatsikamun. Tsaycho reqinakushqäkunata cada ünunta salüdüta qoykulanki.