Salmos

63 (2) ¡Tayta Dios, qamlami Diosnï kanki!

Tsaka tsakalami qamta *ashï.

Yakunaypanöraqmi nawpaykicho kayta munä.

Wanunayparaqmi qamwan kawayta munä.

Pasaypa tsaki chakranömi kaykä.*

 2 (3) Templuykicho qamta rikaytami munaykä.

Lapanpaq munayniyuq kashqaykitami tantiyakuyta munaykä.

 3 (4) Kuyamashqaykimi mas ali kaykan kawashqäpitapis.

Tsaymi lapan shonqüwan imaypis alabashayki.

 4 (5) Kawashqäyaq qamtami agradëcikushayki.

Makïta joqarkamurmi manakamushaq.

 5 (6) Lapan shonqüwan kushishqa alabarmi contentakushaq.

Ali alilata mikur kushikushqänömi kushikushaq.

 6 (7) Cämächöpis qamlapaqmi yarparaykä.

Punuyta mana tarirpis qamlapaqmi shonqü yarparaykan.

 7 (8) Lapanchöpis qammi yanapamashqanki.

Älayki rurincho karmi pasaypa kushikü.*

 8 (9) Lapan shonqüwanmi qamman qelikamü.

Alawqa kaq makikiwanmi imaypis jancharämanki.

 9 (10) Wanutsimayta munaqkunaqa kikinkunami puntata wanupäkunqa.

10 (11) Paykunataqa espädawanmi wanutsipäkunqa.

Ayantapis *chacalkunami mikunqapaq.

11 (12) Reymi itsanqa Tayta Dios yanapashqanpita kushikunqa.

Tayta Diospa jutinta joqariqkunaqa kushishqami alabapäkunqa.

Lulakuqkunami itsanqa ima niytapis mana kamäpakunqatsu.