Jeremías
Jerusalén markata Babilonia runakuna ushakätsishqan
2 Reyes 24.20—25.21; 2 Crónicas 36.17-21; Jeremías 52.3-30
39 Pusaq wata y chunka killana* Judá nacionpa mandaqnin rey Sedequías kaykaptinmi Babilonia nacionpa mandaqnin rey Nabucodonosor lapan soldädunkunawan aywar Jerusalénta atacananpaq jiruruypa churanakurqan. 2 Chunka wata y chusku killa isqun junaq* Sedequías rey kaykaptinnami tsay soldädukuna murällata uchkuykur markaman yaykapäkurqan. 3 Babilonia nacionpa mandaqnin rey churashqan capitankuna yaykurmi chawpi kaq punkuman churakarqan. Paykuna karqan Nergal-sarezer, Samgar-nebo, mandaq Sarsequim, mandaq Nergal-sarezer y rey churashqan lapan capitankuna.
4 Tsayta rikarmi rey Sedequías lapan soldädunkunawan tsakaypa qeshpir reypa huertan nishqanpa pasar yarqupäkurqan ishkay murälla nishqan punkupa. Tsaypitana *Arabá pampapa aywaq nänipa aywakärirqan. 5 Tsayno qeshpirkaykaptinmi Babilonia* soldädukuna qatipashpan rey Sedequíasta tariparqan Jericó pampacho.
Prësu tsariykurmi Babiloniapa mandaqnin rey Nabucodonosor kaqman apapäkurqan. Nabucodonosorqa kaykarqan Hamatcho kaykaq Ribla* markachömi. Chayaykatsiptinmi Nabucodonosor payta juzgarqan. 6 Riblachömi rey Sedequías rikaraykaptin tsurinkunata wanutsipäkurqan. Tsaynölami Judá nacionpa autoridäninkunatapis wanutsipäkurqan. 7 Kikin Sedequíastanami ishkan nawinta jorqurir cadinawan watarkur Babiloniaman prësu apapäkurqan.
8 Jerusalénchönami reypa palaciunta y tsaycho kaq wayikunatapis Babilonia soldädukuna rupatsir ushapäkurqan. Tsaynölami Jerusalén markapa murällantapis juchutsipäkurqan. 9 Tsaypitanami wardiakunapa capitannin Nabuzaradán quëdaq runakunata y payman qelikuq runakunata Babiloniaman apatsirqan. 10 Judá nacioncho pasaypa waktsakunalatami kachaykurqan. Paykuna arukunanpaqmi üva chakrakunata y murunanpaq chakrakunatapis rikatsirqan.
Prësu kashqanpita Jeremíasta kacharishqan
11 Babiloniapa mandaqnin rey Nabucodonosormi wardiakunapa capitannin Nabuzaradánta kayno nirqan: 12 “Jeremíasta ali rikanki. Imatapis munashqanta kamaripanki”.
13 Tsayno niptinmi wardiakunapa capitannin Nabuzaradán, palaciucho mandaq Nabusazbán, mandaq Nergal-sarezer y Babilonia nacionpa mandaqnin reypa lapan capitanninkunapis 14 carcilpa sawanninpita* Jeremíasta jorqatsimurqan. Nirkurmi wayinman kutitsinanpaq Ahicampa tsurin y Safánpa wilkan Gedalíasta entregarqan. Tsaynöpami quëdaq Judá mayinkunawan Jerusaléncho Jeremías tarqan.
Ebed-melecta Tayta Dios promitishqan
15 Carcilpa sawanlancho Jeremías prësu kaykaptinmi TAYTA DIOS kayno nirqan: 16 “Etiopíapita Ebed-melecta* kayno ninki: ‘Israel runakunata kuyaq y lapanta mandaq TAYTA DIOS kaynömi nin: Kay markacho ali kaway kananpa trukanqa desgracia kananpaqmi nirqä. Tsay nishqätaqa cumplishaqmi. Tsayno pasashqanta qampis rikankipaqmi. 17 Tsayno kaptinpis mantsakushqayki runakunapita noqami tsapäshayki. 18 Noqaman yärakamashqaykipitami mana wanutsishunaykipaq tsapäshayki. Noqa TAYTA DIOSMI tsayno nï’ ”.