Salmos
Mana alikunapita Tayta Diosta tsapänanpaq manakushqan
(1) Cantaqkunapa mandaqninpaqmi. Cuerdayuq instrumentuta tukar cantapäkunki. David qelqashqan salmu.
61 (2) Tayta Dios, qayakamushqäta mayaykalämay.
Manakamushqäta wiyaykalämay.
2 (3) Valornï manana kaptinmi shonqüpis ushakaykan.
Markäpita pasaypa karucho kashpämi qamta manakamü.
Altunnin qaqaman pakaykalämay.
3 (4) Qammi kanki pakakunä törri.
Qammi kanki chikimaqnïkunapita tsapämaqnï.
4 (5) *Sagrädu tolduykicho imaypis täkuytami munaykä.
Tsaychömi älaykiwan ima peligrupitapis tsapämanki.* Selah
5 (6) Lapan promitishqätami qam musyaykanki, Tayta.
Qamta *mantsakushuqnikikuna chaskinanpaq kaq herenciatami qomashqanki.
6 (7) Mandaq rey atska wata kawananpaq yanapaykulay.
Payqa imayyaqpis kawaykulätsun.
7 (8) Qampa bendicionnikiwan imaypis mandaykulätsun.
Mana kachaypa imapitapis tsapaykulay.
8 (9) Tsayno yanapashqaykipitami imaypis alabashayki.
Qamta lapan promitishqätapis waran waranmi cumplishaq.