Hechos
Paralïticu runata aliyätsishqan
3 Juk junaqmi malway inti kaykaptin Tayta Diosta manakärinanpaq Pedro y Juan templuman aywapäkurqan. 2 Templu punkuchömi jamaraykarqan yurishqanpita patsa mana puriq runa. Tsay runatami waran waran apapäkuq Kuyaylapaq nishqan punkuman. Tsaychömi templu patiuman yaykuqkunata limushnata manakuq. 3 Pedro y Juan yaykuykaqta rikarmi paykunatapis limushnata manakurqan. 4 Manakuptinmi tsay runata shumaq rikapärir Pedro kayno nirqan: “¡Rikamay!”
5 Tsawraqa paykunata kushishqa rikararqan imalawanpis yanapananpaq kashqanta yarparmi. 6 Tsaymi Pedro kayno nirqan: “Manami qellaynïpis ni qorïpis kantsu. Tsayno kaptinpis yanapashayki. ¡Nazaretpita Jesucristupa jutincho jukla sharkur puriy!”
7 Tsayno nirmi Pedro alawqa kaq makinpita sharkatsiptin jinan höra chaki moqunkuna aliyarqan. 8 Tsawraqa jukla sharkurkur puriyta qalaykurqan. Nirkurmi saltar Tayta Diosta alabashpan paykunawan templu patiuman yaykurqan. 9 Tayta Diosta alabar puriykaqta rikarmi lapan runakuna 10 espantashqa kayno nipäkurqan: “¡Payqa Kuyaylapaq nishqan punkucho limushnata manakuq runami kaykan!”
11 Tsay aliyaq runaqa Pedruta y Juanta manami kachaykurqantsu. Salomónpa Alarnin nishqancho paykuna kaykashqanta musyaykurmi runakuna espantashqa tsayman warakayla rikaq aywapäkurqan.
Pedro wilakushqan
12 Runakuna chayaykäriptinnami Pedro kayno nirqan: “Israel runakuna, ¿imanirtaq noqakunata rikapaykämanki? ¿Imanirtaq yarpapäkunki kikïkunapa munaynïwan o jutsaynaq kaynïwan kay runata aliyätsishqäta?
13 “Abrahampa, Isaacpa, Jacobpa y unay ayluntsipa Diosninmi* sirviqnin Jesústa churashqa lapanpitapis mas munayniyuq kananpaq.* Tsayno kaykaptinmi qamkunaqa wanutsinanpaq autoridäkunapa makinman churapäkushqanki. *Pilato kachariyta munaptinpis qamkunaqa manami munapäkushqankitsu. 14 Jutsaynaq *santu runata kacharinanpaq manakärinaykipa trukanqa runa wanutsiqta kacharinanpaqmi manakärirqayki.* 15 Tsaynöpami *mana ushakaq kawayta qomaqnintsita wanutsipäkurqayki. Paytami Tayta Dios kawaritsimushqa. Kawarirkamur yuripämaptinmi noqakuna rikashqä. 16 Paymi kay reqishqayki runata aliyätsishqa. Jesucristuman yärakuptïmi rikashqaykinöpis kanan aliyashqana kaykan.
17 “Wawqikuna, Jesús salvamaqnintsi Cristo kashqanta mana musyarmi qamkunapis autoridänintsikunapis wanutsipäkushqanki. 18 Tsayno kaptinpis profëtankunawanmi Tayta Dios musyatsimarqantsi Cristuta wanutsinanpaq kashqanta. Tsaytami Tayta Dios cumplishqa.
19 “Kananqa perdonashunaykipaq jutsa rurayta kacharir Tayta Diosta cäsukäriy. 20 Tsaynöpami Jesucristuta Tayta Dios yapay kachamunqa. Paytami unaypita patsa akrarqan salvamaqnintsi Cristo kananpaq. 21 Kutimunan junaq chayamunanyaqmi Jesucristuqa jana patsacho kanqa. Kutimurnami lapantapis churanqa Tayta Dios munashqannöna kananpaq. Tsayno kananpaq kashqantaqa Tayta Diospa santu profëtankuna unaypita patsami wilakärirqan.
22 “Moiséspis [unay ayluntsikunatami] kayno nirqan: ‘Tayta Diosmi qamkunapita juk runata churanqa noqano profëta kananpaq. Pay nishushqaykita cäsukärinki. 23 Pipis pay nishqanta mana cäsukuq kaqqa qarqushqami kanqa’.*
24 “Samuel wilakushqanpita patsami Tayta Diospa lapan profëtankunapis wilakärirqan kanan witsan pasaykashqankunata. 25 Profëtakuna wilakushqan promësakunaqa noqantsi chaskikunantsipaqmi kaykan. Tsaynöpis unay ayluntsikunawan Tayta Dios *pactu rurashqanpis noqantsipaqmi kaykan. Tsay pactuta rurarmi Abrahamta Tayta Dios kayno nirqan: ‘Qampita miraqpitami kay patsacho pïmay runakunapis bendicionta chaskipäkunqa’.* 26 Abrahamta promitishqanta cumplirmi sirviqnin* Jesústa kawarirkatsimur noqantsiman Tayta Dios kachamurqan. Tsayno kachamurqan jutsa rurayta kacharir noqantsi puntata tsay bendicionta chaskinantsipaqmi”.