1 Corintios
Mädistanwan punuq runata qarqunanpaq Pablo yätsishqan
5 Qamkunacho juk runa mädistanwan taykashqantami musyashqä. Paywan tarqa pasaypa penqakuypaq *fornicación jutsatami ruraykan. Tsayno runataqa Jesucristuta mana chaskikuq runakunapis jamurpanmi.* 2 Tsayno kaykaptinqa ¿imanirtaq mana penqakärinkitsu? Penqakärinaykipa trukanqa kushikurkaykankimi. Tsay niraq runataqa ¿imanirtaq juntakashqaykipita qarqupäkunkitsu?
3 Qamkuna kaqcho mana kaykarpis nawpaykicho kaykaqnömi kaykä. Tsaymi tsay runataqa mayna juzgashqä. 4 Señor Jesucristupa jutincho juntakäriptiki noqapis qamkunawan kaykaqnömi kaykäshaq y munayniyuq Jesucristupis qamkunawanmi kaykanqa. 5 Tsayno kaykaptinqa tsay runata *Satanáspa makinman kachaykuy. Tsaycho nakar jutsanta kachariptinraqmi Señor Jesucristo kutimur salvanqa.
6 Tsay runata mana qarqurqa alabakurpis mana alitami rurarkaykanki. ¿Manaku musyapäkunki tsay jutsaqa walka levadürala mäsata jakatsishqanno kashqanta?* 7 Tsayno kaykaptinqa qamkunacho kaykaq levadürata jitaqno tsay runata qarqupäkuy. Tsaynöpami mushuq mäsapita rurashqa levadüraynaq tantano kapäkunkipaq.* *Pascua carnishno Jesucristo [noqantsi rayku] wanutsishqa kaptinmi rasunpa levadüraynaq tantano karkaykanki.* 8 Tsayno kaykaptinqa Pascua fiestata rurananpaq levadürata jitariqno jutsa ruraykunata y mana ali ruraykunata kacharishun. Tsayno kacharir Tayta Diospa wilakuynin nishqanno kawashun.
9 Puntata apatsimushqä cartachöpis* maynami nishqä fornicación jutsata ruraq runakunawan mana juntakänaykipaq. 10 Manami lapan tsayno kawaq runakunapita witikärinaykipaqtsu tsayno niykä. Tsaynöpis manami lapan codiciösu runakunapita, suwakunapita y ïdulukunaman yärakuq runakunapita witikärinaykipaqtsu niykä. Paykunawan mana juntakarqa ¿mayparaq aywapäkunkiman? 11 Tsayno kaptinpis wakin runakunaqa “Jesucristumanmi yärakü” niykarmi fornicación jutsata rurapäkun, imapaqpis codiciösu kapäkun, ïdulukunaman yärakärin, runapa wasanta rimapäkun, borrächu kapäkun y suwakärin. Paykunawan mana juntakänaykipaqmi niykä. Paykunawanqa mikunalaykipaqpis ama juntakaytsu.
12 Noqantsi manami munayniyuqtsu kantsi Jesucristuman mana yärakuqkunata juzganantsipaq. Jesucristuta chaskikuq mayintsikuna jutsata ruraptinmi itsanqa juzganantsipaq y corriginantsipaqpis munayniyuq kaykantsi. 13 Jesucristuta mana chaskikuq runakunataqa kikin Diosmi juzganqa. Jesucristuta chaskikuq mayikikunata corriginaykipaq munayniyuq kaykarqa mädistanwan kakuq runata juntakashqaykipita qarqupäkuy. Tsaynöpami mana ali ruraykuna qamkunacho mana kanqatsu.*