2 Corintios
Tayta Dios munashqanno kawananpaq Pablo yätsishqan
13 Kananwanqa kimsa kutinami qamkunaman watukuq shamushaq. Yarpapäkuy Tayta Diospa palabrancho kayno qelqaraykashqanta: “Ishkay o kimsa testïgukuna careaptinraqmi pipis jutsayuq kashqan musyakanqa”.*
2 Qamkuna kaqman shamur jutsa ruraykaqkunata maynami nirqä jutsa rurashqanta kacharinanpaq. Kananpis nawpaykikunacho kaykaqnömi lapaykita yapay kayno nï: Kanan kutimur tsaynöla jutsata ruraykaqta tarirqa manami kuyapäshaykitsu. 3 Tsayraqmi musyapäkunki qamkunata nishqäkuna Jesucristo munashqanno kashqanta.
Jesucristupis manami mayqanikitapis jutsaykipita tsapäshunkitsu. Tsaypa trukanqa jutsa rurayta mana kachariptiki munayninwanmi corrigipäkushunki. 4 Munayniynaq runano cruzcho wanuptinpis Tayta Diosmi munayninwan payta kawaritsimushqa. Tsaynölami noqakunapis Jesucristuman yärakur kikiläkunapitaqa munayniynaq kaykarpis Tayta Diospa munayninwan qamkunata corrigishaykipaq.
5 Jesucristuman rasunpa yärakärishqaykita o mana yärakärishqaykitapis kikikikuna tantiyakäriy. ¿Manaku tantiyapäkunki Jesucristo qamkunawan kaykashqanta? Payman mana yärakuptikiqa manami qamkunawantsu kaykan. 6 Rasunpa payman yärakurqa Jesucristo kachamashqanta tantiyakärinkimanmi.
7 Tayta Diosta manakurkaykä nishqäkunata chaskikur jutsa ruraykunata kacharinaykipaqmi. Manami munayniyuq kashqäta tantiyapäkunaykipaqtsu manakurkaykä, sinöqa munayniynaq kashqäta yarparpis Tayta Dios munashqanno kawapäkunaykipaqmi. 8 Tsayno nipäkü Tayta Diospa ali wilakuyninta imapis mana tsapänanpaqmi. Paypa wilakuyninta pïmaypis chaskikunantami munapäkü.
9 Tsaymi Tayta Diosta manakurkaykä lapanchöpis pay munashqanno kawapäkunaykipaq. Pay munashqanno kawapäkuptikiqa munayniynaq kashqäta runakuna yarpaptinpis kushikümi. 10 Kay qelqamushqäkunata cäsukäriptiki qamkuna kaqman chayamushpä imatapis mananami nishaykinatsu. Manami lakikatsinäpaqtsu apóstol kanäpaq Tayta Dios churamashqa, sinöqa qamkunata shakyätsir yanapanäpaqmi.
Carta ushanan
11 Wawqi panikuna, imaypis kushikäriy. Tayta Dios munashqanno kawanaykipaq jukniki juknikipis shakyätsinakäriy. Mana chikinakuypa juk shonqula kawapäkuy. Tsayno kawaptikimi kuyapäkuq y ali kawayta qomaqnintsi Tayta Dios imaypis yanapashunki. 12 Jukniki juknikipis qaqlaykikunacho mutsanakushpayki winchinakäriy. 13 Kaycho kaykaq lapan wawqi panikunapis salüduntami qamkunapaq apatsikamun.
14 Señor Jesucristo, Tayta Dios y Espíritu Santu imaypis kuyapaykuläshunki. [Amén.]