Salmos

101 (1b) Kuyakuq kashqaykipitami alabashayki.

Lapantapis ali ruraq kashqaykipitami alabashayki.

TAYTA DIOS, qamlatami alabashayki.

 2 Munashqaykinömi kawayta munaykä.

¡Imayraq shamunki yanapamänaykipaq!

Mandashqä palaciüchöpis alita rurarmi kawashaq.

 3 Mana alikunataqa manami rikaytapis munätsu.

Jutsata ruraqkunawanqa manami kirüpis tinkuntsu.

Paykunawanqa manami imaypis talukäshaqtsu.

 4 Lutan yarpaykuna shamuptinpis manami cäsupäshaqtsu.

Manami imaypis jutsata rurashaqnatsu.

 5 Vecïnunpa wasanta rimaqkunata upälatsishaqmi.

Orgullösu runakunataqa manami chaskipäshaqtsu.

 6 Cäsushuqniki runakunalatami yanapamänanpaq churashaq.

Jutsata mana ruraqkunalami sirvimanqa.

 7 Trampösukunataqa palaciüman manami chaskishaqtsu.

Lulakuqkunapis nawpäman manami yaykamunqatsu.

 8 Cada tuta juzgashpämi fiyu runakunata wanutsinanpaq nishaq.

TAYTA DIOS akrashqan markapita paykunata elqätsishaqmi.