Salmos
Tayta Dios rey kashqan
(1) Cantaqkunapa mandaqninpaqmi. Corépita miraqkuna qelqashqan salmu.
47 (2) ¡Intëru nacioncho taq runakuna!
Paqchipaylapa Tayta Diosta alabapäkuy.
Kushikushpayki lapayki cantapäkuy.
2 (3) Poderniyuq TAYTA DIOSQA mantsariypaqmi.
Paymi intëru kay patsacho kaqkunapa mandaqnin rey kaykan.
3 (4) Paymi yanapamashqantsi juk lädu nacionkunatapis vincinantsipaq.
Tsay runakunata makintsimanmi churamushqa.
4 (5) Herenciantsi kananpaqmi taykashqantsi nacionta kikin qomashqantsi.
Tsaymi kuyashqan Jacobpita miraqkuna kar kushishqa kawaykantsi. Selah
5 (6) TAYTA DIOSMI trönunman witsarqan jamakunanpaq.
Witsaptinmi runakuna kushikärishpan qaparparqan y *cornëtatapis tukapäkurqan.
6 (7) Tayta Diosta alabashun.
Mandamaqnintsi reyta alabashun.
7 (8) Paymi intëru patsacho kaqkunapa mandaqnin rey kaykan.
Salmuta cantar lapan shonquntsiwan payta alabashun.
8 (9) Tayta Diosmi lapan nacionkunapa mandaqnin rey kaykan.
Paymi *sagrädu trönuncho jamaraykan.
9 (10a) Lapan nacionkunacho taq mandaq runakunami Tayta Dios kuyashqan runakunawan juntakan.
Abraham yärakushqan Tayta Diosta alabapäkunanpaqmi juntakan.
10b) Kay patsacho lapan mandaqkunapis Tayta Diospa munayninchömi karkaykan.
Tayta Diosqa lapanpitapis mas munayniyuqmi kaykan.