Galanan caj

“Jutëmi Dauda, winashcä juc ichic marcacho Sierra Leona naciuncho. Wamrala caycaptë, familiäga juc familiawan terrenuta guechunacur ‘cay terrenuga nogacunapämi’ nir rimanacärergan. Chay problemata alchachinanpaj juc brujutaraj gayargan. Chay brujuna juc runapa maquincho espejuta charichirgan, nircur yuraj telawan chapargan. Ichic rato pasarcuptin, espejuta charej runa sicsicyar y sudayta galaycurgan. Espejuta ricaycur gaparayparaj nergan: ‘¡Auquin runa shamuycajta ricaycä! Jatun runami, ropanga yuraj, umanpis sogu caycan y curcuyash purin’.

¡Awilüpämi parlaycargan! Fiyupa manchacur nergan: ‘¡¿Mana creimanquichu?! Mä quiquiquicuna shamuy espejuta ricanayquipaj’. Alapa manchacurga pipis ricayta munapäcurgächu. Manana manchacunanpaj, brujuga jachacunawan yacu jampita ruraycur chajchupargan.

‘Awilü’ chay runata parlachir nergan chay terreno familiäpita cashganta. Awiläta nergan mana manchacuypa chaycho murunanpaj. Juc familiaga acuerduchomi caycargan, y chaynopa problema alchacargan”.

África naciuncho achca runacuna chaycunapa pasapäcun. Entero Pachacho achcajmi creipäcun wanojcunapa espiritun puriycashganta, ricaraycashganta y yanapacushgantapis. ¿Pero rasunpacu chayga? ¿Wanojcunapa alman puriycanräcu? Wanojcunapa alman mana captenga, ¿pïcunataj purircaycan? Alapa alimi chaycunapita yachacuptiquega.