10 CAJ YACHACUY
¿Imanötaj musyashwan maygan rasumpa kaj religión kanganta?
1. ¿Juklaylaku rasumpa kaj religión kan?
“Cuydacuy[...] ‘Tayta Diospa willacojninmi cä’ nir shamoj llutan yachachicojcunapita.” (MATEO 7:15)
Jesuswan gatejninkunaga rasumpa kaj religiuntami charayargan y kaytami igualachirgan kawayman apakoj naniwan, chaytaga walkajlami tariyan (Mateo 7:14). Diosga Palabran Biblia nishgannöla adorajkunatami chaskin. Chayno adorajkunaga manami jukman jukman creiyanchu, fe-ninkunaga juklaylami. Lei Salmo 25:5; Juan 14:6, y Efesios 4:4, 5.
Cay videuta ricäriy: ¿Dios chasquinchuraj lapan religiuncunata?
2. ¿Imatataj Jesús nirgan mana rasumpa kaj cristianukunapaj?
“‘Tayta Dios munashannömi goyä’ niptinpis [...] runacuna tantiyacun Diosninchïta mana wiyacushanta.” (TITO 1:16)
Jesusmi wilakurgan falso profetakuna rasumpa kaj yachachikuyta mana ali yachachikuykunawan taluchiyänampaj kajta. Pero rasumpa kajchöga kay cristianutukojkunaga runakunatami engañayan. Rasumpa kaj religiuntaga reguishwan chaycho kaykajkuna imano kayanganta rikarmi. Lei Mateo 7:14-23.
3. ¿Imanötaj reguishwan rasumpa kaj religiuncho kaykajkunata?
Imano reguinapajga pichgalata rikärishun:
Diospa Palabrantami respetayan. Runakuna yachachikuyanganta mana cuentapaj churarmi, Diospa Palabran consejakungannöla kawayänampaj kalpachakuyan (Mateo 15:7-9). Jina yachachikuyangannölami kawakuyan. Lei Juan 17:17 y 2 Timoteo 3:16, 17.
Jehová jutitami respetayan. Chaytami Jesuspis rurargan taytampa jutimpita musyachikur. Jina Diospa jutin respetashga kanampaj runakuna mañakuyänampajmi yachachirgan (Mateo 6:9, NM). Tiyangayki markachöga, ¿maygan religiuntaj Diospa jutinta musyachikun? Lei Éxodo 3:15, nota; y Juan 17:26.
Diospa Gobiernumpitami wilakuyan. Jesusga kay Patsaman shamurgan Diospa Gobiernumpita yachachikunampajmi, ¡kaymi ichanga alikunata apamunga! Y wanungankamayajmi yachachikurgan (Lucas 4:43; 8:1; 23:42, 43, NM). Jina nirganmi chay ali wilakuypita gatejninkunapis yachachikuyänampaj kajta. Chayga, pilapis Diospa Gobiernumpita parlapashunaykipaj wasikiman chäriptinga, ¿maygan religiunpita kangantaraj ninkiman? Lei Marcos 13:10.
Manami kay munduchu runakunanöchu kayan. Manami jatikäyanchu política asuntukunaman, y manami ni pipa contrancho gaparir puriyanchu (Juan 17:16; 18:36). Jina manami portakuyanchu mana alikunata ruraj runakunanöga. Lei Santiago 4:4.
Rasumpami kuyanakuyan. Diospa Palabran yanapayashga kaptinmi, may chaypita runakunata respetayan. Cristianutukojkunaga guerrakunatami imaypis yanapayashga, pero rasumpa kaj cristianukunaga manami (Miqueas 4:1-3). Chaypa trukanga imatapis mana shuyashpami lapan tiempunwan y imaykankunawan runa masinkunata yanapayan. Lei Juan 13:34, 35 y 1 Juan 4:20.
4. ¿Tariyta puedinkimanchuraj rasumpa kaj religiunta?
¿Maygan religiuntaj Biblialapita yachachikuyan, Diospa jutinta respetayan y Diospa Gobiernun lapanta alchamunampaj kajta wilakuyan? ¿Maygan religiuntaj rasumpa kuyanakuyan y guerrakunacho yanapakunchu? ¿Ima ninkitaj? Lei 1 Juan 3:10-12.