¿Imanirtaj cristianukunaga ali churanakushga kayänan?

1. ¿Imanirtaj unay Israelta shumaj churanakushgata Dios kachishga?

Diosmi unay Israel markata shumaj churanakächirgan. Kay markami rasumpa kajwan Diosta adorayänan kargan y Diospa Palabrantami gongayänanchu kargan (Salmo 147:19, 20). Chaynöpami may markakunapis Diospa bendiciunninta chaskiyänan kargan. Lei Génesis 22:18.

Israel markatami Diosga akrargan testigunkuna kanampaj. Kay marka imapa pasanganmi yachachimanchi Diospa leyninta wiyakuy aliman chächikunganta (Deuteronomio 4:6). Paykunaraykurmi wakin markakunapis rasumpa kaj Diosta reguiyänan kargan. Lei Isaías 43:10, 12.

2. ¿Imanirtaj ali churanakushga kayänan rasumpa kaj cristianukuna?

Israel marka Diospa favurninta ograrishga kaptinmi, Jehová trukachirgan cristiana congregaciunwan (Mateo 21:43; 23:37, 38). Chaymi kanan wichanga Jehovapa testigunkunanami kayan Diospa rasumpa kaj sirvejninkuna. Lei Hechos 15:14, 17, NM.

Entero Patsacho predicayänampaj y discipulukunata rurayänampajmi Jesusga gatejninkunata ali churakächirgan (Mateo 10:7, 11; 24:14; 28:19, 20). Y kanan wichanmi predicaciunga imaypitapis más miraykan. Chaymi Jehovaga may chay naciunpita chaychikaj runakunata rasumpa kaj religiunman apaykämun (Apocalipsis 7:9, 10). Ali churapänakushga karmi rasumpa kaj cristianukunaga yanapanakuyan y animanakuyan. Reuniunninkunachöga entero munduchömi igual-la yachakuyan. Lei Hebreos 10:24, 25.

3. ¿Imanötaj kanan wichan Jehovapa testigunkuna galaykuyargan?

1870 wata wichanmi galaykuyargan. Walkajla Bibliapita yachakojkunami ichiklapa ichiklapa rasumpa kaj yachachikuyta yapay tarir galaykuyargan. Musyayarganmi predicaciunta Jesús galaykachishganta, chaymi may chay naciunman Diospa Gobiernumpita ali wilakuyninta chächiyargan. 1931 watachömi Jehovapa testigunkuna nishpa gayakuyargan. Lei Hechos 1:8; 2:1, 4, y 5:42.

4. ¿Imanötaj churanakushga kaykäyan Jehovapa testigunkuna?

Apostulkunapa tiempunchöga achka congregaciunkunatami yanapaj cristiana congregaciunta pushajkuna, paykunaga Jesustami rikäyaj congregaciunpa uman cuentatano (Hechos 16:4, 5). Jina chaynölami kanan wichan testigukunatapis yanapäyan Jehovapa Testigunkunata Pushajkuna; paykunami entero munducho sucursalkunata rikäyan. Kaychömi traducikamun, imprimikamun y Bibliapita publicaciunkunata 600 idiumapitapis mascho jorgakämun. Bibliata cuentaman churarmi kay cristianukunaga 100 mil congregaciunkunatano animayan y yanapayan, y chay lapan congregaciunkunachömi kayan cristianumasinkunata Diospa uyshantano kuyaywan trataj pogushga cristianukuna. Lei 1 Pedro 5:2, 3.

Jehovapa testigunkunaga ali churapänakushgami kaykäyan: Diospita ali wilakuyta musyachikur y discipulukunata rurar. Apostulkunanömi wasin wasin predicaj aywapäkun (Hechos 20:20). Jina Bibliawanmi yachachiyan rasumpa kajpita yachakuyta munajkunata. Juk familianölami juknin jukninkuna kuyanakuyan y kuyakoj Taytampa yanapakuyninta chaskiyan (2 Tesalonicenses 1:3). Taytanta kushichej kar y wakinkunata yanapakoj karmi pï may pitapis más kushishga Diospa markan kayan. Lei Salmo 33:12 y Hechos 20:35.