14 CAJ YACHACUY

Yaparir yaparir tantiachicushwan

Hebreos 8:1

ICHIC YACHACUY: Shumaj yachachicuy wiyaycajcuna discursuyquita ali tantiananpaj. Yachachicushgayquega imapita parlanayquipaj cajwan tincunman y waquincunatapis yanapänanpaj canman.

IMANOTAJ RURASHWAN

Imataj yachachicuyta munanqui. Yarpachacuy yachachicuyniquiwan imata lograyta munanqui, capaz canman shacyächinayquipaj, imapitapis convencido caycänanpaj o musyanalanpaj. Más alinnin caj yachachicuycunata shumaj tantiachicurga, wiyaycajcuna ali tantiangapaj.

Tapucuriy: “¿Imataraj nimanman wiyaycajcuna cay temapita parlaptë? ¿Imatataj puntata nëman y chaypitapis?”. Nircur shumaj yarpachacuy galananpita ushananyaj imacunata ninayquipaj. Chayta ruraptiqui wiyaycajcunaga atentula wiyanga, tantianga y cushishga chasquicungapis.
Imapita parlashgayquita niriy. Discursuyquicho cutin cutin ricächicunayqui imapita parlashgayquita, chaypäga importante caj palabracunata yaparir yaparir ninayqui o jucnopapis tantiachicunquiman.
Importante yachachicuycunata shumaj tantiachicuy. Lapan yachachicunayquipaj cajpita más preciso cajlata acray y tiempulanchomi shumaj tantiachinayqui. Lapancunapitaraj yachachicunayquipaj trucan, juc ishcaylata acraycur ali tantiachicuy. Y juc caj yachachicuyman manaraj pasarga ichicla jamaycunquimanraj.

Discursuyquipa galananlacho wilacunayqui imacunapita yachachicunayquipaj y usharirpis chaynola ruranayqui. Chayta ruraptiqui wiyaycajcuna tantiacärenga imapita parlashgayquita y manami gongangachu.