Testigucunata Pushajcuna cartacamush

Waugui paniläcuna:

Diosta y runacunata cuyashpanchimi, Jesús cayno nishganta cäsucunchi: “Maytsay markakunapapis aywar runakunata yachatsipäkunki discïpulükuna kananpaq. Paykunata bautizapäkunki” (Mat. 28:19, 20; Mar. 12:28-31). Rasunpa cuyacoj captinchega pï runacunapapis shongunman chayashunmi, paycunapis “mana ushakaq kawayta tarinanpaq” (Hech. 13:48).

Öraga sasa imachi caycan runacunata imano parlapänapaj; chaymi waquin hermanucunaga imapita parlananpäga umachicarcärinraj. Pero mananami sasachu ticracurin chay runacuna quiquincuna munashgan cajpita parlar galaycuptinchi. Chaymi Diospita yachachicuycarga alichi canman yarpachacuptinchi ‘maypitaraj cay runa, imaraj laquichiycan, imay horaraj parlayta munan’ nir. ¡Cay folletuga yanapaycalämäshunmi ali yachachicoj canapaj!

Cay publicaciunchoga 12 yachacuycunatami tarishun, jucnin jucninchomi caycan imacunata rurar ali yachachicoj canapaj. Jina jucnin jucninchomi yachacushun Jesuspita o waquin Diosta sirvejcunapitapis, imanotaj paycuna Diospita predicar ali yachachicoj capäcurgan. Cananga manami alapa yarpachacushunnachu imapita parlanapaj cajlapita, más aliga canga ‘imacunata rurartaj chay runata cuyapäman’ nir yarpachacuptinchi. Nircurpis, cay folletucho yachacunapaj cajcunaga yanapämäshunmi piwanpis parlar galaycuptinchi, yapay watucoj cutiptinchi y pilatapis Bibliapita yachaycächiptinchina.

Chunca ishcay caycan yachacunapaj, jucnin jucninpita ali yachacurcur cawashgayqui marcacho runacunaman yarpay. Ima rurashganchipitapis más aliga caycan Jehovata cuyashganchimi. Imapis walcayächinmanchu cuyacoj cashganchita, chayno captenga runacunatami yanapaycäshun Diosta sirvir galaycärinanpaj.

Cushicuypämi gamcunawan juc shongula juc yarpayla Diospaj aruptinchi (Sof. 3:9). Runacunata cuyashpayqui ali yachachicoj canayquipaj calpachacäriptiquega, ¡Jehovaga bendiciunnintami jucniqui jucniquita goyculäshunqui!