GARANCHO CAYCAJ YACHACUY | BIBLIATA LEISHPAYQUI CUSHICUY
¿Imaraycurtaj Bibliata leishwan?
Jovy jutiyoj jipash nin: “Bibliata leirga mana entiendinäpaj cajtami yarpargä”.
Queennie jutiyoj warmipis nin: “Guelanaypajnomi cargan”.
Ezekiel mozunami nin: “Achca hojayojta ricaycurga leiytapis manami munargänachu”.
¿Paycunanochu gampis sienticunqui? Capaz galaycuyta munarpis galaycushgayquichu. Achca runacunami Bibliata leiytaga sasatano rican. Pero, ¿chaynochuraj guelananquiman yanapashunayquipaj y cushichishunayquipaj cajta musyarir? ¿Bibliata más shumaj leinayquipaj yachacuptiquiga, leiyta galaycunquimanchuraj?
Waquin runacuna Bibliata leirir imano yanapashganta wilacamojta ricärishun.
20 watayoj Ezekiel mozumi cayno nin: “Locu runa maypapis aywashganta mana musyajnomi nawpataga cargä, pero Bibliapa consejuncunaga yanapamashga cawaynë más aliyananpämi”.
20 watayoj Frieda jipashnami cayno nin: “Nogaga ajaysiquimi cargä, pero Bibliata más leirmi yachacushcä geniüta contrulacuyta. Más yachanaylapami ticrashcä, chaymi más amigöcunapis can”.
50 watayoj Eunice warminami cayno nin: “Más ali warmi canäpaj y unay costumbrëcunata jaguiricunapämi yanapaycäman”.
Paycunatano y más runacunata pasashgannomi Bibliaga yanapashunqui más cushishga cawanayquipaj y ali vidata pasanayquipaj (Isaías 48:17, 18).Y manami chaylachu, jina yanapashunquimi shumaj decidinayquipaj, ali amiguta tarinayquipaj, alapa laquishga mana sienticunayquipaj y masga Camacoj Diosninchipita yachacunayquipaj. Bibliapa consejuncunaga Diospitami shamun y payta casucurga manami imaypis mana alimanga chayanquichu. Payga imaypis alicunalatami consejamanchi.
Bibliata leinayquipaj acranayquimi más importantiga canman. Gatejnin caj yachachicuycunachomi más yanapacuycunata tarinqui Bibliata leiy gustashunayquipaj.