Cay mundupa ushacayninta ama manchacuychu

Jehová mana ali runacunata ushacächinanpäga ichiclanami pishin. Chayno captenga luta religiuncuna ushacächishga canga, achca naciuncuna wilanacur Diospa marcanta ushacächiyta munanga; pero Jehová Armagedón guerracho fiyu runacunata ushacächenga. ¡Chay junaj mayna chayamunanta shuyaraycanchi!

Chayno captinpis jatun nacay imay galaycunanpäga manami shumaj musyanchichu. Jina gobiernucuna imanir y imano religiuncunata ushacächinanpäpis manami musyanchichu. ¿Imanoraj chiquicoj naciuncunaga Diospa marcanta atacanga y aycataj duranga? ¿Imata rurartaj Jehová fiyu runacunata ushacächenga Armagedón guerracho? Chaycunatapis musyanchichu.

Pero chaycunaman yarparga ama manchacushwanchu, Bibliaga wilamanchimi imano mana yarpachacuylapa chaycuna pasananta shuyaränapaj. Tantiarinapaj, musyanchinami “ultimo tiempucho” cawaycashganchita (2Ti 3:1). Musyanchipis luta religiuncuna walca tiempula atacashga cananpaj, chaynopa rasunpa caj religiunta mana ushacächinanpaj (Mt 24:22). Yäracunchipis Jehová marcanta salvananpaj (2Pe 2:9). Payga mayna alita ruraj y poderyoj reyta acrashga mana ali runacunata ushacächinanpaj y ali shonguyoj runacunata salvananpaj Armagedón guerracho (Ap 19:11, 15, 16).

Caycuna pasashganta ricar, “runacunaga manchariywan rimaytapis mana puydir chiyacäconga” (Lu 21:26). Noganchi ichanga manami. Bibliacho leicuptinchi imano unaycho marcanta Jehová salvargan y shamoj tiempupaj aunimashganchita yarparga Lucas 21:28 nishganno ricacushun, chaycho nin: “Lapanpis qalaykuptin kalpatsakur kushikärinki. […] Tayta Dios salvashunaykipaq kaykashqanta” musyar.