¿Mayashcanquichu?

Unay escribishganga musyachicun Bibliaga rasun cajta wilacushganta

TIERRAS de la Biblia nishgan Museo Jerusalén marcacho, taripäcushgan laja rumi caycanmi, cayga 600 o 700 wata Jesús manaraj shamuptin wichanpitami. Hebrón marcapa cercalancho wanushgacunata churapäcushgan machaycho cay laja rumita taripäcurgan. Chaychomi cayno escribishga caycan: “Yahweh Sabaotpa Hagavpa wamran Hagaf maldito cachun”. ¿Imanotaj cay escribishganga yanapämanchi Biblia wilacushganman yaracunapaj? Cayga musyachimanchi, Diospa jutin unay hebreo rimaycho cayno escribipäcushganta YHWH, cay jutiga reguishgami cargan y runacunaga chaytaga imaypis utilizapäcoj. Cayno escribishgancunata juc machaycunachopis taripäcurgan; chaychoga runacuna juntacärej y pacacärej, y machay rurincho Diospa jutin y juc juticunatapis escribipäcoj.

Rachel Nabulsi, rimaycunata estudiaj warmiga caynomi nin: “YHWH jutita cutin cutin utilizapäcushganga importantimi [...]. Y Judá, Israel runacunapäpis YHWH importantimi cargan”. Cayga yanapämanchi Biblia wilacushganman yaracunapaj. Chayno Diospa jutin escribicämushganga, Biblia nishganwan shumaj tincun. Y runacuna jutincunata churacärishganchopis Diospa jutinpis yurimun.

Taripäcushgan laja rumicho escribishganga Yahweh Sabaot ninanmi, “Jehová de los ejércitos”. Chayga musyachimanchi Diospa jutin y “Jehová de los ejércitos” nishgantapis chay wichan runacuna utilizapäcushganta. “Jehová de los ejércitos” nishganga 250 cutipitapis maspis yurimun Bibliacho, masraj Isaías, Jeremías, Zacarías librucunacho.