Liejcuna tapucärishgan

¿Imanirtaj cristianucunaga shumajraj yarpachacushwan internetpa piwanpis guelganacuypita?

Alimi caycan familianchiwan y waquin hermanunchicunawan internetpa guelganacuptinchiga. Ichanga chaycho casucuycanchi Biblia cayno nishgantami: “Alli tantiyacoj runaga mana alliman chayananpaj cajta musyar witicunmi. Mana tantiyacoj runami ichanga imatapis mana cäsupaypa aywar chayan fiyupa ñacayman” (Prov. 27:12).

Jehovaga chapämäshunmi imayca mana alicunapita; chaurasga manami imaraycurlapis juntacashwanchu congregaciunpita gargushga cajcunawan o lutanta yachachicojcunawan (Rom. 16:17; 1 Cor. 5:11; 2 Juan 10, 11). Waquincunaga congregaciunman shamuycarpis Dios mandacushganta mana casucunmanchu (2 Tim. 2:20, 21). Öraga ladu ladu piwanpis caycarga musyanchimi ima clase runa cashganta, ichanga internetlapa piwanpis reguinacorga manami shumaj musyashunchu imano runawan parlaycashganchita.

Internetlapaga achcajmi guelganacärin chayman noganchipis yaycurirga pajta lutanpa aywaycashwan. Waquincunaga caynömi nipäcushga ‘imaparaj yaycurgä’ nir, laquicärishgami rurapäcushganpita. Öraga nishwan ‘nogataga manami imapis pasamangachu’, pero ¿imanotaj chayga canman maychicaj runacuna rurincho caycarga?, shumaj musyanchichu Diosta sirvishganta o mana sirvishgantapis. Salmo 26:4 cayta wilacun: “Llullacunawanga imaypis manami goturashcächu. Janan shongu parlajcunawanpis manami goturashcächu”. Aliga canga shumaj reguinacushganchi runawan juntacashganchimi.

Walcajcunalawan juntacarcur parlarpis, tantiarcushwanrämi imapita y ayca tiempo guelganacuycashganchita. Manachi tiempunchita ograshunchu ari waquincunawan parlar parlar cacuptinchi. Pablo parlargan tiempuncho runacuna ‘washa rima, runapa vidanta ashej’ cashganta y paycunawan mana juntacänanpaj Timoteuta nirgan (1 Tim. 5:13). Consejacushganga canan wichanpäpis shumaj caycan.

Yaracuypaj cristianucunaga manami ichiclapis juntacanchu lutanta parlaj cajcunawanga (Sal. 15:3; Prov. 20:19). Imapitapis parlananpäga shumajraj yarpachacun, ricapäcaramunraj imapis rasun caj o lutan caj cashganta (Efes. 4:25). Rasun caj yachachicuycunaga noganchicunanami chayaycamun jw.org paginapita y JW Broadcasting^® programacunapitami.

Waquin Testigucunaga internetlapaga ima ranticunanpaj cajta munachicun o aruyraycur avisucunata churapäcun, ichanga pipis ninman ‘negociulätami ruracuycä’ chayno captinpis yarpachacunmanmi Biblia cayno wilacushganman: “Guellaypäga ama yargaj caychu”. Pipis yarpaylapis yarpanmanchu Diosta adurashganchiwan caycunata taluchiyta (Heb. 13:5).

¿Imaraj canman internetcho maychicaj juntacaycur guellayta mañacuptinchi ‘waquincunaman apachinapaj’ nir? Yanapacunapaj yarpachacurga alimi caycan (Sant. 2:15, 16). Pero may chaycho juntacarcur juntacarcur guellayta mañacorga, sucursalcho o waquin encargado hermanucuna mana mandamashganchitachi ruraycashwan, paycunarämi imatapis ali camacächinman (1 Tim. 5:3, 4, 9, 10, 16). Alimi canga imatapis ruranapäga encargado hermanucuna nimashganchitaraj shuyaptinchi.

Ima ayca rurashganchicunaga Jehovapa nawilanpaj ali caycanman (1 Cor. 10:31). Chaymi internetlapa piwanpis manaraj guelganacurga shumajraj yarpachacushwan chaycho caycajcuna imapita parlananpaj cajta, chayta rurarga tantiaj runami cashun.